សៀវភៅកម្រងសំណួរ-ចម្លើយភាសាខ្មែរថ្នាក់ទី១០ ដែលចងក្រងផលិតឡើងដោយ គរុនិស្សិតបរិញ្ញាបត្រ+២ ឯកទេសអក្សរសាស្រ្តខ្មែរ នៃវិទ្យាស្ថានជាតិអប់រំ ក្រុមទី៣ មានសមាជិកចំនួន២៧រូប បានជាប់ជ័យលាភីលេខ១ ក្នុងពិព័រណ៍អប់រំស្នាដៃស្រាវជ្រាវរបស់គរុនិស្សិតបរិញ្ញាបត្រជាន់ខ្ពស់អប់រំ វិជ្ជាជីវៈគ្រូបង្រៀនកម្រិតឧត្តម (បរិញ្ញាបត្រ+២) ជំនាន់ទី២ នៅវិទ្យាសា្ថនជាតិអប់រំ កាលពីពេលថ្មីៗនេះ។

លោក អ៊ុច ម៉ុនផាន់រ៉េត ជាគរុនិស្សិតបរិញ្ញាបត្រ+២ ឯកទេសអក្សរសាស្រ្តខ្មែរ នៃវិទ្យាស្ថានជាតិអប់រំ និងជាប្រធានក្រុមទី៣ មានប្រសាសន៍ថា ការចូលរួមក្នុងការតាំងពិព័រណ៍អប់រំនេះ ជាការរៀបចំរបស់វិទ្យាស្ថានជាតិអប់រំ ដើម្បីបណ្តុះគរុសិស្ស គរុនិស្សិតឱ្យមានគំនិតច្នៃប្រឌិតនវានុវត្តន៍ ជាពិសេសការស្រាវជ្រាវវិធីសាស្រ្តបង្រៀនថ្មីៗ។

ប្រធានក្រុមទី៣ រូបនេះ បញ្ជាក់បន្ថែមថា ការរៀបចំសៀវភៅកម្រងសំណួរ-ចម្លើយភាសាខ្មែរថ្នាក់ទី១០ នេះឡើង ប្រើរយៈពេលប្រហែលបួនខែ។ លោក ម៉ុនផាន់រ៉េត បន្តថា សម្រាប់ការលំបាក ​ក្នុងការរៀបចំសៀវភៅនេះ គឺការបែងចែកពេលវេលា ព្រោះត្រូវរៀនផង ចុះកម្មសិក្សាផង ធ្វើកិច្ចការងារដែលគ្រូឧទ្ទេសផ្ដល់ឱ្យផង ខណៈដំបូងៗមិនសូវយល់អំពីកិច្ចការ ប៉ុន្តែនៅពេលមានការណែនាំសម្របសម្រួល និងចង្អុលបង្ហាញពីគ្រូឧទ្ទេសផ្នែកអក្សរសាស្រ្តខ្មែរ ក៏ចាប់ផ្ដើមយល់ ហើយធ្វើឱ្យសៀវភៅនេះសម្រេចលទ្ធផលជារូបរាង។ ជាពិសេស សមាជិកក្រុមដឹងអំពីកាត្វកិច្ច និងមានទឹកចិត្តចង់បន្សល់ទុកស្នាដៃជាមួយនិស្សិតរួមជំនាន់ ដោយសហការគ្នា និងជួយគ្នាទៅវិញទៅមក។

លោក អ៊ុច ម៉ុនផាន់រ៉េត បន្ថែមថា សម្រាប់ជ័យលាភីលេខ១នេះ ក្រុមរបស់ខ្លួនធ្លាប់លួចសង្ឃឹមខ្លះដែរ ប៉ុន្តែមិនហ៊ានសង្ឃឹមខ្លាំង ដោយសារមានគរុនិស្សិតចូលរួមប្រកួតលើសៀវភៅលំហាត់ច្រើន និងសុទ្ធតែជាអ្នកមានសមត្ថភាពខ្លាំងពូកែ។ លោកបន្តថា នៅពេលទទួលបានជ័យលាភីលេខ១ លោកផ្ទាល់ និងសមាជិកក្រុម មានអារម្មណ៍រំភើបសប្បាយរីករាយជាខ្លាំង ទឹកចិត្តត្រេកអរចំពោះការខិតខំប្រឹងប្រែងក្លាយជាការពិត។

គរុនិស្សិតបរិញ្ញាបត្រ+២ ក៏បានលើកទឹកចិត្តគរុនិសិ្សតទាំងអស់ខិតខំសិក្សាស្រាវជ្រាវ ចងក្រងស្នាដៃឱ្យបានផុសផុលឡើងតាមឯកទ្ទេសរបស់ខ្លួន ដោយសារតម្រូវការក្នុងការអានជាទីពេញនិយមសម្រាប់អ្នកសិក្សា។ ជាពិសេស លោកគ្រូ អ្នកគ្រូ តាមវិទ្យាល័យ ត្រូវព្យាយាមសរសេរស្នាដៃ ដើម្បីផ្ទេរចំណេះដឹងសម្រាប់អ្នកជំនាន់ក្រោយ។ ហើយសិស្សានុសិស្សវិញ ត្រូវខិតខំសិក្សារៀនសូត្រ និងអានសៀវភៅទាក់ទងនឹងការសិក្សារៀនសូត្រឱ្យបានច្រើន។ 

កញ្ញា សាក់ ស្រីរ័ត្ន ជាគរុនិស្សិតបរិញ្ញាបត្រ+២ ឯកទេសអក្សរសាស្រ្តខ្មែរ នៃវិទ្យាស្ថានជាតិអប់រំ និងជាសមាជិកក្រុម និយាយថា លក្ខណៈពិសេសដែលធ្វើឱ្យស្នាដៃនេះទទួលបានជ័យលាភីលេខ១ ក្នុងពិពណ៍ស្នាដៃអប់រំ រួមមាន៖ ១- ការបង្កើតសំណួរ ជាការបង្កើតទៅតាមទម្រង់សំណួរតេស្តស្តង់ដារបស់ក្រសួងអប់រំ យុវជន និងកីឡា, ការបង្កើតសំណួរស្របតាមខ្លឹមសារមេរៀននៃសៀវភៅសិក្សាគោលភាសាខ្មែរថ្នាក់ទី១០ ដោយផ្អែកលើកម្រិតសំណួរទាំង៦ របស់ប្លូម តាក់សូណូមី (Bloom Taxonomy) ព្រោះវាជាត្រីវិស័យសម្រាប់ចង្អុលផ្លូវដល់អ្នកសួរ។ ២- កម្រិតពុទ្ធិនៃសំណួរ សំដៅលើកម្រិតនៃការគិត ដែលសិស្សទទួលបាន បន្ទាប់ពីពួកគាត់បានរៀនខ្លឹមសារមេរៀននីមួយៗ ដែលឆ្លើយតបនឹងលទ្ធផលសិក្សា។ ក្នុងនោះ បង្កើតសំណួរដោយផ្អែកលើទ្រឹស្តីប្លូម បានចែកកម្រិតពុទ្ធិ (កម្រិតនៃការគិត) ជា៦កម្រិតរួមមាន កម្រិតចងចាំ យល់ អនុវត្ត វិភាគ វាយតម្លៃ និងបង្កើតថ្មី។

៣- ទម្រង់សំណួរ ចែកចេញជាពីរ គឺ១. សំណួរទម្រង់បិទ គឺជាទម្រង់សំណួរដែលតម្រូវឱ្យអ្នកធ្វើតេស្តត្រូវជ្រើសរើសចម្លើយមួយគត់ពីជម្រើស ចម្លើយ និងប្រធានលំហាត់ដែលគេឱ្យ។ ទម្រង់សំណួរបិទនេះមានចម្លើយត្រឹមត្រូវតែមួយគត់ រួមមានសំណួរ ចម្លើយត្រូវ ឬខុស សំណួរផ្គូផ្គង និងសំណួរពហុជ្រើសរើស។ ២. សំណួរទម្រង់បើក គឺជាទម្រង់សំណួរដែលតម្រូវឱ្យសិស្សសរសេរចម្លើយជាគំនិតខ្លួនឯងផ្ទាល់ ដើម្បីឆ្លើយតបនឹងបញ្ហាដែលចោទសួរ។ ចម្លើយអាចខ្លី ឬវែងអាស្រ័យលើទំហំនៃបញ្ហា និងសមត្ថភាពឆ្លើយ។ សំណួរទម្រង់ បើករួមមាន បំពេញចន្លោះ សំណួរសរសេរចម្លើយខ្លី និងសំណួរសរសេរចម្លើយវែង។ ៤- លក្ខណ:ល្អនៃសំណួរ រួមមាន មានលក្ខណៈវិទ្យាសាស្ត្រ និងសិល្បៈ, សមស្របនឹងសមត្ថភាពសិស្ស, ជាសំណួរទាក់ទងកម្រិតប្លូម មានការត្រិះរិះពីទាបទៅខ្ពស់, សំណួរក្ដោបខ្លឹមសារមេរៀនក្នុងកម្មវិធីសិក្សា, សំណួរផ្សារភ្ជាប់ទៅនឹងជីវភាពរស់នៅប្រចាំថ្ងៃ និងសំណួរច្បាស់លាស់មិនស្រពេចស្រពិល។

គរុនិស្សិតបរិញ្ញាបត្រ+២ រូបនេះ បន្ថែមថា សម្រាប់អត្ថប្រយោជន៍ នៃសៀវភៅកម្រងសំណួរ-ចម្លើយភាសាខ្មែរថ្នាក់ទី១០នេះ សម្រាប់គ្រូបង្រៀន អាចទុកជាឯកសារជំនួយសម្រាប់គ្រូបង្រៀនក្នុងដំណើរការបង្រៀននិងរៀន, ការវាយតម្លៃលទ្ធផលសិក្សារបស់សិស្ស ដូចជា​ ការវាយតម្លៃតាមដំណាក់អាចធ្វើច្រើនដងគ្រប់ម៉ោងបង្រៀន មានជាសំណួរខ្លីៗ ធ្វើបទបង្ហាញ សួរសំណួរផ្ទាល់មាត់ ការពិភាក្សាក្រុម។ បន្ថែមពីនេះ ប្រើប្រាស់ក្នុងការវាយតម្លៃសរុប មានការតេស្តចុងមេរៀន ប្រឡងប្រចាំខែ និងប្រឡងឆមាស។ លើសពីនេះ ការប្រើប្រាស់សំណួរសមស្របនឹងខ្លឹមសារមេរៀនអាចសម្រេចបាននូវវត្ថុបំណងមេរៀនប្រកបដោយប្រសិទ្ធភាព។ កញ្ញា បន្តថា ប្រសិនបើគ្រូបង្រៀនបង្កើតបានវិញ្ញាសាល្អ មានលក្ខណៈស្តង់ដា ហើយដំណើរការប្រឡងល្អគ្រប់ដំណាក់កាល នោះលទ្ធផលបានពីការប្រឡងមានកម្រិតជឿជាក់ខ្ពស់ ដែលអាចឆ្លុះបញ្ចាំងពីសមត្ថភាពសិស្សជាក់ស្តែង។ លើសពីនេះ គ្រូអាចអាចវាស់វែងពីចំណេះដឹង សមត្ថភាពសិស្ស និងពង្រឹងវិធីសាស្ត្របង្រៀនបន្ថែម។

បើតាម កញ្ញា សាក់ ស្រីរ័ត្ន សម្រាប់សិស្សវិញ សៀវភៅកម្រងសំណួរ-ចម្លើយភាសាខ្មែរថ្នាក់ទី១០នេះ អាចទុកជាឯកសារសម្រាប់ជំនួយក្នុងការសិក្សារបស់សិស្ស, សំណួរជំរុញឱ្យសិស្សចូលរួមក្នុងសកម្មភាពរៀនសូត្រ, ជំរុញឱ្យសិស្សខិតខំរៀនសូត្របន្ថែម, ជំរុញឱ្យសិស្សមានការគិតពីកម្រិតទាប រហូតដល់កម្រិតខ្ពស់, បណ្តុះឱ្យសិស្សមានការត្រិះរិះពិចារណា វិភាគ, សិស្សទទួលបានចំណេះដឹងបន្ថែម ចំណេះដឹងថ្មី, យល់ដឹងពីបញ្ហាសង្គម និងដំណោះស្រាយនាពេលអនាគត, សិស្សក្នុងថ្នាក់រៀនមានបម្រុងប្រយ័ត្ន និងបរិយាកាសថ្នាក់រៀនមានសកម្មភាពរស់រវើកក្នុងដំណើរការសិក្សារៀនសូត្រ។

គួរជម្រាបជូនថា គរុនិស្សិតបរិញ្ញាបត្រ+២ ឯកទេសអក្សរសាស្រ្តខ្មែរ នៃវិទ្យាស្ថានជាតិអប់រំ ក្រុមទី៣ មានស្នាដៃចំនួន៣ ដាក់តាំងពិព័រអប់រំ លើកទី១ រួមមាន ទី១. កិច្ចតែងការបង្រៀន ភាសាខ្មែរ ថ្នាក់ទី១០ “អនុវត្តវិធីសាស្រ្តបង្រៀនស្ថាបនានិយម” ទី២. សៀវភៅសម្ភារឧបទេស ភាសាខ្មែរ ថ្នាក់ទី១០ ទី៣. សៀវភៅកិច្ចការផ្ទះ ភាសាខ្មែរ ថ្នាក់ទី១០ និងស្នាដៃដាក់តាំងពិព័រអប់រំ លើកទី២ គឺសៀវភៅកម្រងសំណួរ-ចម្លើយភាសាខ្មែរថ្នាក់ទី១០៕