ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីគាំទ្រ និងបន្តលើកស្ទួយវិស័យអប់រំ សម្ដេចអគ្គមហាសេនាបតីតេជោ ហ៊ុន សែន និងសម្តេចគតិព្រឹទ្ធបណ្ឌិត ផ្ដល់អាហារូបករណ៍ថ្នាក់បរិញ្ញាបត្រចំនួន៦០កន្លែង សិក្សានៅសាកលវិទ្យាល័យភូមិន្ទវិចិត្រសិល្បៈ សម្រាប់សិក្សា២០២៤-២០២៥។ អាហារូបករណ៍ផ្ដល់ជូនតាមរយៈសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដែលផ្ដល់ជូនលើការសិក្សាជំនាញផ្សេងៗគ្នា។
អាហារូបករណ៍ផ្ដល់ជូនជំនាញសិក្សាសម្រាប់មហាវិទ្យាល័យស្ថាបត្យកម្ម និងនគរោបនីយវិទ្យា ១០កន្លែង នៅមហាវិទ្យាល័យសិល្បៈសូនរូប (ជំនាញតុបតែងលម្អ នៃស្ថាបត្យកម្ម៥កន្លែង និងជំនាញគំនូរ សាគមនាគមន៍៥កន្លែង) និងមហាវិទ្យាល័យតូរ្យតន្រ្តី ១០កន្លែង ដោយការដាក់ពាក្យសិក្សានៅមហាវិទ្យាទាំង៣នេះបេក្ខជនត្រូវឆ្លងកាត់ការប្រឡង។ លើសពីនេះ អាហារូបករណ៍ផ្ដល់ជូនការសិក្សា៣០កន្លែងសម្រាប់ការមិនឆ្លងកាត់ការប្រឡងនៅមហាវិទ្យាល័យសិល្បៈសូនរូប ១០កន្លែង (ជំនាញវិចិត្រកម្ម ៥កន្លែង និងចម្លាក់ ៥កន្លែង) នៅមហាវិទ្យាល័យបុរាណវិទ្យា១០កន្លែង និងនៅមហាវិទ្យាល័យសិល្បៈនាដសាស្ត្រ ឯកទេសតែងនិពន្ធ១០កន្លែង។
ដើម្បីធ្វើការដាក់ពាក្យស្នើសុំ នៅដំណាក់កាលទីមួយ ចំពោះជំនាញឆ្លងកាត់ការប្រឡង បេក្ខជនអាចត្រូវដាក់ពាក្យប្រឡងនៅសាកលវិទ្យាល័យផ្ទាល់ និងអនុលោមតាមនីតិវិធីរបស់សាកលវិទ្យាល័យ។ ចំពោះជំនាញមិនឆ្លងកាត់ការប្រឡង បេក្ខជនពុំទាន់តម្រូវឱ្យដាក់ពាក្យនៅសាកលវិទ្យាល័យទេ ដូចនេះបេក្ខជនត្រូវដាក់ពាក្យស្នើសុំនៅដំណាក់កាលទី២តែម្ដង។ ដំណាក់កាលទីពីរ បេក្ខជនត្រូវដាក់ពាក្យស្នើសុំប្រឡងជាមួយគណៈកម្មាធិការអាហារូបករណ៍ដោយបំពេញព័ត៌មានអនឡាញតាមរយៈ https://reg.amt.live/web/signup និងភ្ជាប់ឯកសារតម្រូវការដាក់ពាក្យមួយចំនួន។ ឯកសារភ្ជាប់មានដូចជា វិញ្ញាបនបត្របណ្ដោះអាសន្នមធ្យមសិក្សាទុតិយភូមិ (ត្រូវមានការបញ្ជាក់ទទួលស្គាល់ជាផ្លូវការ) ឬបញ្ជីរាយនាមបេក្ខជនប្រឡងជាប់សញ្ញាបត្រមធ្យមសិក្សាទុតិយភូមិ (មានលំដាប់ពិន្ទុ) ១ច្បាប់, ច្បាប់ថតចម្លងអត្តសញ្ញាណប័ណ្ណសញ្ជាតិខ្មែរ ឬសេចក្ដីថតចម្លងសំបុត្របញ្ជាក់កំណើត១ច្បាប់ និងច្បាប់ថតចម្លងសលាកបត្រឯកត្តជន ឬបង្កាន់ដៃទទួលពាក្យប្រឡងចេញដោយសាកលវិទ្យាល័យ (ចំពោះជំនាញឆ្លងកាត់ការប្រឡង) ១ច្បាប់។
សម្រាប់ព័ត៌មានបន្ថែមទាក់ទងនឹងព័ត៌មានសិក្សាអាចទាក់ទងទៅកាន់គ្រឹះស្ថានសាកលវិទ្យាល័យដោយផ្ទាល់ដែលមានទីតាំងនៅ អគារ “ខ” មហាវិថីវិចិត្រសិល្បៈ ភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។ សម្រាប់ព័ត៌មានបន្ថែមទាក់ទងនឹងអាហារូបករណ៍ អាចទំនាក់ទំនងទៅកាន់ការិយាល័យអាហារូបករណ៍ នៅផ្ទះលេខ៤ ផ្លូវ៥២២ សង្កាត់បឹងកក់១ ខណ្ឌទួលគោក រាជធានីភ្នំពេញ នៅរៀងរាល់ថ្ងៃចន្ទ-សុក្រ វេលាម៉ោង ៨ព្រឹក-៥ល្ងាច ឬស្កេនចូលតេលេក្រាម (AMT-RUFA-2024) តាមរយៈ QR Code ខាងក្រោម។
ចាប់ទទួលពាក្យពីថ្ងៃផ្សាយដំណឹងរហូតដល់ថ្ងៃទី១២ ខែវិច្ឆិកា ឆ្នាំ២០២៤៕
