Valentine’s Day ឬ​ថ្ងៃនៃ​សេចក្តី​ស្រឡាញ់ ត្រូវ​បាន​គេ​ប្រារព្ធ​ឡើង​នៅ​ថ្ងៃ​ទី​១៤ ខែកុម្ភៈ ។ បុណ្យ​នេះ ​គឺជា​ថ្ងៃ​ដែល​បញ្ជាក់​អំពី​សេចក្ដី​ស្រឡាញ់​ជា​ទូទៅ ដោយ​មិន​ចាំបាច់​សម្រា​ប់​តែ​គូស្នេហ៍នោះ​ទេ។ ប៉ុន្ដែថ្ងៃ​បុណ្យ​នៃ​សេចក្ដី​ស្រ​ឡា​ញ់ មានគេ​យល់​ច្រ​ឡំដោយ​គិត​ថា​ថ្ងៃ​បុណ្យ​នេះ​សម្រាប់​តែ​គូស្នេហ៍ ជា​ពិសេស​ក្នុង​ចំណោ​ម​យុវវ័យ​ក្មេង​ៗ ទើប​​ពួក​គេ​ហៅ​ម៉្យាងទៀតថា ​ថ្ងៃ​បុណ្យ​សង្សារ ។

លោកបណ្ឌិត ឈត ប៊ុនថង មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ​ និងទេសចរណ៍ នៃរាជបណ្ឌិត្យសភា​កម្ពុជា មានប្រសាសន៍ថា Valentine’s Day ឬ​ថ្ងៃនៃ​សេចក្តី​ស្រឡាញ់ ធ្វើឡើងដើម្បីរំលឹកគុណដល់លោក វ៉ាឡេនថាញន៍ (Valentine) បុព្វជិតគ្រិស្តសាសនា ដែលបានលះបង់ជីវិត ដើម្បីប្រឆាំងនឹងការគាបសង្កត់ផ្សេងៗ ។ ដូច្នេះ សូមយុវជនជំនាន់ក្រោយនៅកម្ពុជា កុំយល់ថាបុណ្យនោះជាបុណ្យសង្សារ​ដែលត្រូវប្រគល់ខ្លួនប្រាណ​ឱ្យគូស្នេហ៍របស់ខ្លួន។

លោកបណ្ឌិត ឈត ប៊ុនថង បន្តថា ប្រវត្តិដែលនាំឱ្យមាន Valentine’s Day ឬ​ថ្ងៃនៃ​សេចក្តី​ស្រឡាញ់ ដើមឡើយ លោក វ៉ាឡេនថាញន៍ (Valentine) ជាបុព្វជិតគ្រិស្តសាសនា​បាន​រៀប​ការឱ្យយុវជនជាទាហានដែល​ច្បាប់​មិន​អនុញ្ញាត គេក៏យកគាត់ទៅប្រហារជីវិត ។ មានរឿងមួយទៀត លោក Valentine បាន​រៀប​ការ​ឱ្យ​ផ្កា​ជា​ច្រើន​គូ​នៅ​ក្នុង​សួនច្បារ​របស់​គាត់ ​​ធ្វើ​ឱ្យ​ព្រះ​ចៅ​អធិរាជមិន​ពេញចិត្ត​ គេក៏យកគាត់ទៅប្រហារជីវិត ។

មន្រ្តីស្រាវជ្រាវ និងអ្នកជំនាញទស្សនវិជ្ជានៃរាជ្យបណ្ឌិត្យសភាកម្ពុជា បញ្ជាក់បន្ថែមថា គុណបំណាច់របស់ លោក Valentine បានធ្វើ​​​​ឱ្យយុវជនជំនាន់ក្រោយដែលជាគ្រិស្តសាសនិកយកផ្កាទៅដាក់លើផ្នូររបស់គាត់ តែងតែរំលឹកដល់ស្មារតីថ្ងៃនៃសេចក្ដីស្រឡាញ់ ឬថ្ងៃ១៤ កុម្ភៈ ជារៀងរាល់ឆ្នាំ។ នៅ​ថ្ងៃ​បុណ្យ​នេះ គេ​និយម​ជូន​ផ្កា​កុលាប ឬ​សរសេរពាក្យ​ជូនពរ​ឱ្យគ្នា​ទៅ​វិញ​ទៅ​មក ។

លោកបណ្ឌិត ឈត ប៊ុនថង បន្ថែមថា Valentine’s Day ឬថ្ងៃនៃសេចក្ដីស្រឡាញ់ ជាប្រភេទបុណ្យប្រពៃណីរបស់ជនជាតិអ៉ឺរ៉ុបដែលពាក់ព័ន្ធជាមួយជាមួយគ្រិស្ដសាសនា ដូច្នេះ យុវជនកុំបកស្រាយថា ថ្ងៃនៃសេចក្ដីស្រឡាញ់នេះ ជាបុណ្យសកល ដូចជាទិវាសិ្ធទ្ធិមនុស្សអន្តរជាតិ ទិវានារីអន្តរជាតិ ទិវាលកម្មអន្តរជាតិ ទិវាកុមារអន្តរជាតិ ជាដើម ដែលជាថ្ងៃបុណ្យដែលពិភពលោកយកជាថ្ងៃសម្រាក ហើយដើម្បីរំលឹកគុណទៅដល់ស្មារតីបុណ្យជារៀងរាល់ឆ្នាំ។

បើតាម លោកបណ្ឌិត ឈត ប៊ុនថង យុវជនត្រូវយល់ឱ្យច្បាស់ថា បុណ្យណាជាបុណ្យរបស់ខ្លួន បុណ្យណាជាបុណ្យជាតិ ហើយបុណ្យណាជាបុណ្យអន្តរជាតិ ជៀសវាងកុំឱ្យបកស្រាយច្រឡំបុណ្យមួយជាបុណ្យប្រពៃណីបរទេស ប៉ុន្តែយល់ថាជាបុណ្យសកល ឬបុណ្យអន្តរជាតិ ហើយក៏យល់ច្រឡំថាជាបុណ្យរបស់ខ្មែរទៅទៀត៕