ភ្នំពេញ- ចង់ជោគជ័យយុវជនបើដាក់ចិត្តរៀន គឺត្រូវរៀនឱ្យខ្លាំង ហើយ​ពេលចេញធ្វើការត្រូវធ្វើឱ្យមានផលិតភាពការងារខ្ពស់។ នេះជាការលើកឡើងរបស់លោក គីម ដារ៉ា ស្ថាបនិកសាលាបង្វឹក Startup Community។

លោក គីម ដារ៉ា ស្ថាបនិកសាលាបង្វឹក Startup Community មានប្រសាសន៍ថា យុវជនត្រូវរៀនជំនាញដែលខ្លួនស្រឡាញ់ ហើយ​កាលណាយើងរៀនចេះ យើងចង់ធ្វើអ្វីដែលយើងចង់ធ្វើ ។ ទន្ទឹមគ្នានេះ នៅពេលចេញធ្វើការងារ យុវជនត្រូវធ្វើឱ្យខ្លាំង ហើយ​ប្រសិនបើនៅមានអាយុតិច ត្រូវរើសស្ថាប័នណាដែលផ្ដល់ឱកាសឱ្យអាចអភិវឌ្ឍខ្លួនបានរៀនសូត្រ និងរីកចម្រើនបន្ថែមទៀត។

លោក គីម ដារ៉ា ស្ថាបនិកសាលាបង្វឹក Startup Community

“កាលណាយើងរៀន យើងចាប់ផ្ដើមស្រឡាញ់ខ្លួនឯង យើងមានក្ដីសុខពេលយើងចេញធ្វើការក៏យើងជោគជ័យដែរ”

ស្ថាបនិកសាលាបង្វឹក Startup Community បន្ថែមថា តួនាទីរបស់និស្សិតមានតែមួយ គឺរៀនឱ្យចេះ ហើយពាក្យមួយម៉ាត់ថារៀនចេះនេះ រួមមាន ទី១.រៀនទាក់ទងនឹងជំនាញ, ទី២.រៀនគ្រប់គ្រងស្មារតី​ និងអារម្មណ៍ និងទី៣.រៀនចេះស្វែងរកសេចក្ដីសុខ រៀនចេះគ្រប់គ្រងពេលវេលា​ រៀនចេះគោរពអ្នកដទៃ រៀនចេះឱ្យតម្លៃអ្នកដទៃ រៀនទំនាក់ទំនងជាមួយមិត្តភក្ដិ និងរៀនទំនាក់ទំនងជាមួយសង្គម និងទី៤. ឆ្ងល់ត្រូវតែហ៊ានសួរគ្រូ និងអ្នកចេះជាងខ្លួន។

លោក គីម ដារ៉ា ស្ថាបនិកសាលាបង្វឹក Startup Community

“នៅពេលរៀនយើងព្យាយាមធ្វើយ៉ាងណា កិច្ចការផ្ទះ កិច្ចការស្រាវជ្រាវដែលគ្រូដាក់ឱ្យត្រូវធ្វើឱ្យហើយ កុំទុកចោលចាំដល់ថ្ងៃចាំធ្វើ ព្រោះប្រសិនបើគ្រូដាក់កិច្ចការមកយើងធ្វើទាន់ពេល យូរៗទៅយើងក្លាយជាសិស្សម្នាក់ពូកែដោយមិនដឹងខ្លួន”

លោក គីម ដារ៉ា លើកឡើងផងដែរថា​ ការវិនិយោគដែលទទួលបានភាគរយខ្ពស់និងមានហានិភ័យទាបជាងគេបង្អស់ គឺការរៀនសូត្រ។ លោកថា​ មនុស្សរៀនកាន់តែច្រើនកាន់តែចេះ ព្រោះនៅពេលដល់វ័យមួយខ្ទង់ ៣០ឆ្នាំទៅ៤០ឆ្នាំ គឺលែងមានអារម្មណ៍ចង់រៀន។ ដូច្នេះ ទាន់វ័យនៅមានសន្ទុះ យុវជនត្រូវរៀនលើវគ្គសិក្សាណាដែលខ្លួនពេញចិត្ត ដើម្បីអភិវឌ្ឍសមត្ថភាពខ្លួន ។

លោក គីម ដារ៉ា ស្ថាបនិកសាលាបង្វឹក Startup Community

“នៅក្មេងឱ្យតែទាក់ទងនឹងការរៀនសូត្រខ្ញុំលើកទឹកចិត្ត ព្យាយាមរៀនឱ្យបានច្រើន វគ្គសិក្សាខ្លះត្បិតថាថ្លៃបន្តិច ប៉ុន្តែបើយើងគិតថា វាមានតម្លៃ គឺគួរតែរៀន។ ខ្ញុំមិនហ៊ានធានា១០០%ថា រៀនដឹងតែជោគជ័យទេ ប៉ុន្តែ៩០%ដឹងតែជោគជ័យ ព្រោះនៅពេលយើងរៀនយើងនឹងដឹងថាជោគជ័យតាមវិធីណាដោយខ្លួនឯង”

លោក គីម ដារ៉ា ក៏លើកទឹកចិត្តដល់យុវជនដែរថា បើធ្វើការងារ សូមឱ្យច្បាស់ថា ធ្វើការងារ ពោលគឺត្រូវធ្វើឱ្យខ្លាំង រកចំណូលឱ្យបានច្រើន ហើយ​ក៏​ត្រូវចេះប្រើប្រាស់លុយ។ បើតាមលោក ដារ៉ា មនុស្សមួយចំនួនអាចក្លាយជាអ្នកមានបាន គឺដោយសារការចេះប្រើប្រាស់លុយ មិនមែនទាន់តែជាអ្នករកស៊ីនោះទេ ទោះជារៀនចប់ចេញធ្វើការ ហើយសន្សំលុយយកទៅវិនិយោគបន្ត ក៏អាចក្លាយជាអ្នកមានដែរ៕