ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អាហារស្រស់ៗ ថ្មីៗ មិនមែនមានន័យថាជាអាហារដែលឆៅនោះទេ ប៉ុន្តែចង់សំដៅលើប្រភេទអាហារដែលប្រើប្រាស់ត្រីសាច់ បន្លែបង្ការថ្មីៗ មិនទុកយូរពេក មិនផ្អាប់ចោលក្នុងរយៈពេលយូរក្នុងទូរទឹកកក ឬមិនទាន់កែច្នៃ មិនដាក់សារធាតុដែលរក្សាទុកឱ្យបានយូរ ជារួមគឺប្រភេទអាហារទាំងឡាយណា ដែលមានសារធាតុចិញ្ចឹមខ្ពស់។ តាមរយៈគេហទំព័រ healthline បានប្រាប់អំពីមូលហេតុដែលគួរទម្លាប់ទទួលទានអាហារស្រស់ៗ ( Real Food ) ។
១. អាហារស្រស់ៗមានផ្ទុកសារធាតុចិញ្ចឹមសំខាន់ៗ ៖ ប្រភេទត្រីសាច់ ដែលពុំទាន់កែច្នៃ បានផ្តល់នូវសារធាតុចិញ្ចឹមខ្ពស់ មានវិតាមីន និងសារធាតុរ៉ែ ដែលឆ្លើយតបទៅនឹងតម្រូវការសុខភាព នៃរាងកាយទាំងមូល។ តួយ៉ាងដូចជាប្រភេទ ស៊ុតស្រស់ សាច់ស្រស់ និងថ្លើមសត្វ មានសារធាតុចិញ្ចឹមទៅកាន់សុខភាពខួរក្បាលផង និងសុខភាពទូទៅផង ក្នុងកម្រិតមួយខ្ពស់! បើប្រៀបធៀបទៅនឹងអាហារកែច្នៃរួចរាល់។
២. មានជាតិស្ករទាប ៖ តាមរយៈរូបភាពជាក់ស្តែង នៃការស្រាវជ្រាវជាទូទៅមួយចំនួនបានឱ្យដឹងហើយថា ការទទួលទានអាហារដែលមានជាតិស្ករខ្ពស់បានបង្កហានិភ័យទៅកាន់សុខភាពរាងកាយ។ ហើយការ កាត់បន្ថយអាហារជាតិស្ករ បានរួមចំណែកដល់ការកាត់បន្ថយអាការធាត់ជ្រុល ជំងឺទឹកនោមផ្អែមប្រភេទ២ ជំងឺខ្លាញ់រុំថ្លើម និងជំងឺបេះដូងជាដើម។ ដូច្នេះការកាត់បន្ថយអាហារដែលមានជាតិស្ករខ្ពស់ បានរួមចំណែកដល់ការកាត់បន្ថយហានិភ័យនៃសុខភាព។
៣. ជំរុញសុខភាពបេះដូង ៖ អាហារស្រស់ៗ បានរួមចំណែកទៅកាន់ សុខភាពបេះដូងដោយហេតុថា អាហារស្រស់ៗ សំបូរសារធាតុប្រឆាំងអុកស៊ីតកម្ម ម៉ាញេស្យូម និងជាតិខ្លាញ់ល្អ និងសារធាតុចិញ្ចឹម ដែលជួយដល់សុខភាពបេះដូង រួមទាំងជួយកាត់បន្ថយការរលាកផងដែរ។
៤. រួមចំណែកដល់បរិស្ថាន ៖ មូលហេតុអ្វីបានជាការផលិតស្បៀងអាហារសម្រាប់មនុស្សអាចប៉ះពាល់ដល់បរិស្ថាន? ដំណាក់កាល នៃការកែច្នៃអាហារ បានប្រើប្រាស់វត្ថុធាតុដើមជាច្រើន ដូចជាការវេចខ្ចប់ ការប្រើប្រាស់ថ្នាំរក្សាទុក ឬការប្រើប្រាស់ថ្នាំសម្លាប់សត្វល្អិត ការកម្ចាត់មេរោគ សុទ្ធសឹងតែត្រូវការចំណាយធនធានធម្មជាតិច្រើន ខណៈចំនួនប្រជាជនពិភពលោកកំពុងកើនឡើងជាលំដាប់ នោះកំណើន នៃការផលិត តម្រូវការអាហារ ក៏មានការកើនឡើងព្រមជាមួយគ្នាដែរ។ ដូច្នេះការមានទម្លាប់បរិភោគអាហារស្រស់ៗ បានរួមចំណែកដល់បរិស្ថាននៅត្រង់ថា មានលទ្ធភាពកាត់បន្ថយបរិមាណកាកសំណល់ដែលមិនអាចបំបែកបាន និងការសន្សំកម្លាំងពលកម្ម ទុកប្រើប្រាស់នៅពេលដែលចាំបាច់។
៥. មានជាតិសរសៃខ្ពស់ ៖ ជាតិសរសៃផ្តល់អត្ថប្រយោជន៍ទៅកាន់សុខភាព គេបានដឹងជាទូទៅ ជាពិសេសក្នុងចំណោមអ្នកវិទ្យាសាស្រ្ត និងអ្នកស្រាវជ្រាវ។ ជាតិសរសៃខ្ពស់បានជំរុញមុខងាររំលាយអាហារ នៃរាងកាយ ហើយការទទួលទានអាហារដែលស្រស់ៗ ថ្មីៗ មិនថា បន្លែ ផ្លែឈើ គឺមានឱកាសក្នុងការទទួលបានជាតិសរសៃខ្ពស់ជាងអាហារទុកក្នុងរយៈពេលយូរៗ៕
