ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឱកាសផ្លាស់ប្ដូរបទពិសោធន៍ការបង្រៀនសម្រាប់គ្រូកម្ពុជា ទៅបង្រៀននៅសាធារណរដ្ឋកូរ៉េចំនួន៨៩ថ្ងៃ ក្រោមការសហការរបស់ ក្រសួងអប់រំ យុវជន និងកីឡា និង អង្គការអាស៊ី-ប៉ាស៊ីហ្វិក នៃការអប់រំសម្រាប់ការយល់ដឹងសកល នៃសាធារណរដ្ឋកូរ៉េ។ ការជ្រើសរើសធ្វើឡើង តាមរយៈកម្មវិធីផ្លាស់ប្ដូរគ្រូបង្រៀនអន្តរជាតិ កូរ៉េ-កម្ពុជា ឆ្នាំ២០២៥។
កម្មវិធីផ្លាស់ប្ដូរការបង្រៀននឹងជ្រើសរើស គ្រូបង្រៀនកម្រិតបឋមសិក្សា០២រូប គ្រូបង្រៀនមធ្យមសិក្សាបឋមភូមិ០២រូប គ្រូបង្រៀនមធ្យមសិក្សាទុតិយភូមិ០២រូប គ្រូឧទ្ទេសនៅវិទ្យាស្ថានគរុកោសល្យរាជធានីភ្នំពេញ០១រូប និង គ្រូឧទ្ទេសនៅវិទ្យាស្ថានគរុកោសល្យបាត់ដំបង០១រូប។
លក្ខខណ្ឌនៃការជ្រើសរើស ៖ បេក្ខជនទាំងពីរភេទត្រូវមានលក្ខណៈសម្បតិ្ត ជាគ្រូបង្រៀននៅតាមគ្រឹះស្ថានសិក្សាសាធារណៈ និងជាគ្រូឧទ្ទេសនៅវិទ្យាស្ថានគរុកោសល្យរាជធានីភ្នំពេញ និងបាត់ដំបង, មានសញ្ញាបត្រចាប់ពីកម្រិតបរិញ្ញាបត្រឡើងទៅ, មានបទពិសោធជាគ្រូបង្រៀន ឬជាគ្រូឧទ្ទេសយ៉ាងតិច២ឆ្នាំ, មានចំណេះដឹងភាសាអង់គ្លេសអាចប្រើប្រាស់បាន, អាចប្រើប្រាស់កម្មវិធីកុំព្យូទ័រ Microsoft Office ឬកម្មវិធីពាក់ព័ន្ធផ្សេងទៀតសម្រាប់គាំទ្រកិច្ចការបង្រៀន។ លើសពីនេះ ជាបុគ្គលដែលមានមនសិកាវិជ្ជាជីវៈ និងប្ដេជ្ញាចិត្តខ្ពស់ក្នុងការបំពេញការងារនៅប្រទេសកូរ៉េ មានបុគ្គលិកលក្ខណៈ និងក្រមសីលធម៌ល្អ អាចធ្វើការងារជាបុគ្គល និងជាក្រុម និងមានសុខភាពល្អ កាយសម្បទារឹងមាំ។
បេក្ខជន បេក្ខនារី ដែលមានចំណាប់អារម្មណ៍ក្នុងការដាក់ពាក្យ ត្រូវបំពេញពាក្យសុំចុះឈ្មោះ និងភ្ជាប់ជាមួយឯកសារពាក់ព័ន្ធរួមមាន ប្រវត្តិរូបជាភាសាអង់គ្លេស០១ច្បាប់ កម្រិតសញ្ញាបត្រដែលមានការបញ្ជាក់ដោយអាជ្ញាធរមានសមត្ថកិច្ច០១ច្បាប់ វិញ្ញាបនបត្រផ្សេងៗ០១ច្បាប់(បើមាន) និង រូបថត៤x៦ ភ្ជាប់ជាមួយប្រវត្តិរូប ០១សន្លឹក ដោយបញ្ជូនទៅកាន់លោក ភា នូមាន្ត មន្ត្រីលេខាធិការដ្ឋាន នៃអគ្គនាយកដ្ឋានអប់រំ តាមរយៈលេខទូរស័ព្ទ ឬ តេលេក្រាម ០១០ ៦០០ ២៩០ ឱ្យបានមុនថ្ងៃទី២៨ ខែកុម្ភៈ ឆ្នាំ២០២៥។
រាល់សំណុំឯកសាររបស់បេក្ខជន បេក្ខនារី នឹងត្រូវពិនិត្យ ដើម្បីជ្រើសរើសបេក្ខជន បេក្ខនារីដែលមានលក្ខណៈសម្បត្តិគ្រប់គ្រាន់តាមការធ្វើជម្រើសដំបូង (Shortlists)។ ចំពោះបេក្ខជន បេក្ខនារី ដែលជាប់ការធ្វើជម្រើសដំបូង ក្រសួងនឹងបន្តនីតិវិធីវាយតម្លៃ ធ្វើការសម្ភាសន៍ និងការធ្វើតេស្តប្រើកុំព្យូទ័រ ដោយគណៈកម្មការដឹកនាំ ជ្រើសរើស និងសម្របសម្រួល កម្មវិធីការផ្លាស់ប្ដូរគ្រូបង្រៀនអន្តរជាតិ កូរ៉េ-កម្ពុជា ឆ្នាំ២០២៥៕
