តាមការស្រាវជ្រាវជាច្រើនបានបង្ហាញថា បច្ចេកវិទ្យា និងព័ត៌មានច្រើនលើសលប់ (information overload) អាចប៉ះពាល់ដល់ស្មារតី និងបញ្ញាផ្នែកអារម្មណ៍ (EQ) ដែលជាសមត្ថភាពក្នុងការយល់ដឹង និងគ្រប់គ្រងខ្លួនឯង និងអ្នកដទៃ។ នៅពេលដែលអ្នកត្រូវបានរំខានដោយសំឡេងអ៊ីម៉ែល សំឡេងជូនដំណឹង (notification) សារ ព័ត៌មាន និងទិន្នន័យ ជាប្រចាំ អ្នកអាចនឹងមានអារម្មណ៍ធុញថប់ តានតឹង ត្រូវបានរំខាន និងមួរម៉ៅ។ អារម្មណ៍ទាំងនេះ អាចធ្វើឱ្យអ្នកបាត់បង់ការផ្ដោតអារម្មណ៍ ផលិតភាពការងារ គំនិតច្នៃប្រឌិត ការប្រាស្រ័យទាក់ទងប្រកបដោយប្រសិទ្ធភាព និងសមត្ថភាពសម្រេចចិត្តបានត្រឹមត្រូវជាដើម។

ដើម្បីទប់ទល់នឹងនឹងបច្ចេកវិទ្យា និងព័ត៌មានច្រើនលើសលប់ នៅក្នុងសម័យឌីជីថលនេះ អ្នកអាចអនុវត្តបច្ចេកទេសចំនួន ៤ ដើម្បីជួយឱ្យអ្នកគ្រប់គ្រង រក្សាតុល្យភាព និងស្ដារភាពច្បាស់លាស់ផ្នែកអារម្មណ៍របស់អ្នកឡើងវិញ។

១. កំណត់ដែនកំណត់ និងអាទិភាព ៖ ជំហានដំបូងក្នុងការគ្រប់គ្រងព័ត៌មានច្រើនលើសលប់ អ្នកត្រូវកំណត់ដែនកំណត់ និងអាទិភាពសម្រាប់ខ្លួនឯងឱ្យបានច្បាស់។ ចំណុចនេះ មានន័យថា អ្នកត្រូវសម្រេចចិត្តថា ពេលណា កន្លែងណា និងហេតុអ្វី បានជាអ្នកត្រូវតាមដានព័ត៌មានទាំងនោះ, តើអ្នកអាចប្រើវា ដើម្បីទាញប្រយោជន៍ ឬទំនាក់ទំនងជាមួយមិត្តរួមការងារ អតិថិជន គ្រួសារ និងមិត្តភក្តិរបស់អ្នកបានដែរទេ។ ឧទាហរណ៍ អ្នកអាចកំណត់ពេល ដើម្បីពិនិត្យមើលអ៊ីម៉ែល, បិទសំឡេងការជូនដំណឹងដែលមិនសំខាន់, ប្លុកកម្មវិធី ឬគេហទំព័រដែលរំខាន និងប្រើប្រតិទិន និងបញ្ជីកិច្ចការដែលត្រូវធ្វើ ដើម្បីរៀបចំការងារ និងគោលដៅរបស់អ្នក។ ការអនុវត្តវិធីសាស្ត្រនេះ អាចកាត់បន្ថយព័ត៌មានដែលមិនពាក់ព័ន្ធនឹងអ្នក ឬការទទួលបានព័ត៌មានដដែលៗ ព្រមទាំងជួយឱ្យអ្នកផ្ដោតអារម្មណ៍បានល្អ។

២. សម្រាក និងបង្កើនថាមពលឡើងវិញ ៖ បច្ចេកទេសមួយទៀត គឺត្រូវសម្រាកឱ្យបានទៀងទាត់, រកពេលបញ្ចូលថាមពលឱ្យខ្លួនឯង និងយកចិត្តទុកដាក់ថែសុខុមាលភាពខ្លួនឯង។ ត្រង់ចំណុចនេះ អ្នកត្រូវមានពេល ដើម្បីផ្ដាច់ខ្លួនចេញពីឧបករណ៍អេឡិចត្រូនិច និងអេក្រង់ ហើយធ្វើសកម្មភាពណាមួយ ដែលធ្វើឱ្យអ្នកមានអារម្មណ៍ថា សម្រាក និងស្រស់ស្រាយ។ ឧទាហរណ៍ ដូចជា ការចំណាយពេលដើរ សម្មាធិ អានសៀវភៅ ស្ដាប់ចម្រៀង លេងហ្គេម ឬជជែកជាមួយមិត្តភក្ដិ។ តាមរយៈការសម្រាក និងបញ្ចូលថាមពលឱ្យខ្លួនឯង អ្នកអាចការពារខ្លួនពីបញ្ហា Burn out, អស់កម្លាំង អារម្មណ៍អផ្សុក បង្កើនភាពច្នៃប្រឌិត និងធ្វើឱ្យសុខុមាលភាពប្រសើរឡើង។

៣. ផ្ដោតលើគុណភាព និងភាពសម្បូរបែប ៖ ចំណុចសំខាន់មួយទៀត ដើម្បីគ្រប់គ្រងព័ត៌មានលើសលប់ គឺត្រូវផ្ដោតលើគុណភាព និងភាពសម្បូរបែបនៃព័ត៌មាន ដែលអ្នកទទួលបាន។ ក្នុងន័យនេះ ចង់បញ្ជាក់ថា ការជ្រើសរើសប្រភព និងបណ្ដាញព័ត៌មាន ដែលគួរឱ្យទុកចិត្ត ពាក់ព័ន្ធនឹងអ្នក និងត្រឹមត្រូវ ហើយជៀសវាងព័ត៌មានភាពលម្អៀង ព័ត៌មានបំភ័ន ឬមិនពិត ។ លើសពីនេះ អ្នកក៏អាចស្ដាប់ ឬអានឱ្យបានច្រើនជ្រុងនៃទស្សនៈ ដើម្បីបង្កើនចំណេះដឹង និងការយល់ដឹង។

៤. ឆ្លុះបញ្ចាំង និងរៀនពីព័ត៌មាន ៖ ត្រង់ចំណុចនេះ មានន័យថា អ្នកត្រូវចំណាយពេលត្រួតពិនិត្យ វាយតម្លៃ និងទាញយកចំណុចល្អៗនៃព័ត៌មានដែលអ្នកបានតាមដាន មកប្រើប្រាស់។ ការធ្វើបែបនេះ អាចជួយឱ្យអ្នកកំណត់ភាពខ្លាំង និងចំណុចខ្សោយ ចន្លោះប្រហោង និងឱកាសដែលអ្នកទទួលបានពីព័ត៌មាននោះ។ ឧទាហរណ៍ អ្នកអាចកត់ត្រា និងរក្សាទុក កំណត់ហេតុ ប្លក់ ឬក៏ទិន្នន័យសំខាន់ៗនៃព័ត៌មាន ដែលអ្នកបានស្ដាប់ ដើម្បីឆ្លុះបញ្ចាំង និងរៀនសូត្រ អំពីព័ត៌មានដែលអ្នកបានដឹង។ ការអនុវត្តបែបនេះ នឹងជួយឱ្យអ្នកកំណត់បានថា​ ព័ត៌មាននោះមានឥទ្ធិពលបែបណាមកលើការគិត ទំនុកចិត្ត និងសមត្ថភាពរបស់អ្នក៕