ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – បច្ចុប្បន្នមាននិស្សិតកម្ពុជាចំនួន១០៨០រូបកំពុងស្នាក់នៅ និងបន្តការសិក្សានៅក្នុងខេត្តក្រុងចំនួន២៧ក្នុងប្រទេសចិន ដោយចំនួននេះគឺជាចំនួនដែលនៅតិចតួចបើធៀបនឹងនិស្សិតឡាវ វៀតណាម ឬថៃ ។ នេះជាការលើកឡើងរបស់ ឯកឧត្ដម អ៊ុំ វុទ្ធទី ស្ថាបនិក និងជាប្រធានក្រុមប្រឹក្សាភិបាលសមាគមន៍និស្សិតកម្ពុជាប្រចាំសាធារណរដ្ឋប្រជាមានិតចិនក្នុងកម្មវិធីសិក្ខាសាលាស្ដីពី « ការផ្សព្វផ្សាយអាហារូបករណ៍ និងវគ្គបណ្ដុះបណ្ដាលបន្តការសិក្សានៅសាធារណរដ្ឋប្រជាមានិតចិន» ។
ឯកឧត្ដម អ៊ុំ វុទ្ធទី បានលើកឡើងពីគោលបំណង៤ចំណុចនៃសិក្ខាសាលានេះថា គោលដៅទី១ដើម្បីណែនាំអំពីបច្ចេកទេសការប្រឡងទទួលបានអាហារូបករណ៍ និងវិធីសាស្ត្រស្នើសុំអាហារូបករណ៍ដោយផ្ទាល់សម្រាប់ថ្នាក់បរិញ្ញាបត្រ បរិញ្ញាបត្រជាន់ខ្ពស់ និងថ្នាក់បណ្ឌិតដោយរួមបញ្ចូលទាំងការគាំទ្រផ្សេងៗពីអាហារូបករណ៍ ។ ទី២ លើកទឹកចិត្តដល់និស្សិតសិក្សាភាសាចិនដើម្បីរៀនត្រៀមស្នើសុំអាហារូបករណ៍(អាហារូបករណ៍ផ្លូវសូត្រទាមទារឱ្យមានកម្រិតHSK3ឡើង) ខាងសមាគមនិស្សិតអាចស្នើសុំការសិក្សាភាសាចិនតាមអនឡាញជាមួយសាលាជូនដោយឥតគិតថ្លៃ ។ ទី៣ ផ្សព្វផ្សាយអំពីវប្បធម៌ចិន ភាពរីកចម្រើន និងភាពស៊ីវិល័យរបស់ប្រទេសចិនតាមរយៈការចែករំលែកបទពិសោធន៍ការសិក្សា ការស្នាក់នៅរបស់វាគ្មិន ។
ជាមួយគ្នានេះ គោលដៅទី៤ ដើម្បីជម្រុញកំណើននិស្សិតកម្ពុជាទៅសិក្សានៅប្រទេសចិនឱ្យបានកាន់តែច្រើន ។ លើសពីនេះ សមាគមនិស្សិតកម្ពុជាប្រចាំសាធារដ្ឋប្រជាមានិតចិនបានកំណត់ទិសដៅបន្តជួយសម្របសម្រួលឱ្យនិស្សិតខ្មែរបានទៅសិក្សានៅប្រទេសចិនយ៉ាងតិច៥ពាន់នាក់ក្នុងរយៈពេល៥ឆ្នាំខាងមុខដើម្បីចូលរួមក្នុងការអភិវឌ្ឍធនធានមនុស្ស ។
ប្រធានក្រុមប្រឹក្សាភិបាលរូបនេះបានបន្ថែមថា ក្រោយប្រទេសចិនប្រកាសបើកប្រទេសឡើងវិញពីជំងឺកូវីដ-១៩ ចាប់ពីខែកុម្ភះកន្លងមក លោក អ៊ុំ វុទ្ទទីផ្ទាល់ បានដឹកនាំគណៈប្រតិភូទៅទស្សនកិច្ចសិក្សានៅសាកលវិទ្យាចំនួន៩ ដើម្បីស្វែងរកកិច្ចសហប្រតិបត្តិការ និងអាហារូបករណ៍ជូននិស្សិតកម្ពុជាក្នុងប្រទេសកម្ពុជា ។ លោកបន្តថា អាហារូបករណ៍ទាំងនោះរួមមាន អាហារូបករណ៍រដ្ឋាភិបាលចិន, អាហារូបករណ៍ថ្នាក់ខេត្តក្រុង, អាហារូបករណ៍ផ្លូវសូត្រ, អាហារូបករណ៍ខុងជឺ, អាហារូបករណ៍សាកលវិទ្យាល័យ និងអាហារូបករណ៍កូនចៅចិន ដែលជាអាហារូបករណ៍តម្រូវឱ្យបេក្ខជនមានលក្ខណៈសម្បត្តិគ្រប់គ្រាន់ និងអាចប្រើប្រាស់ភាសាចិនបានសមរម្យ ។
ជាមួយគ្នានេះ ឯកឧត្ដម អ៊ុំ វុទ្ធទី សូមថ្លែងអំណរគុណដល់ប្រមុខរាជរដ្ឋាភិបាលកម្ពុជាដែលតែងតែយកចិត្តទុកដាក់ដល់ការសិក្សារបស់យុវជនកម្ពុជាគ្រប់រូបទាំងក្នុង និងក្រៅប្រទេសដែលជាស្ពានសម្រាប់ថ្នាល់បណ្ដុះបណ្ដាលធនធានមនុស្សនៅកម្ពុជាឱ្យកាន់តែរីកចម្រើន និងជឿនលឿន ។
គួរបញ្ជាក់ដែរថា នេះជាការលើកឡើងរបស់ឯកឧត្ដម អ៊ុំ វុទ្ធទី ក្នុងសិក្ខាសាលាស្ដីពី « ការផ្សព្វផ្សាយអាហារូបករណ៍ និងវគ្គបណ្ដុះបណ្ដាលបន្តការសិក្សានៅសាធារណរដ្ឋប្រជាមានិតចិន» កាលពីថ្ងៃទី០៣ ខែកក្កដា ឆ្នាំ២០២៣កន្លងទៅ ដែលមាននិស្សិត និងសាធារណជនជាងពី៧០០នាក់មកពីសាកលវិទ្យាល័យភូមិន្ទភ្នំពេញ វិទ្យាស្ថានបច្ចេកវិទ្យាកម្ពុជា ៕
