លោក ជឹម ពិសី បច្ចុប្បន្ន​គឺជា​ម្ចាស់ក្រុមហ៊ុនសិក្សា​គម្រោងប្លង់​អគារ (NCEC) ព្រមទាំងជាគ្រូបណ្ដុះបណ្ដាលផ្នែកវិស្វកម្មសំណង់ស៊ីវិលនៅ វិទ្យាស្ថានជាតិបណ្ដុះបណ្ដាលបច្ចេកទេស (NTTI) ។ មុននឹងឈានដល់ចំណុចនេះ លោកបានហែលឆ្លងជីវិតជានិស្សិតជំនាញបច្ចេកទេស និងធ្លាប់បម្រើការទាំងនៅក្នុងប្រទេសនិងក្រៅប្រទេសផងដែរ។

លោក ជឹម ពិសី បាន​រំលឹកថា នៅឆ្នាំ២០១៤លោកបានបញ្ចប់ការសិក្សា​ថ្នាក់បរិញ្ញាបត្រជំនាញបច្ចេកទេស បន្ទាប់មកលោកក៏ទទួកបានឱកាសឱ្យទៅបង្រៀនផ្នែកវិស្វកម្មសំណង់ស៊ីវិលនៅសាកលវិទ្យាល័យខ្មែរបច្ចេកវិទ្យា និងគ្រប់គ្រង (KUTM) ឯខេត្តព្រះសីហនុ។ ទោះបីជាលោកមានការងារ ក្រោយបញ្ចប់ បរិញ្ញាបត្រក៏ដោយ ប៉ុន្តែលោក ជឹម ពិសី នៅតែបន្តស្វះស្វែងរកព័ត៌មានបន្ថែម ដើម្បីអភិវឌ្ឍសមត្ថភាព និងជំនាញរបស់ខ្លួនថែមទៀត ។

លុះឆ្នាំ២០១៥  លោក ពិសី ក៏បានជាប់អាហារូបករណ៍ទៅសិក្សាថ្នាក់អនុបណ្ឌិតផ្នែកវិស្វកម្មគ្រឿងបង្គុំ (M. Eng in Structural Engineering) នៅសាកលវិទ្យាល័យបច្ចេកវិទ្យា King Mongkut Thonburi (KMUTT) ប្រទេសថៃ ហើយកំឡុងពេលសិក្សា លោកទទួលបានឱកាសបន្ថែមដើម្បីចូលបម្រើការងារជាអ្នករចនាប្លង់គ្រឿងបង្គុំរយះពេលមួយឆ្នាំ នៅទីក្រុងបាងកក។ លោកបានបញ្ចប់ការសិក្សានៅប្រទេសថៃនាឆ្នាំ២០១៨  ហើយត្រឡប់មកមាតុភូមិវិញ នាចុងឆ្នាំ២០១៩ ដោយស្ពាយនូវបទពិសោធន៍ ជំនាញ ទាំងការសិក្សា និងការងារ។

លោកបានបង្ហាញចំណាប់អារម្មណ៍អំពីបទពិសោធន៍ ពេលបានទៅសិក្សានៅក្រៅប្រទេសថា ក្រៅតែអំពីបរិយាកាស និងរបៀបនៃការសិក្សាមានភាពខុសប្លែកគ្នា វាក៏ជំរុញឱ្យលោកទទួលបានបទពិសោធន៍បន្ថែមក្នុងការទំនាក់ទំនងជាមួយក្រុមមនុស្សចម្រុះជាតិសាសន៍ជាច្រើន។ លោកបន្ថែមថា ខាងសាលាមានបន្ទប់ពិសោន៍ជំនាញធំទូលាយសម្រាប់គ្រប់ផ្នែក ក្នុងការផ្តល់ភាពងាយស្រួសពេលសិក្សា ព្រមទាំងមានបណ្ណាល័យក្នុងការស្រាវជ្រាវ  និងមានបន្ទប់សម្រាប់សរសេរនិក្ខេបបទផ្សេងៗគ្នា ទន្ទឹមគ្នានោះសាស្រ្តាចារ្យយកចិត្តទុកដាក់ខ្ពស់ក្នុងការបង្រៀន។

បន្ទាប់ពីបញ្ចប់ការសិក្សានៅប្រទេសថៃរយះពេលមួយឆ្នាំមុនត្រឡប់មកវិញ ក្រោយមកលោកទទួលបានការងារជាច្រើន មានទាំងការធ្វើការក្នុងក្រុមហ៊ុនឯកជន និងក្រោយមកលោក​ក៏​សម្រេច​ចិត្ត​បើកអាជីវកម្មខ្លួនឯង ដោយទទួលបានទាំងការសាងសង់ ការងារប្រឹក្សាយោបល់ ការងាររចនាជាដើម។

“នៅប្រទេសថៃជាបទពិសោធន៍ដ៏ល្អមួយ ដោយសារទទួលបានចំណេះដឹងថ្មីបន្ថែមពាក់ព័ន្ធនឹងជំនាញរបស់ខ្ញុំ រួមមានការស្រាវជ្រាវ ការពិសោធន៍ក្នុងបន្ទប់ពិសោធន៍ ការចុះកម្មសិក្សាជាដើម”

ត្រឡប់ថយក្រោយបន្តិច ពីកត្តាដំបូងដែលជំរុញឱ្យលោក ជឹម ពិសី ជ្រើសរើសរៀន​ជំនាញបច្ចេក ។ តាមពិទៅ​តាំងតែពីរៀននៅវិទ្យាល័យមកម្ល៉េះ លោក​ ពិសី សង្កេតឃើញខ្លួនឯងថា មានការចាប់អារម្មណ៍ទៅនឹងមុខវិជ្ជាដែលទាក់ទងអំពីវិទ្យាសាស្ត្រ (science)។ មួយវិញទៀតលោកយល់ឃើញថា ជំនាញនេះកំពុងមានតម្រូវការទីផ្សារខ្ពស់ ក្នុងចំណោមកិច្ចការបច្ចេកទេសផ្សេងៗទៀត ស្របនឹងបងៗ ក៏ដូចជាបងប្អូនជីដូនមួយរបស់លោក យកចិត្តទុកដាក់ជំរុញលោក ឱ្យចាប់យកជំនាញបច្ចេកទេស។

លោក ជឹម ពិសី ក៏​យល់ឃើញដែរថា ការរៀនជំនាញបច្ចេកទេស គឺឆាប់ទទួលបានការងារមួយយ៉ាងច្បាស់លាស់ (ព្រោះអាច រៀនរយៈពេលខ្លីបាន)។ មួយវិញទៀតជំនាញបច្ចេកទេស​ ក៏​មានតម្រូវការទីផ្សារខ្ពស់ ទូលំទូលាយ ហើយ​អាចរៀនពីការងារពេញមួយជីវិត និងអភិវឌ្ឍមុខជំនាញនេះបន្ត។ ចំណុចសំខាន់ចុងក្រោយជំនាញបច្ចេកទេស ជាផ្នែកមួយដែលជួយជំរុញកំណើនសេដ្ឋកិច្ច និងការចូលរួមអភិវឌ្ឍប្រទេសជាតិបាន ។

ជាមួយ​គ្នា​នេះ លោក ជឹម ពិសី ក៏​បានធ្វើការ​អំពាវនាវ​ដល់យុវជនគួរ​តែងាកមកចាប់យកជំនាញបច្ចេកទេសកាន់តែច្រើន ដោយសារផ្នែកនេះនឹងមានតម្រូវការកាន់តែខ្ពស់នាពេលអនាគត ព្រោះប្រទេសយើងជាប្រទេសដែលកំពុងអភិវឌ្ឍ ដូច្នេះពុំអាចខ្វះបានទេនូវអ្នកជំនាញបច្ចេកទេស ម្យ៉ាងវិញទៀតប្រាក់បៀវត្សផ្នែកនេះក៏កាន់តែសមរម្យ៕