ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រដ្ឋមន្រ្តីក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកទឹកចិត្តដល់សាលារៀនទាំងអស់ ពិសេសសាលាអន្តរជាតិ ក៏ដូចជាសាលារៀនឯកជន យកចិត្តទុកដាក់បញ្ចូលខ្លឹមសារបេតិកភណ្ឌជាតិ និងលើកកម្ពស់ការរៀនភាសាខ្មែរដែលជាភាសាជាតិទៅក្នុងកម្មវិធីសិក្សា ដើម្បីឱ្យសិស្សស្គាល់ច្បាស់នូវអត្តសញ្ញាណជាតិរបស់ខ្លួន។
ក្នុងពិធីសម្ពោធជាផ្លូវការអគារសិក្សាថ្មី នៃសាលាចំណេះទូទៅអន្តរជាតិឌូវី និងពិធីបញ្ចុះបឋមសិលាបើកការដ្ឋានសាងសង់អគារសិក្សាថ្មីនៃសាលាអន្តរជាតិបាត់ដំបង ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ខេត្តបាត់ដំបង គឺជាខេត្តមួយដែលសម្បូរទៅដោយបេតិកភណ្ឌវប្បធម៌ដ៏ល្អផូរផង់។ ដូច្នេះ ការដាក់បញ្ចូលនូវខ្លឹមសារបេតិកភណ្ឌជាតិ និងភាសាជាតិទៅក្នុងកម្មវិធីសិក្សា គឺជាកិច្ចការសំខាន់មួយដើម្បីរក្សាបាននូវឫសគល់វប្បធម៌ដ៏ថ្លៃថ្លារបស់យើង។ ទន្ទឹមគ្នានេះ ក្រសួងក៏បានពង្រីកផ្នែកអប់រំកូមារតូច និងលើកទឹកចិត្តឱ្យសិស្សចូលរៀនមត្តេយ្យសិក្សាកាន់តែច្រើន ដែលជាដំណាក់កាលមូលដ្ឋានគ្រឹះដ៏សំខាន់សម្រាប់អនាគតការសិក្សារបស់កុមារ។
ឯកឧត្តមរដ្ឋមន្ត្រី ក៏បានវាយតម្លៃខ្ពស់ចំពោះសាលាដែលបានប្រើប្រាស់កម្មវិធី Cambridge នៅក្នុងកម្មវិធីសិក្សារបស់ខ្លួន ដែលបង្ហាញពីការឈានទៅរកស្តង់ដាអន្តរជាតិ និងបានលើកឡើងពីការអប់រំក្នុងយុគសម័យបញ្ញាសិប្បនិម្មិត (AI) ដែលទាមទារឱ្យការអប់រំមានការប្រែប្រួល និងសម្របខ្លួនទៅនឹងបច្ចេកវិទ្យាថ្មីៗ ដោយលោកគ្រូ អ្នកគ្រូ និងក្មួយៗសិស្សានុសិស្ស ត្រូវតែចេះប្រើប្រាស់ AI ប្រកបដោយការទទួលខុសត្រូវខ្ពស់។
ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា បច្ចេកវិទ្យានឹងជួយឱ្យការសិក្សារៀនសូត្រកាន់តែមានភាពងាយស្រួល ដោយអាចរៀនពីចម្ងាយបាន ឬអាចស្វ័យសិក្សាដោយខ្លួនឯងបានគ្រប់ពេលវេលា និងគ្រប់ទីកន្លែង។ តែយ៉ាងណាឯកឧត្តមបណ្ឌិតសភាចារ្យ លើកទឹកចិត្តឱ្យប្រើប្រាស់បច្ចេកវិទ្យា ប្រកបដោយការទទួលខុសត្រូវខ្ពស់ ទោះបីជាវាមានអត្ថប្រយោជន៍ច្រើនក៏ដោយ។
ជាមួយគ្នានេះ រដ្ឋមន្ត្រីក្រសួងអប់រំ ក៏បានលើកទឹកចិត្តឱ្យសាលារៀនគិតគូរអំពីការបង្កើតភាពជាដៃគូរវាងសាលារដ្ឋ និងឯកជន ដើម្បីសិក្សាទៅវិញទៅមកអំពីឧត្តមានុវត្តន៍ ការអភិឌ្ឍសមត្ថភាពស្ថាប័ន ការបង្កើតឱកាស និងការជួយបំពេញចន្លោះខ្វះខាតឱ្យគ្នាទៅវិញទៅមក៕
