កម្មវិធី United World College (UWC) ប្រកាសផ្ដល់ឱកាសសិក្សាអាហារូបករណ៍ដល់សិស្សកម្ពុជា ដែលកំពុងសិក្សានៅវិទ្យាល័យ ចំនួន៥កន្លែងសម្រាប់ឆ្នាំសិក្សា២០២៥ ដល់ ២០២៧។ អាហារូបករណ៍ផ្ដល់ជូនការសិក្សានៅប្រទេសជប៉ុន ប្រទេសចិន ប្រទេសឥណ្ឌា ប្រទេសថៃ និង សហរដ្ឋអាមេរិក ដោយផ្ដល់មូលនិធិសិក្សាពី ៥០% ដល់ ១០០%។

អាហារូបករណ៍នឹងផ្ដល់អាហារូបករណ៍សម្រាប់ការសិក្សានៅ Pearson ISAK Japan ប្រទេសជប៉ុន, UWC Changshu China ប្រទេសចិន, UWC USA នៅសហរដ្ឋអាមេរិក, UWC Mahindra College ប្រទេសឥណ្ឌា និង UWC Thailand នៅប្រទេសថៃ។

លក្ខខណ្ឌចាំបាច់ដែលបេក្ខជនត្រូវមានដូចជា មានសញ្ជាតិខ្មែរ ជាបេក្ខជនដែលមានថ្ងៃកំណើតក្នុងចន្លោះថ្ងៃទី១ ខែមករា ឆ្នាំ២០០៧ ដល់ថ្ងៃទី៣១ ខែសីហា ឆ្នាំ២០០៩។ ជាបេក្ខជនដែលកំពុងសិក្សាថ្នាក់ទី១១ ឬទី១២ នៅវិទ្យាល័យក្នុងប្រទេសកម្ពុជា និងមាន Email ផ្ទាល់ខ្លួនដែលមានសុពលភាព។ ជាមួយគ្នានេះ បេក្ខជនត្រូវមានលក្ខណៈសម្បត្តិចាំបាច់មួយចំនួនដូចជា ជាបេក្ខជនដែលមានជំនាញសរសេរ និងនិយាយជាភាសាអង់គ្លេសជ្រៅជ្រះ មានសមត្ថភាពក្នុងការត្រិះរិះពិចារណា មានភាពឆ្លាតវៃ មានការអត់ធ្មត់ មានទំនួលខុសត្រូវលើខ្លួនឯង និងស្មោះត្រង់ និង ជាបេក្ខជនដែលមានចំណង់ចំណូលចិត្តខ្ពស់លើសកម្មភាពសិក្សាស្រាវជ្រាវ។

សិស្សានុសិស្សដែលមានចំណាប់អារម្មណ៍ក្នុងការដាក់ពាក្យត្រូវឆ្លងកាត់បីដំណាក់កាលរួមមាន៖ ដំណាក់កាលពី១ ចូលទៅកាន់គេហទំព័រ https://bit.ly/uwc-cambodia-2yrs-apply-2025-2027 ។ ដំណាក់កាលទី២ បេក្ខជនត្រូវបំពេញចម្លើយគ្រប់សំណួរទាំងអស់ បន្ទាប់មកចុចពាក្យ Submit (គួរជម្រាបថា បេក្ខជនត្រូវសរសេរដោយប្រុងប្រយ័ត្ន និងបានក្បោះក្បាយ ព្រោះការដាក់ពាក្យត្រូវបានរាប់បញ្ជូលជាចំណែក ក្នុងវាយតម្លៃជ្រើសរើសបេក្ខជនទៅកាន់វគ្គសម្ភាសន៍។ សម្រាប់ ដំណាក់កាលទី៣ បេក្ខជននឹងទទួលបានសារជូនដំណឹងតាមរយៈ Email ។ គួរជម្រាបថា មានតែការដាក់ពាក្យតាមរយៈ Online តែប៉ុណ្ណោះដែលត្រូវបានទទួលយក ដូចនេះបេក្ខជនត្រូវប្រុងប្រយ័ត្នចំពោះការប្រើប្រាស់ ​Email ដែលអាចប្រើការបាន។

 សម្រាប់ព័តមានបន្ថែមងាចទំនាក់ទំនងទៅកាន់ UWC Cambodia តាមរយៈ Email: selection@kh.uwc.org ឬតាមរយៈទំព័រFacebook ផ្លូវការរបស់UWC:  https://www.facebook.com/uwc.cambodia ។

ចាប់ទទួលពាក្យពីថ្ងៃផ្សាយដំណឹងរហូតដល់ថ្ងៃទី៣១ ខែធ្នូ ឆ្នាំ២០២៤៕