ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – “នាងខ្ញុំពិតជារំភើបរីករាយជាខ្លាំង ដែលប្រកួតឈ្នះម្ចាស់ផ្ទះហ្វីលីពីន ហើយដណ្តើមបានមេដាយមាសយកទៅជូនជាតិនាពេលនេះ។ មេដាយមាសនេះខ្ញុំជូនដល់ប្រជាពលរដ្ឋទូទាំងប្រទេសជាង១៦លាននាក់។” នេះជាការលើកឡើងរបស់ កីឡាការិនី ស៊ន សៀវម៉ី អត្តពលិកកម្ពុជា ក្រោយទទួលបានមេដាយមាស លើវិញ្ញាសាតេក្វាន់ដូ ក្នុងប្រភេទទម្ងន់ ៧៣គីឡូក្រាម នៃព្រឹត្តិការណ៍ស៊ីហ្គេមឆ្នាំ២០២៣ កាលពីល្ងាចថ្ងៃទី១៤ ខែឧសភា ឆ្នាំ២០២៣កន្លងទៅ។
កីឡាការិនី តេក្វាន់ដូ ស៊ន សៀវម៉ី បានខិតខំហ្វឹកហាត់ និងប្ដេជ្ញាចិត្តដណ្ដើមមេដាយមាសជូនជាតិ នៅក្នុងព្រឹត្តិការណ៍ Sea Games លើកទី៣២ ដែលកម្ពុជាធ្វើជាម្ចាស់ផ្ទះ ហើយនេះក៏ជាមេដាយមាសជូនជាតិជាលើកចុងក្រោយផងដែរ នៅក្នុងអាជីពកីឡារបស់ខ្លួន។
កីឡាការិនី ស៊ន សៀវម៉ី និយាយថា រូបខ្លួនផ្ទាល់មានភាពសប្បាយចិត្តខ្លាំងដែលអាចដណ្ដើមមេដាយមាសជូនប្រទេសជាតិបាន។ សៀវម៉ី បន្តថា ទោះបីខកខានការប្រកួតរយៈពេល៤ឆ្នាំ តែការត្រឡប់មកប្រកួតជាថ្មីក្នុងឆ្នាំ២០២៣នេះ ខ្លួនដឹងពីចំនុចខ្សោយរបស់ខ្លួនឯងយ៉ាងច្បាស់ និងខិតខំយកចិត្តទុកដាក់ហ្វឹកហាត់ ដើម្បីធ្វើយ៉ាងណាឱ្យបច្ចេកទេស និងកម្លាំងរបស់ខ្លួនអាចវាយលុក ដើម្បីយកឈ្នះគូរប្រកួតប្រជែង។
កីឡាការិនី ស៊ន សៀវម៉ី
“ខ្ញុំធ្លាប់មានបញ្ហាជង្គង់ ហើយក៏បារម្ភអំពីគូរប្រកួតដែរ ប៉ុន្តែមានលោកគ្រូណែនាំបានល្អ ប្រាប់ពីតិចនិក ធ្វើឱ្យខ្ញុំអាចយកឈ្នះលើគូរប្រកួតប្រជែងបាន”
កីឡាការិនី ស៊ន សៀវម៉ី បញ្ជាក់បន្ថែមថា កម្លាំងចិត្តជម្រុញឱ្យរូបនាងមានចិត្តចង់ឈ្នះមោះមុតបែបនេះ ដោយសារកូនស្រីរបស់អ្នកនាងផ្ទាល់ ។ លើសពីនេះ នាងចង់ទុកអនុស្សាវរីយ៍ ការចងចាំល្អៗ កេរ្តិ៍ឈ្មោះ ដល់កូនស្រីជាទីស្រលាញ់នៅពេលធំឡើង។
ស៊ន សៀវម៉ី ក៏បានអរគុណដល់រាជរដ្ឋាភិបាលកម្ពុជាដែលបានរៀបចំព្រឹត្តិការណ៍ស៊ីហ្គេមនេះឡើង ដែលអាចផ្ដល់ឱកាសដល់រូបនាងបានបង្ហាញខ្លួន និងដណ្ដើមមេដាយមាសជូនជាតិ ក្នុងនាមជាម្ចាស់ផ្ទះ ។
គួរជម្រាបថា កីឡាការិនី ស៊ន សៀវម៉ី គឺជាកីឡាការនីជម្រើសជាតិកម្ពុជា ផ្នែកវិញ្ញាសាតៃក្វាន់ដូ ដែលទទួលបានមេដាយជាច្រើន ក្នុងនោះ រូបនាងធ្លាប់ទទួលបានមេដាយសំរឹទ្ធ ពីការប្រកួតកីឡាអាស៊ីអាគ្នេយ៍ ឆ្នាំ២០១១ នៅប្រទេសឥណ្ឌូនេស៊ី និងមេដាយមាស នៅឆ្នាំ២០១៣ ក្នុងការប្រកួតនៅប្រទេសភូមា, មេដាយមាសក្នុងព្រឹត្តិការណ៍កីឡាអាស៊ីឆ្នាំ២០១៤ នៅទីក្រុងអ៊ីនឆុន សាធារណរដ្ឋកូរ៉េ, មេដាយមាសក្នុងការប្រកួតជម្រុះកីឡាតៃក្វាន់ដូដែលធ្វើឡើងនៅខែមេសា ឆ្នាំ២០១៦ នៅប្រទេសហ្វីលីពីន, មេដាយប្រាក់ក្នុងការប្រកួតកីឡាតៃក្វាន់ដូទ្វីបអាស៊ី ដែលប្រារព្ធធ្វើឡើងនៅ ខែមេសា ឆ្នាំ២០១៦ ប្រទេសហ្វីលីពីន ។ ហើយថ្មីៗនេះ សៀវម៉ី ក៏ជាម្ចាស់មដាយមាសតៃក្វាន់ដូ ក្នុងព្រឹត្តិការណ៍កីឡាស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះផងដែរ ៕
