ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ខណៈពេលដែលមានកាលវិភាគ មានផែនការសព្វគ្រប់អស់ហើយ ប៉ុន្តែនៅតែមានអារម្មណ៍ថា មានសម្ពាធជាមួយខ្លួនឯងពីមួយពេលទៅមួយពេល? ប្រសិនបើបែបនេះ អាចថាជាពេលដែលត្រូវគិតគូរអំពីការបង្កើតទម្លាប់វិញម្តង។ តាមរយៈគេហទំព័រ Calender បានបង្ហាញពីទម្លាប់ដែលអាចសន្សំពេលជាង១០ម៉ោងក្នុងមួយសប្តាហ៍ ដោយមានរៀបរាប់ជូនដូចខាងក្រោម ៖
១. កំណត់អាទិភាពតែ៣ចំណុចប៉ុណ្ណោះ ៖ ការកំណត់អាទិភាព យ៉ាងហោចណាស់ក៏ចំណេញពេលពីមួយម៉ោង ទៅពីរម៉ោងក្នុងមួយថ្ងៃដែរ! យ៉ាងណាក៏ដោយការកំណត់បានច្រើនក៏មិនចោទជាបញ្ហាដែរ ប៉ុន្តែពេលវេលាក្នុងមួយថ្ងៃ ក៏មិនច្រើនណាស់ដែរ ដូច្នេះការចាប់ផ្តើមបង្កើតទម្លាប់ដំបូងៗមិនគួរធ្វើឡើងក្នុងរូបភាពធំពេក ដែលនាំឱ្យបាត់បង់ស្មារតីក្នុងការអនុវត្តនោះដែរ។ ការចាប់ផ្តើមកំណត់កិច្ចការអាទិភាពក្នុងមួយថ្ងៃបីចំណុច បានរួមចំណែកដល់ការប្រតិបត្តិ និងការតាមដានលទ្ធផលផ្ទាល់ខ្លួន។ ក្នុងសម័យឌីជីថល ឬសម័យបច្ចុប្បន្ននេះ មានរឿងរ៉ាវជាច្រើនបង្កការរំខានទៅកាន់ស្មារតី ប្រសិនបើមិនបានកំណត់អ្វីទៅជាអាទិភាពនោះទេ នាំឱ្យភាពស្លន់ស្លោកើតមានជាញឹកញាប់ រួមទាំងជំរុញឱ្យបង្កើនអាការតានតឹង ពិបាកក្នុងការផ្តោត និងបាត់បង់ថាមពលជាច្រើនទៅក្នុងការរស់នៅប្រចាំថ្ងៃ។
២. ក្នុងមួយថ្ងៃត្រូវកំណត់ពេលមួយដែលត្រូវការផ្ដោតស្មារតី ៖ ការផ្តោតស្មារតីមិនត្រូវការឱ្យលោកអ្នកប្រើប្រាស់ពេលពេញមួយថ្ងៃនោះទេ ប៉ុន្តែវាត្រូវការពេលជាក់លាក់ណាមួយក្នុងការអនុវត្ត។ ប្រសិនបើមិនអាចទប់ស្មារតីឱ្យផ្ចង់បានទេ គួរប្រើប្រាស់កម្មវិធីឌីជីថលណាមួយ ដើម្បីសម្រួលដល់ការផ្តោតចំពោះកិច្ចការណាមួយ តួយ៉ាងដូចជាកម្មវិធី Pomodoro Technique វាមានមុខងារកំណត់២៥នាទីសម្រាប់ផ្តោត និងប្រាំនាទីសម្រាប់សម្រាកកម្សាន្ត ឬការឆ្លើយតបសារ ហើយប្រសិនបើអនុវត្តន៍បានទៀងទាត់ មួយអាទិត្យយ៉ាងហោចណាស់សន្សំបានពីមួយម៉ោង ទៅបីម៉ោងក្នុងមួយសប្តាហ៍។
៣. ការរៀបចំប្រភេទមុខម្ហូបប្រចាំសប្តាហ៍ ៖ តើល្ងាចនេះត្រូវញាំអ្វី? មួយថ្ងៃៗខួរក្បាលរវល់គិតរឿងជាច្រើនរួចមកហើយ ការដែលមករវល់នឹងរឿងដែលត្រូវហូបអ្វីទៀត គឺហាក់ដូចជាបង្កើនភាពស្មុគស្មាញដែលពុំចាំបាច់ទៅកាន់ខ្លួនឯងមួយកម្រិតទៀត។ ដូច្នេះ ការកំណត់ឱ្យហើយថា ត្រូវបរិភោគអ្វី ហើយអាហារប្រភេទណាខ្លះដែលជួយទ្រទ្រង់សុខភាពប្រចាំថ្ងៃ មិនត្រឹមតែកាត់បន្ថយនូវភាពស្មុគស្មាញប៉ុណ្ណោះទេ ប៉ុន្តែជាឱកាសក្នុងការផ្ទៀងផ្ទាត់អំពីប្រភេទអាហារដែលត្រូវទទួលទានថា តើមានគុណភាព និងឆ្លើយតបចំពោះសុខភាពបច្ចុប្បន្នដែរ ឬទេ? បន្ថែមពីនោះ ការរៀបចំប្រភេទមុខម្ហូបទុកជាមុន អាចជួយសន្សំពេលប្រមាណចន្លោះពី ២ ទៅ ៣ ម៉ោងក្នុងមួយសប្តាហ៍៕
