សម្រាប់ប្អូនៗសិស្សនិស្សិត ដែលកំពុងសិក្សានៅវិទ្យាល័យ ឬបានបញ្ចប់មធ្យមសិក្សាទុតិយភូមិថ្មីៗនេះ ហើយមានបំណងបន្តការសិក្សា ផ្នែកវិស្វកម្មគួរផ្តោតទៅលើមុខវិជ្ជាដូចជា គណិតវិទ្យា, រូបវិទ្យា, គីមីវិទ្យា, ជីវវិទ្យា និងភាសាបទេសជាអាទិភាពចម្បង ដើម្បីប្រឡងចូលរៀន និងមានចំណេះជំនាញគ្រប់គ្រាន់ក្នុងការបន្តការសិក្សាថ្នាក់បរិញ្ញាបត្ររង រឺបរិញ្ញាបត្រផ្នែកវិស្វកម្ម ឬចា​ប់ឱកាសអាហារូបករណ៍ផ្សេងៗ ។ នេះជាការលើកឡើងរបស់ លោក តាំង ថៃស៊ីង ជានិស្សិតកម្ពុជាដែលកំពុងសិក្សាថ្នាក់បណ្ឌិត-អនុបណ្ឌិត (ថ្នាក់ Integrated Master-PhD ) ជំនាញ វិស្វកម្មអេឡិចត្រូនិច និងកុំព្យូទ័រ នៅសាកលវិទ្យាល័យជាតិ Chungbuk ប្រទេសកូរ៉េខាងត្បូង។

និស្សិតរូបនេះបន្តថា ភាសាបរទេសជាចំណេះសំខាន់ ដែលត្រូវបន្តពង្រឹងបន្ថែមទៀត ព្រោះថាសមត្ថភាពភាសាជាកត្តាចម្បងក្នុងការសិក្សាស្រាវជ្រាវបណ្តុំឯកសារនានាពាក់ពន្ធ័នឹងជំនាញវិស្វកម្ម ។ លើសពីនេះលោកលើកទឹកចិត្តឱ្យសិស្សនិស្សិតត្រូវពង្រឹងការយល់ដឹង និងសិក្សាបន្ថែមពីគ្រឿងបច្ចេកវិទ្យា ព្រោះក្នុងសម័យបច្ចេកវិទ្យា ការសិក្សាគឺពឹងផ្អែកខ្លាំងលើគ្រឿងនិងឧបករណ៍អេឡិចត្រូនិចដូចជា កុំព្យូរទ័រ និងទូរស័ព្ទទំនើប ដែលមានបំពាក់ជាមួយអ៊ីនធឺណិត ព្រោះឧបករណ៍ទាំងនេះអនុញ្ញាតឱ្យនិស្សិតស្វែងយល់ និងស្វ័យសិក្សាបន្ថែម។

លោកបន្ថែមថា ក្នុងសម័យយ៉ែនឌ័រ ដែលស្ត្រីក៏អាចមានសមត្ថភាព និងកម្លាំងពលកម្មស្មើរនឹងបុរស ។ ស្ត្រីមានកាយវប្បកម្ម និងស្មារតីគ្រប់គ្រាន់ក្នុងការទទួលបានការសិក្សាអប់រំផ្នែកវិស្វកម្ម។ ជាក់ស្តែងក្នុងពេលបច្ចុប្បន្នលោកឃើញស្ត្រីជាច្រើនបានទទួលការសិក្សាអប់រំលើចំណេះជំនាញវិស្វកម្ម តាមបណ្តាស្ថាប័ននានាទាំងរដ្ឋ និងឯកជន។

ក្នុងចក្ខុវិស័យកម្ពុជា និងបណ្តាប្រទេសនានាតទៅខាងមុខទៀត ជំនាញវិស្វកម្មមានតម្រូវការខ្ពស់មិនថា សំណង់ស៊ីវិល គីមីចំណីអាហារ ធនធានទឹក អេឡិត្រូនិច អគ្គិសនី ឬជំនាញផ្សេងទៀតស្ថិតក្នុងវិស័យវិស្វកម្មនោះទេ។ ដូច្នេះ ខ្ញុំចង់ឃើញសិស្សនិស្សិត ចាប់អារម្មណ៍លើជំនាញនេះឱ្យបានច្រើន។

លោក តាំង ថៃស៊ីង និស្សិតកម្ពុជាដែលកំពុងសិក្សាថ្នាក់បណ្ឌិត-អនុបណ្ឌិត (ថ្នាក់ Integrated Master-PhD )ជំនាញ វិស្វកម្មអេឡិចត្រូនិច និងកុំព្យូទ័រ។

យ៉ាងណាក៏ដោយ ការសិក្សាជំនាញនេះ ក៏មានឧបសគ្គមួយចំនួន ដែលយុវជនត្រូវដឹងផងដែរ។ លោក ថែស៊ីង បានលើកឡើងថា ពាក់ពន្ធ័និងការស្រាវជ្រាវ និងស្វ័យសិក្សាទាមទាររយៈពេលយូរ និងការព្យាយាមខ្ពស់។ មួយផ្នែកទៅលើភាសា ទាមរទាការយល់ដឹងផ្នែកភាសាក្នុងការអាន និងសំណេរជាភាសាបរទេសជាដើម។ ដោយឡែកដំណោះស្រាយរួមមាន ការព្យាយាមស្វែងយល់បន្ថែម សិក្សាពីមជ្ឃដ្ឋាន និងរៀមច្បងជុំវិញខ្លួនដោយផ្ទាល់ និងប្រយោល បង្កើនទំនាក់ទំនងល្អៗជាមួយមិត្តរួមក្រុម រួមថ្នាក់ រួមសាលា មានភាពក្លាហានក្នុងការប្រាស្រ័យទាក់ទងសាស្ត្រាចារ្យជំនាញក្នុងការដោះស្រាយនូវចម្ងល់ និងបញ្ហានានាជាដើម៕