ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ពិធីបុណ្យចូលឆ្នាំខ្មែរជាទំនៀមទម្លាប់ប្រពៃណី ដែលបានចាក់ឬសយ៉ាងជ្រៅនៅក្នុងសង្គមកម្ពុជា ។ ប្រជាជនខ្មែរតែងតែប្រារព្ធពិធីនេះ ដើម្បីជាការអបអរ ចំពោះការឆ្លងផុតទុក្ខភ័យក្នុងឆ្នាំចាស់ចូលឆ្នាំថ្មី និងត្រៀមខ្លួនធ្វើកសិកម្ម ដែលនឹងឈានចូលមកដល់ក្នុងពេលខាងមុខដ៏ខ្លី។ ក្នុងឱកាសនេះ គេតែងជួបជុំញាតិមិត្តបងប្អូន និងក្រុមគ្រួសារ លេងល្បែងប្រជាប្រិយ ធ្វើម្ហូបអាហារឆ្ងាញ់ៗ ដើម្បីទទួលទានជុំគ្នា និងប្រគេនចង្ហាន់ព្រះសង្ឃ ដើម្បីឧទ្ទិសកុសលជូនវិញ្ញាណក្ខន្ធបុព្វបុរស។
ទន្ទឹមនឹងភាពរីករាយ យើងក៏គប្បីគិតគូរអំពីឥរិយាបថមួយចំនួន ដែលគួរជៀសវាងប្រព្រឹត្តនៅអំឡុងពេលនេះផងដែរ ។ បើតាមលោកបណ្ឌិត ឈត ប៊ុនថង ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិតសភាកម្ពុជា បានបង្ហាញពីឥរិយាបទចំនួន៥ ដែលប្រជាពលរដ្ឋ ក៏ដូចចាយុវជនគួរជៀសវាងអំឡុងពេល នៃពិធីបុណ្យចូលឆ្នាំនេះ ៖
ទី១. ការធ្វើដំណើរមិនគួរបំពានច្បាប់ចរាចរណ៍ ស្លាកសញ្ញាចរាចរណ៍ ឬយកផ្លូវសាធារណធ្វើជាទីកន្លែងប្រណាំងយានយន្តយកចាញ់ឈ្នះនោះទេ។ លើសពីនេះ យើងគួរអត់ឱនឱ្យគ្នាឱ្យបានច្រើននៅពេលបើកបរ។ ក្នុងករណីមានការជ្រុលជ្រួស ឬប៉ះពារគ្នាតិចតួច គួរតែមានការអធ្យាស្រ័យឱ្យគ្នាឱ្យបានច្រើន។
ទី២. នៅពេលធ្វើដំណើរទៅកាន់រមណីយដ្ឋានផ្សេងៗ ដែលមានភាពចង្អៀត ងាយប៉ះទង្គិចគ្នា យើងគួរអធ្យាស្រ័យឱ្យគ្នា។ ក្នុងករណីរឿងត្រូវដោះស្រាយជាចាំបាច់ យើងគួរប្រកាន់យកដំណោះស្រាយ ប្រកបដោយសន្តិវិធី ជាជាងការប្រើអំពើហិង្សា ឬការប្រព្រឹត្តិអំពីឆ្គាំឆ្គងក្រៅប្រព័ន្ធសីលធម៌ និងច្បាប់។
ទី៣. អ្នកបើកបរមិនគួរសេពគ្រឿងស្រវឹងដែលលើសកម្រិតសុវត្ថិភាពទេ។ ប៉ុន្តែបើទទួលទានហើយ គួរសម្រាកនៅនឹងកន្លែងជួបជុំតែម្ដង ដើម្បីការពារខ្លួនពីគ្រោះថ្នាក់ដែលកើតឡើងមិនបានដឹងមុន។ ជាពិសេស មិនគួរយកហេតុផល ឬលេសថាស្រវឹង ដើម្បីបង្ករឿងនឹងអ្នកផឹកជាមួយគ្នា ឬអ្នកជិតខាងនោះទេ។
ទី៤. លោកលើកឡើងថា “ការលេងល្បែងប្រជាប្រិយ និងការរាំងរែកផ្ដល់នូវភាពសប្បាយរីករាយផង អាចមានរឿងនៅក្នុងហ្នឹងផង។ ជួនកាលរាំទៅអាចប៉ះដៃប៉ះជើងគ្នា ឬក៏ទើសសម្ដី ឬក្រសែភ្នែកតិចតួច ក៏សុំអធ្យាស្រ័យគ្នា។” កុំធ្វើរឿងតូចទៅជារឿងធំ ហើយបង្កទៅជារឿងហិង្សា។
ទី៥. លោកបង្ហាញការគាំទ្រចំពោះចំណាត់ការក្រសួងអប់រំ ដែលបានហាមមិនឱ្យមានការប៉ាតម្សៅ និងការគប់ទឹកដោយប្រើថង់នៅទីសាធារណ ព្រោះវាអាចបង្កជាគ្រោះថ្នាក់ និងបញ្ហាផ្សេងៗច្រើន។ លោកបន្ថែមថា “ការលេងប៉ាតម្សៅ មានអ្នកខ្លះអាចបន្លំទៅជាការបៀតបៀន ឬយកទ្រព្យសម្បត្តិអ្នកដទៃ។” ដូច្នេះសូមជៀងវៀងសកម្មភាពនេះ ដើម្បីភាពសប្បាយរីករាយ និងសុវត្ថិភាពក្នុងឱកាសពិសេសនេះទាំងអស់គ្នា៕
