វិទ្យាស្ថានបច្ចេកវិទ្យាកម្ពុជា ប្រកាសជ្រើសរើសនិស្សិតចូលសិក្សាថ្នាក់កម្រិតវិស្វករ និងកម្រិតបរិញ្ញាបត្ររងវិស្វកម្ម នៅមណ្ឌល តេជោ ហ៊ុន សែន ចំការដូង (ខេត្តកែប) ជាច្រើននាក់។ ក្នុងនោះវិទ្យាស្ថាននឹងផ្ដល់ឱកាសសិក្សាអាហារូបករណ៍ចំនួន២១០កន្លែង។

អាហារូបករណ៍ផ្ដល់ជូនជំនាញសិក្សាតាមដេប៉ាតឺម៉ង់ និងកម្រិតថ្នាក់សិក្សារួមមានដូចជា ៖ ថ្នាក់កម្រិតវិស្វករ (ប្រឡងជ្រើសរើស) រួមមាន ដេប៉ាតឺម៉ង់ទេពកោសល្យអគ្គិសនី និងថាមពលចំនួន៣០កន្លែង, ដេប៉ាតឺម៉ង់ទេពកោសល្យសំណង់ស៊ីវិលចំនួន៣០កន្លែង និង ដេប៉ាតឺម៉ង់ទេពកោសល្យគីមី និងចំណីអាហារចំនួន៣០កន្លែង។

លក្ខខណ្ឌនៃការជ្រើសរើស ៖ បេក្ខជនទាំងអស់ត្រូវមានសញ្ញាបត្រមធ្យមសិក្សាទុតិយភូមិ ឬសញ្ញាបត្រសមមូល ដោយបេក្ខជនអាចផ្ដល់សញ្ញាបត្រថតចម្លងនៅពេលដាក់ពាក្យចូលរៀន។ ជាមួយគ្នានេះ បេក្ខជននឹងត្រូវឆ្លងកាត់ការប្រឡងជ្រើសរើសលើវិញ្ញាសារជាភាសាខ្មែរចំនួនបីដែលមាន គណិតវិទ្យារយៈពេល២ម៉ោង តក្កវិទ្យារយៈពេល១ម៉ោង រូបវិទ្យា និងគីមីវិទ្យារយៈពេល២ម៉ោង។

ដើម្បីធ្វើការដាក់ពាក្យ បេក្ខជនត្រូវទៅដាក់ពាក្យដោយផ្ទាល់នៅ វិទ្យាស្ថានបច្ចេកវិទ្យាកម្ពុជា មណ្ឌល តេជោ ហ៊ុន សែន ចំការដូង (ខេត្តកែប) ដែលមានទីតាំងស្ថិតនៅ ភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប ចាប់ពីថ្ងៃទី៣០ ខែតុលា ឆ្នាំ២០២៤ ដល់ថ្ងៃតី២៤ ខែវិច្ឆិកា ឆ្នាំ២០២៤ ដោយភ្ជាប់ជាមួយទឹកប្រាក់ចំនួន២ម៉ឺនរៀលដើម្បីបង់សិទ្ធិប្រឡង។

សម្រាប់កម្រិតបរិញ្ញាបត្ររងវិស្វកម្ម អាហារូបករណ៍នឹងផ្ដល់ជូនការសិក្សា ជំនាញវិស្វកម្មដំឡើង និងថែទាំមេកាត្រូនិច ចំនួន៣០កន្លែង ជំនាញវិស្វកម្មគូរប្លង់ និងត្រួតពិនិត្យគ្រឿងបង្គុំសំណង់ស៊ីវិលចំនួន៣០កន្លែង ជំនាញវិស្វកម្មកែច្នៃ និងវិភាគអាហារចំនួន៣០កន្លែង និងជំនាញវិស្វកម្មផ្គត់ផ្គង់ទឹកស្អាត និងបណ្ដាញទឹកក្នុងអគារចំនួន៣០កន្លែង។

លក្ខខណ្ឌនៃការជ្រើសរើស ៖ បេក្ខជនសិក្សាកម្រិតបរិញ្ញាបត្ររងវិស្វកម្ម បេក្ខជនត្រូវមានសញ្ញាបត្រមធ្យមសិក្សាទុតិយភូមិ ឬសញ្ញាបត្របច្ចេកទេស និងវិជ្ជាជីវៈកម្រិត៣ ឬសញ្ញាបត្រសមមូល។

ដើម្បីធ្វើការដាក់ពាក្យ បេក្ខជនត្រូវទៅដាក់ពាក្យដោយផ្ទាល់នៅ វិទ្យាស្ថានបច្ចេកវិទ្យាកម្ពុជា មណ្ឌល តេជោ ហ៊ុន សែន ចំការដូង (ខេត្តកែប) ដែលមានទីតាំងស្ថិតនៅ ភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប ចាប់ពីថ្ងៃ៤ ខែវិច្ឆិកា ឆ្នាំ២០២៤ ដល់ថ្ងៃទី១២ ខែធ្នូ ឆ្នាំ២០២៤។ ជាមួយគ្នានេះ បេក្ខជនស្នើពាក្យចូលរៀនត្រូវភ្ជាប់ជាមួយសំណុំលិខិតសម្រាប់ដាក់ពាក្យដូចជា ពាក្យសុំចុះឈ្មោះ១ច្បាប់, ជីវប្រវត្តិសង្ខេប១ច្បាប់ រូបថត៤x៦ (ថតថ្មី៣សន្លឹក) ច្បាប់ចម្លងសញ្ញាបត្របណ្ដោះអាសន្ន ឬព្រឹត្តិបត្រពិន្ទុដោយមានច្បាប់ដើមបង្ហាញ១ច្បាប់ បង្កាន់ដៃបង់សិទ្ធជ្រើសរើសទឹកប្រាក់១ម៉ឺនរៀល១ច្បាប់។ ចំពោះបេក្ខជនអាទិភាពដែលជាអ្នកក្រីក្រ ឬរស់នៅតំបន់ជួបការលំបាកត្រូវភ្ជាប់សំណុំឯកសារបន្ថែមដូចជា​ពាក្យសុំអាហារូបករណ៍ (មានគំរូ) ១ច្បាប់ សេចក្ដីបញ្ជាក់ពីភាពក្រីក្រ ឬពីការស្នាក់នៅតំបន់ជួបការលំបាកពីថ្នាក់ឃុំ/សង្កាត់១ច្បាប់ និងច្បាប់ថតចម្លងប័ណ្ណគ្រួសារដោយមានច្បាប់ដើមបង្ហាញ១ច្បាប់។

សម្រាប់ព័ត៌មានបន្ថែមអាចទៅកាន់វិទ្យាស្ថានផ្ទាល់ដើម្បីសាកសួរព័ត៌មានចាប់ពីថ្ងៃផ្សាយដំណឹងតទៅ៕