ចូលចិត្តនៅម្នាក់ឯង ប៉ុន្តែមិនចូលចិត្តនៅទំនេរ ! បើបែបនេះ តើត្រូវចំណាយពេល និងប្រើប្រាស់វាយ៉ាងដូចម្តេច ទើបទទួលបានភាពរីករាយ និងការលូតលាស់? ក្នុងករណីនេះ គឺចាំបាច់ណាស់ ដែលយើងត្រូវរកមើលសកម្មភាពសម្រាប់អនុវត្តន៍ ដោយមិនត្រឹមតែអាចទទួលបាននូវអារម្មណ៍រីករាយប៉ុណ្ណោះទេ ប៉ុន្តែក៏ត្រូវតែឆ្លើយតបនឹងគុណភាពនៃការរស់នៅប្រចាំថ្ងៃ ឬការពង្រឹងជំនាញផ្តោត និងការបំពេញន័យទៅកាន់ដំណើរជីវិតផងដែរ។

បើតាមគេហទំព័រ womanandhome បានបង្ហាញគន្លឹះមួយចំនួន សម្រាប់អនុវត្តន៍រៀងរាល់ពេលទំនេរ ជាពិសេសអ្នកដែលរស់នៅម្នាក់ឯងដូចជា ៖​

១. ចម្អិនអាហារ ៖ មនុស្សមួយចំនួនមានឱកាសធ្វើអាហាររាល់ថ្ងៃហើយ តែយ៉ាងណាមិញការយកសកម្មភាពនេះ ដើម្បីធ្វើបន្ថែមនាពេលទំនេរ វាមិនមែនជារឿងខុសទាស់នោះទេ។ ព្រោះការធ្វើអាហារ មិនថាម្ហូប ឬក៏នំចំណីអ្វីក៏ដោយ ឱ្យតែជាសកម្មភាពមួយ ដែលនាំឱ្យស្គាល់នូវវប្បធម៌ចម្រុះ។ ដោយការចាប់ផ្តើមអនុវត្តន៍សកម្មភាពថ្មីៗ និងមុខម្ហូបថ្មីៗ ក៏អាចជួយឱ្យលោកអ្នកស្គាល់ពីប្រភេទអាហារ នៅតាមបណ្តាប្រទេសផ្សេងៗគ្នា វប្បធម៌ខុសគ្នា ទាំងរបៀបនៃការផ្សំគ្រឿង និងប្រវត្តិនៃឈ្មោះអាហារនីមួយៗ។

២. រៀបផ្កាផុសលើក្រដាស ៖ សកម្មភាពនេះអាចថា ពេញនិយមសម្រាប់វ័យក្មេងៗ ហើយមួយចំនួនក៏មានបទពិសោធន៍ អនុវត្តន៍កាលពីនៅក្មេងៗ។ ដោយសកម្មភាពទាំងនោះ មានដូចជា ការផុសផ្កា ឬស្លឹករុក្ខជាតិលើក្រដាស ហើយតម្រូវឱ្យស្វែងរកផ្កា ឬស្លឹកឈើដែលគ្រៀមស្ងួត ដើម្បីយកមករៀបនិងកែច្នៃនៅលើក្រដាសស្អាត ហើយបង្កើតបានជាសោភ័ណមួយបែបផ្សេងទៀត។ ការកែច្នៃបែបនេះ ក្លាយជាសិល្បៈមួយគួរឱ្យចាប់អារម្មណ៍ ថែមទាំងជួយឱ្យអារម្មណ៍របស់អ្នកស្ងប់ល្អ ព្រោះត្រូវការផ្តោតសតិដើម្បីផ្គុំវា ទើបអាចលេចរូបរាងមកគួរជាទីប្រាថ្នានៃខ្លួនឯង ហើយក៏ជាសកម្មភាព មួយអាចធ្វើនៅផ្ទះម្នាក់ឯងបាន។​

​​​​​​​​​​​​​​​​​​​​​៣. ដើរព្រៃឬឡើងភ្នំ ៖ ការដើរព្រៃ ឬឡើងភ្នំភាគច្រើន លោកអ្នកធ្លាប់បានឃើញគេធ្វើវាជាក្រុមៗ ព្រោះសម្រួលដល់សុវត្ថិភាព និងកត្តាផ្សេងទៀត។ ប៉ុន្តែការផ្តល់ឱកាសឱ្យខ្លួនឯងទទួលបានបទពិសោធក្នុងការដើរព្រៃ ឬឡើងភ្នំម្នាក់ឯង ក៏ជាការផ្តល់ពេលឱ្យខ្លួន​ឯងបានមួយចំណែកដែរ ព្រោះវាផ្តល់ឱ្យអ្នកនូវអារម្មណ៍ដែលមានសេរីភាព ធ្វើសកម្មភាព ដែលខ្លួនត្រូវការ តាមរយៈការប្រើភ្លេង តន្ត្រីសម្រាប់កម្សាន្ដចិត្ត និងផតខាសដែលខ្លួនចង់ស្ដាប់ដោយមិនក្រែងចិត្តនរណាម្នាក់។ សកម្មភាពទាំងនេះហើយ ជួយឱ្យអ្នកកាន់តែមានអារម្មណ៍ល្អ និងផ្សារភ្ជាប់ជាមួយខ្លួនឯងមួយកម្រិតទៀត។ បើទោះបីជា ចំណាយត្រឹមតែ២០នាទី​ក៏អាចជួយឱ្យអ្នកទទួលបានអារម្មណ៍ល្អប្លែកដែរ។

៤. ថែទាំសត្វចិញ្ចឹម ៖ ជារឿងល្អ បើស្ថិតក្នុងករណីលោកអ្នកជាមនុស្សដែលមានការស្រឡាញ់ និងមេត្តាចំពោះសត្វរួចស្រាប់ហើយនោះ។ ដូច្នេះនៅពេលទំនេរ លោកអ្នកគួរចំណាយពេលខ្លះស្ម័គ្រចិត្ត ទៅមើលថែរសត្វចិញ្ចឹមនៅទីតាំងណាមួយ។ ហើយបើទោះបីជា អ្នកទៅទីនោះតែម្នាក់ឯង ក៏មិនជាបញ្ហាដែរ ព្រោះការផ្សារភ្ជាប់សកម្មភាពខ្លួនឯងជាមួយនឹងសត្វចិញ្ចឹមក៏ជាចំណែកជួយឱ្យអ្នករីករាយ។

៥. ការតុបតែង ៖​ ចំណុចនេះ លោកអ្នកអាចកែច្នៃរបស់របរចាស់ៗ ពីមុនៗ ឱ្យមានសោភ័ណល្អប្រសើរជាងមុន ដែលសម្ភារៈទាំងនោះមានដូចជា ចាន ​ទៀន គ្រឿង​លម្អ ឬ​ថូជាដើម។ កែលម្អ ដោយការថែមថយពណ៌ និងគូសវាសឱ្យមានសម្រស់ខុសប្លែកពីមុន។ តាមរយៈការព្យាយាមបង្កើតសកម្មភាពថ្មី​ៗ ដែលវាជួយឱ្យលោកអ្នក ពង្រឹងបាននូវជំនាញដែលមានភាពច្នៃប្រតិដ្ឋបន្ថែម។

៦. សរសេរកំណត់ត្រា ៖ បើសិនជា មិនបានសរសេរកំណត់ត្រាប្រចាំថ្ងៃ គួរតែប្រើប្រាស់ពេលដែលសម្រាក ឬទំនេរពីការងារមួយចំនួនដើម្បីអនុវត្តន៍ ការសរសេរកំណត់ហេតុ តាមរយៈកត់ទុកអំពីសកម្មភាពប្រចាំថ្ងៃ ឬអារម្មណ៍ដែលកំពុងប្រឈម ទាំងរឿងល្អ និងមិនល្អ ព្រោះវាជួយជំរុញឱ្យលោកអ្នកអាចកាត់បន្ថយស្រ្តេស ឬក៏បញ្ចៀសចេញនូវអារម្មណ៍អវិជ្ជមាន ហើយជំនួសមកវិញនូវការប្រមូលបានអារម្មណ៍ល្អ សម្លឹងពិភពលោកក្នុងន័យវិជ្ជមាន។

ការពិតទៅ របៀបសរសេរកំណត់ត្រា មានច្រើនប្រភេទណាស់ដូចជា ផែនការជំរុញផលិតភាព សេចក្ដីពេញចិត្តចំពោះខ្លួនឯង ផែនការអនាគត ការផ្ទៀងផ្ទាត់អំពីទំនាក់ទំនង ហេតុការណ៍ដែលនាំឱ្យអារម្មណ៍ដិតដាម ឬក៏ការតាមដានអំពីក្ដីស្រមៃក៏ដូចជាគុណភាពនៃការគេងជាដើម។ ការចំណាយពេលបន្តិចបន្តួច ដើម្បីសរសេររឿងរ៉ាវទាំងនេះជាមូលហេតុមួយជួយឱ្យសុខភាពផ្លូវចិត្តមានការវិវឌ្ឍល្អ ដោយប្រើពីមួយដំណាក់កាលទៅមួយដំណាក់កាល។ ការបង្ហាញអារម្មណ៍ខ្លួនឯងដោយប្រើប្រាស់សំណេរ សរសេរជាកំណត់ត្រាផ្ទាល់ខ្លួន ជាចំណែកជួយឱ្យផ្លូវចិត្តរឹងមាំ មិនថាជាការសរសេរដោយប្រើប្រាស់វិធីរបៀបណានោះទេ។ ​​​​​​​​​​​​​​​​​​​​​​​​​​​

៧. ធ្វើសៀវភៅទិនានុប្រព្រឹត្តិ(កំណត់ត្រា ) ៖ ការចងក្រងរូបភាពឱ្យទៅជាសៀវភៅមួយក្បាល ជាវិធីសាស្រ្តមួយ ជួយរក្សាការចងចាំរបស់អ្នក ថែមទាំងអាចរក្សាអនុស្សាវរីយ៍ល្អៗ មិនត្រឹមតែចំពោះខ្លួនឯងប៉ុណ្ណោះទេ ប៉ុន្តែក៏បានធ្វើសម្រាប់គ្រួសារ ឬក៏មនុស្សជាទីស្រឡាញ់ណាម្នាក់។ ក្នុងចំណុចនេះ លោកអ្នកគ្រាន់តែជ្រើសយកតែបណ្តុំអនុស្សាវរីយ៍ណា ដែលសំខាន់ៗក្នុងដំណើរជីវិតរបស់អ្នកតែប៉ុណ្ណោះ! មិនថាជារូបភាព សំបុត្រទស្សនាតន្រ្តី លិខិតអញ្ជើញ ដោយបង្គំវាចូលគ្នារួចដាក់បញ្ចូលទៅក្នុងសៀវភៅទិនានុប្រព្រឹត្តិ។ ការជ្រើសរើសយក សកម្មភាពបែបនេះ ដើម្បីយកមកអនុវត្តន៍ពេលនៅម្នាក់ឯង គឺជាកត្តាជួយឱ្យអ្នកមានឱកាសក្នុងការឆ្លុះបញ្ចាំងអំពីអតីតកាល៕