ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តាមរយៈបទពិសោធន៍ក្នុងការសិក្សាពីកម្មវិធីផ្លាស់ប្ដូរការសិក្សានៅក្រៅប្រទេស លោក ភាព សុភ័ក ចែករំលែកគន្លឹះ៦ចំណុចសម្រាប់អ្នកដែលចង់ដាក់ពាក្យទៅក្រៅប្រទេស។
គន្លឹះខ្លះៗទាំងនោះរួមមាន ទីមួយស្វែងយល់ពីកម្មវិធីដែលអ្នកចង់ដាក់ពាក្យ ទីពីរពង្រឹងភាសាអង់គ្លេសជាប្រចាំ ទីបីត្រៀមឯកសារដែលចាំបាច់ ទីបួនធ្វើជាយុវជនសកម្មក្នុងសង្គម ទីប្រាំដាក់ព្យាយាម និងទីប្រាំមួយមានការជឿជាក់លើខ្លួនឯង។
១. ស្វែងយល់ពីកម្មវិធីដែលអ្នកចង់ដាក់ពាក្យ ៖
– ជ្រើសរើសកម្មវិធីសិក្សាដែលសាកសមនឹងអ្នក
– ស្វែងយល់ព័ត៌មានទូទៅនៃកម្មវិធីដូចជា ដំណើរការដាក់ពាក្យ ការសម្ភាសន៍ ដឹងពីថ្ងៃគេបើកទទួលពាក្យ និងបិទទទួលពាក្យ
– សាកសួរព័ត៌មានពីអ្នកធ្លាប់ជាប់កម្មវិធីនោះដើម្បីឱ្យកាន់តែច្បាស់។
២. ពង្រឹងភាសាអង់គ្លេសជាប្រចាំ ៖ ភាសាអង់គ្លេសជាផ្នែកមួយសំខាន់ក្នុងការ Exchange ទៅក្រៅប្រទេសពីព្រោះ ដំណើរការដាក់ពាក្យ និងសម្ភាសន៍គឺសុទ្ធតែជាភាសាអង់គ្លេសក៏ប៉ុន្តែមិនមានន័យថាត្រូវឱ្យយើងខ្លាំងឥតខ្ចោះនោះទេ សំខាន់យើងអាចប្រើប្រាស់បានសម្រាប់ការរស់នៅ និងក្នុងការទំនាក់ទំនងបានគឺគ្រប់គ្រាន់ហើយ។
៣. ត្រៀមឯកសារដែលចាំបាច់ ៖ ចាំបាច់បំផុត គឺលិខិតឆ្លងដែន (Passport) ហើយតម្រូវការផ្សេងៗទៀតអាចជា Transcript និង Test ភាសាអង់គ្លេស អាស្រ័យទៅតាមកម្មវិធីនីមួយៗ។
៤. ធ្វើជាយុវជនសកម្មក្នុងសង្គម ៖ ជាទូទៅ គេតែងផ្តល់ឱកាសឱ្យយុវជនគំរូដែលសកម្មក្នុងកិច្ចការងារសង្គម ឬអ្នកដែលចង់បង្កើតការផ្លាស់ប្តូរជាវិជ្ជមានសម្រាប់ប្រទេសជាតិខ្លួន។ ក្រៅពីការសិក្សា អ្នកគួររួមចំណែកខ្លះក្នុងការចូលរួមកិច្ចការសង្គមតាមរយៈការស្ម័គ្រចិត្តជាដើម ដើម្បី Build Credit ខ្លួនឯងបន្ថែម។
អ្នកឈ្នះមិនដែលបោះបង់ អ្នកបោះបង់មិនដែលឈ្នះ! គ្រប់យ៉ាងសុទ្ធតែអាចទៅរួច
លោក ភាព សុភ័ក
៥. ដាក់ពាក្យម្ដងហើយមិនជាប់ ដាក់ម្ដងទៀត ៖ ទោះបីជាធ្លាក់ម្តងក៏ដោយ យើងត្រូវរៀនពីកំហុស យកវាជាបទពិសោធន៍ ហើយសាកល្បងម្តងទៀត។
៦. ជឿជាក់លើខ្លួនឯង ៖ យើងត្រូវបង្កើនទំនុកចិត្តលើខ្លួនឯង ហើយគិតថាខ្លួនឯងនឹងអាចធ្វើបាន គ្រាន់តែពេលខ្លះវាគ្រាន់តែត្រូវការពេលវេលាបន្តិច មិនយូរមិនឆាប់យើងនឹងសម្រេចវា ដរាបណាយើងនៅរក្សាគោលដៅហើយជឿជាក់លើខ្លួនឯង។
គួរបញ្ជាក់ដែរថា នេះជាការចែករំលែករបស់លោក ភាព សុភ័ក នៅលើគេហទំព័រផ្លូវការរបស់លោកដែលមានឈ្មោះ Pheap Sopheak-ភាព សុភ័ក។ លោក ភាព សុភ័ក ជាអតីតសិស្សនិទ្ទេស A ឆ្នាំ២០១៩ ជាអ្នកបង្កើតមាតិការអប់រំ និងជាអ្នកនិយាយជាសាធារណៈផងដែរ៕
