ស្ថិតក្នុងបរិបទពិភពលោកដែលពោរពេញទៅដោយការប្រកួតប្រជែងសម្បូរបែប ភាពមមាញឹកក៏កាន់តែមានច្រើនឡើងៗ ហើយមនុស្សចូលចិត្តធ្វើអ្វីមួយក្នុងល្បឿនលឿនៗ ដែលជាកត្តាជំរុញឱ្យពួកគេប្រឈម ឬពិបាកក្នុងការរក្សាចិត្តឱ្យបានស្ងប់នឹងនរ ។ ការធ្វើឱ្យមានទម្លាប់សមាធិ រាប់បញ្ចូលទៅក្នុងទម្លាប់ប្រចាំថ្ងៃ គឺជាការរក្សានូវអារម្មណ៍ល្អៗ និងបង្កើនផ្នត់គំនិតវិជ្ជមានសម្រាប់ពេលអនាគត។ តាមរយៈគេហទំព័រ Indiatimes  បានបង្ហាញពីគុណតម្លៃនៃការធ្វើសមាធិនៅពេលព្រឹកបានទៀងទាត់ ដើម្បីជាការដាស់ស្មារតីឱ្យចាប់អារម្មណ៍នឹងសុខភាពផ្លូវចិត្ត ឬការហាត់ពត់លត់ដំចិត្តឱ្យមានធាតុត្រជាក់ជាងមុន។

១. ចាប់ផ្តើមដោយការតាំងចិត្ត ៖  ការចាប់ផ្តើមជាមួយនឹងថ្ងៃថ្មី ដោយមានទិសដៅជាក់លាក់ក្នុងការតាំងសមាធិ គឺជាធ្លុងមួយក្នុងការបណ្តុះ ឬផ្តួចផ្តើមឱ្យមានផ្នត់គំនិតវិជ្ជមាន និងមានស្មារតីភាវនា ការរំពឹងស្មឹងស្មាធិ៍ បង្កើនការផ្តោត ទទួលបានសេចក្ដីសុខចេញពីចិត្តខាងក្នុង ដែលគុណសម្បត្តិទាំងនេះហើយជាការរួមចំណែកបណ្តុះទម្លាប់ឱ្យចេះសមាធិ និងយល់និយមន័យនៃគោលបំណងក្នុងការរស់នៅ។

២. រក្សាទីតាំងមួយដែលមានលក្ខណៈស្ងប់ស្ងាត់ ៖ ស្វែងរក ឬក៏បង្កើតទីតាំងមួយដែលមានបរិយាកាសស្ងាត់ មានផាសុកភាព ជារួមគឺជាកន្លែងដែលអាចសមាធិដោយមិនមានការរំខានពីបរិយាកាសខាងក្រៅ។ ប្រើប្រាស់បន្ទប់គេង បន្ទប់ទទួលភ្ញៀវ ឬក៏កន្លែងណាមួយដែលស្ងាត់ និងសុវត្ថិភាពក៏អាចជាទីតាំងដ៏ល្អក្នុងការអនុវត្ត។ បរិយាកាសមានផាសុកភាពធានា និងជំរុញឱ្យអារម្មណ៍ស្រស់ស្រាយ រួមទាំងភាពស្ងប់ស្ងាត់។

៣. កំណត់ឱ្យជាក់លាក់ ៖ ទោះបីជាជ្រើសយកពេលព្រឹកដើម្បីធ្វើសមាធិជាប្រចាំក៏ដោយ គឺត្រូវមានការកំណត់ម៉ោងឱ្យមានភាពជាក់លាក់មួយ ដើម្បីពង្រឹងគោលជំហរក្នុងការអនុវត្តន៍ឱ្យបានខ្ជាប់ខ្ជួន។ ជ្រើសពេលឱ្យជាក់លាក់មិនថា ក្រោយពេលក្រោកពីគេង ក្រោយពេលទទួលទានអាហារពេលព្រឹក ឬក៏បន្ទាប់ពីទទួលទានកាហ្វេនិងតែ អ្វីដែលសំខាន់អនុវត្តឱ្យបានរាល់ថ្ងៃ ពីព្រោះថាភាពទៀងទាត់គឺជាកូនសោដ៏សំខាន់។ មួយវិញទៀត កាលដែលមានកាលវិភាគសមាធិ ជាចំណែកនៃការរក្សាទម្លាប់ រួមទាំងផ្តល់ភាពងាយស្រួលក្នុងការចាត់បញ្ចូលទម្លាប់សមាធិទៅក្នុងជីវិតប្រចាំថ្ងៃ។

៤. ចាប់ផ្តើមពីចំណុចតូចៗ ៖ ក្នុងករណី លោកអ្នកមិនធ្លាប់មានបទពិសោធទាល់តែសោះទាក់ទិនអំពីការសមាធិ ជាដំបូងគ្រាន់តែសមាធិក្នុងរយៈពេលខ្លីៗ ពីរទៅបីនាទីក៏បាន ហើយពេលក្រោយៗមកអាច​បន្ថែមរយៈពេលបន្តិចម្តងៗ ហើយយូរៗទៅវានឹងក្លាយទៅជាទម្លាប់ និងបង្កើតឱ្យមានផាសុកភាពបន្ថែមឡើងៗ។ សូមបញ្ជាក់ជូនថា សូម្បីតែប្រើពេលត្រឹមតែប្រាំនាទីក្នុងមួយពេល ក៏ជាការចូលរួមចំណែកយ៉ាងសំខាន់ទៅកាន់ការផ្ទៀងផ្ទាត់ស្មារតី ការផ្ចង់អារ្មណ៍ និងសុខុមាលភាពទូទៅ។

៥. ផ្តោតលើផ្លូវដង្ហើម ៖ ដើម្បីបណ្តុះទម្លាប់សមាធិប្រចាំថ្ងៃ មានបច្ចេកទេសមួយដែលសាមញ្ញនិងមានប្រសិទ្ធភាពនោះ គឺ ផ្តោតតែទៅលើផ្លូវដង្ហើមចេញចូលប៉ុណ្ណោះកំឡុងអនុវត្តការសមាធិ។ ដោយចាប់ផ្តើមរកកន្លែងអង្គុយឱ្យស្រួលខ្លួននិងមានផាសុកភាព បន្ទាប់មកបិទភ្នែកយឺតៗ រួចហើយដកដង្ហើមឱ្យវែងៗមួយៗ និងកត់សម្គាល់អំពីអារម្មណ៍ដែលទទួលបានពេលកំពុងតែដកដង្ហើម។ ហើយនៅពេលស្មារតីហាក់បាត់បង់ការផ្តោត ត្រូវទាញត្រឡប់មកវិញភ្លាមៗ។

៦. ដើរតាមវិធីណែនាំ ៖ ក្នុងករណីដែលមានបញ្ហាប្រឈម ឬពិបាកសមាធិដោយខ្លួនឯង អ្វីដែលគួរតែប្រតិបត្តិក្នុងស្ថានភាពនេះ គឺ រកជំនួយពីខាងក្រៅ ប្រឹក្សាជាមួយអ្នកជំនាញ សិក្សាតាមអនឡាញ និងប្រើប្រាស់កម្មវិធីឌីជីថលដើម្បីត្រួសត្រាយផ្លូវជាដើម។ សូមប្រើប្រាស់តែការណែនាំណា ដែលផ្តល់ភាពងាយស្រួលជាងគេ ឬឆ្លើយតបនឹងស្ថានភាពជាក់ស្ដែង៕