ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ថ្លែងក្នុងពិធីប្រគល់សញ្ញាបត្រជូននិស្សិតសាកលវិទ្យាល័យឯកទេសនៃកម្ពុជា (CUS) ជិត៧ពាន់នាក់ ដែលបានបញ្ចប់ការសិក្សាដោយជោគជ័យ នាព្រឹកថ្ងៃទី២៣ ខែមករា ឆ្នាំ២០២៣នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ថា គ្រូបញ្ចេញចំណេះដឹងទៅឱ្យសិស្ស ប៉ុន្តែទាល់តែសិស្សមានសមត្ថភាពស្រូបយកចំណេះវិជ្ជាពីគ្រូ ទើបអាចក្លាយទៅជាអ្នកចេះដឹង ហើយសិស្សខ្លួនឯងក៏ត្រូវមានការស្រាវជ្រាវផងដែរ។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា រឿងរៀនសូត្រខុសគ្នាពីរឿងចាក់ថ្នាំ ឬការបញ្ចូលឈាម អ្នកជំងឺខ្វះឈាម ត្រូវការយកឈាមពីមនុស្សម្នាក់ ទៅបញ្ចូលឱ្យមនុស្សម្នាក់ ដើម្បីការរស់រៀន និងជាសះស្បើយពីជំងឺ ។ ប៉ុន្តែការរៀនមិនអាចផ្ទេរចំណេះដឹងពីខួរក្បាលមនុស្សម្នាក់ទៅខួរក្បាលមនុស្សម្នាក់បានទៀតទេ គឺត្រូវមានគ្រូ និងត្រូវមានសិស្ស ។
នាយករដ្ឋមន្ត្រី នៃព្រះរាជាណាចក្រកម្ពុជា ក៏បានផ្ដាំផ្ញើដល់និស្សិតទាំងអស់ឱ្យបន្តការខិតខំបន្ថែមទៀត មិនមែនទទួលសញ្ញាបត្រថ្ងៃនេះចប់ត្រឹមប៉ុណ្ណឹងនោះទេ ត្រូវបន្តការខិតខំដើម្បីទទួលបានចំណេះដឹងកាន់តែខ្ពស់ កាន់តែជ្រៅ ហើយត្រូវបណ្ដុះបណ្ដាលចំណេះដឹង និងអភិវឌ្ឍខ្លួនចាប់យកការរៀនសូត្រពេញមួយជីវិត ។
សម្តេចតេជោ ហ៊ុន សែន នាយករដ្ឋមន្រ្តី
“ខ្ញុំក៏សូមចូលរួមជាមួយអាណាព្យាបាល និស្សិតទាំងអស់ ដែលទទួលបានសញ្ញាបត្រនៅថ្ងៃនេះ បើគ្មានពួកគាត់ទេ យើងលំបាក ព្រោះមានអ្នកនៅលីវទទួលបានការផ្គត់ផ្គង់ពីឪពុកម្ដាយ ឬពីអ្នកជួយឧបត្ថម្ភ ដើម្បីទទួលបានការបណ្ដុះបណ្ដាល ប៉ុន្តែមាននិស្សិតខ្លះក៏មានប្ដី និស្សិតខ្លះក៏មានប្រពន្ធ និស្សិតខ្លះមានទាំងកូនមានទាំងចៅទៅទៀតដែលរៀនពេញមួយជីវិត”
គួររជម្រាបជូនផងដែរថា សាកលវិទ្យាល័យឯកទេសនៃកម្ពុជា (CUS) មាននិស្សិតជិត៧ពាន់នាក់ ដែលបានបញ្ចប់ការសិក្សាដោយជោគជ័យ ក្នុងនោះនិស្សិតថ្នាក់បរិញ្ញាបត្ររងចំនួន ៤៤៣នាក់, និស្សិតថ្នាក់បរិញ្ញាបត្រចំនួន ៤៤៤៦នាក់ , និស្សិតបរិញ្ញាបត្រជាន់ខ្ពស់ចំនួន ១៦០៣នាក់ និងនិស្សិតថ្នាក់បណ្ឌិតចំនួន ១នាក់៕
