បច្ចុប្បន្នអ្នកធ្វើការមួយចំនួនបានចាត់ទុកកន្លែងការងារអាចជាផ្ទះទីពីររបស់ខ្លួនទៅហើយ ។ ពួកគេតែងចំណាយពេលវេលានៅកន្លែងធ្វើការ ៨ម៉ោងក្នុងមួយថ្ងៃ ឬចំណាយពេលច្រើនជាង ៨ម៉ោង ដើម្បីឱ្យការងារសម្រេចលទ្ធផលតាមកការរំពឹងទុក ឬធ្វើការលើសពីការរំពឹងទុក ។ ទម្លាប់ធ្វើ​ការបែបនេះ រមែងធ្វើឱ្យមនុស្សមានសម្ពាធផ្លូវចិត្តកើតឡើង ព្រមទាំងធ្វើឱ្យប៉ះពាល់ដល់ប្រសិទ្ធភាពការងារធ្ងន់ធ្ងរក្នុងករណីមិនមានវិធីសាស្ត្រថែទាំសុខុមាលភាពផ្លូវចិត្តផ្ទាល់ខ្លួន ។ ខាងក្រោមនេះ ជាសកម្មភាពវិជ្ជមាន ៤ចំណុចដែលជួយពង្រឹងសុខុមាលភាពជីវិត (well-being) នៅកន្លែងធ្វើការ (workplace) ដែលបានចុះផ្សាយដោយគេហទំព័រសិក្សាពីសុខភាពផ្លូវចិត្ត Care In Mind ។

១. រំដោះអាការៈតានតឹងចិត្ត ៖ ភាពស្មុគស្មាញក្នុងចិត្តរងឥទ្ធិពលពីការងារអាចកើតឡើងគ្រប់ពេល ។ ករណីខ្លះអាការៈតានតឹងចិត្តនេះនឹងរុញឱ្យមនុស្សមានបញ្ហាថប់បារម្ភដោយងាយបំផុត ។ អាការៈតានតឹងចិត្ត (stress និង anxiety) អាចកើតឡើងផ្សំគ្នាតាមរយៈសម្ពាធការងារ និងសម្ពាធផ្ទាល់ខ្លួនរបស់បុគ្គល ។ វិធីរំដោះស្ត្រេសនៅកន្លែងការងារដំណាក់កាលនេះ គឺបុគ្គលត្រូវមានទំនាក់ទំនងល្អទាំងនៅក្នុងគ្រួសារ និងមិត្តរួមការងារ (Having healthy relationships with family and friends) ។

វិធីសាស្ត្ររំដោះអាការៈតានតឹងចិត្ត រួមមាន បុគ្គលត្រូវត្រួតពិនិត្យនិងតាមដានសុខភាពផ្លូវចិត្តផ្ទាល់ខ្លួនជាប្រចាំ, ធ្វើលំហាត់ប្រាណឱ្យបានទៀងទាត់, សម្រាក និងគេងឱ្យបានគ្រប់គ្រាន់ (យ៉ាងហោចណាស់ ៦-៨ម៉ោងក្នុងមួយថ្ងៃ) ។ ទន្ទឹមគ្នានេះ ព្យាយាមបោះចោលទម្លាប់អាក្រក់ដែលប៉ះពាល់ដល់សុខភាព និងរាងកាយ, ធ្វើសកម្មភាពដែលខ្លួនពេញចិត្ត, ព្យាយាមធ្វើការដោយគិតពីដំណោះស្រាយច្រើនជាងគិតពីបន្ទុក, គិតវិជ្ជមានរាល់ស្ថានការដែលខ្លួនបានជួប, បង្កើនទំនុកចិត្តដល់ខ្លួនឯង និងបន្សាំខ្លួនទៅនឹងស្ថានការកំពុងកើតមាន ។

ការចំណាយពេលវេលាជាមួយបុគ្គលដែលមានគុណភាពក៏អាចជាវិធីសាស្ត្ររំដោះអាការៈតានតឹងចិត្តដែលបុគ្គលអាចធ្វើបាន ។ លើសពីនេះ បុគ្គលត្រូវចេះបង្កើតគំនិតវិជ្ជមានយ៉ាងហោចណាស់ឱ្យបានមួយក្នុងមួយថ្ងៃ, ស្វែងរកការគាំទ្រ ឬរកជំនួយក្នុងករណីចាំបាច់, ព្រមទាំងធ្វើខ្លួនឱ្យរីករាយគ្រប់ថ្ងៃការងារទាំងអស់ ។

២. រក្សាលំនឹងស្ថានភាពហិរញ្ញវត្ថុផ្ទាល់ខ្លួនឱ្យបានល្អ ៖ សម្ពាធហិរញ្ញវត្ថុផ្ទាល់ខ្លួនអាចមានឥទ្ធិពលដល់ប្រសិទ្ធភាពការងារ ។ ដោយសារតម្រូវការហិរញ្ញវត្ថុជំរុញឱ្យមនុស្សខិតខំបំពេញការងារ ហើយមនុស្សបំពេញការងារទើបទទួលបានហិរញ្ញវត្ថុ ។ ចំណុចទាំងពីរនេះត្រូវបំពេញបន្ថែមឱ្យគ្នាទៅវិញទៅមកឱ្យខាងតែបាន ។ ដូច្នេះលំនឹងសុខភាពផ្លូវចិត្តបុគ្គលអាចរក្សានៅក្នុងស្ថានភាពល្អប្រសើរ គឺអាស្រ័យការគ្រប់គ្រងហិរញ្ញវត្ថុផ្ទាល់ខ្លួនបានត្រឹមត្រូវ និងឆ្លាតវៃបំផុត ។

៣. បង្កើតបរិយាកាសរីករាយ ៖ ពេលវេលា ៨ម៉ោង ឬអាចច្រើនជាងនេះនៅជាមួយក្រុមការងារ អាចឱ្យមនុស្សរងសម្ពាធអារម្មណ៍ និងសម្ពាធពីក្រុមការងារ ។  ពេលខ្លះសម្ពាធពីការងារងាយបណ្តាលឱ្យមនុស្សមានអាការៈបាក់ទឹកចិត្ត ឈានទៅកើតជំងឺដុតកម្លោចគោលដៅផ្ទាល់ខ្លួន  (Burnout) ។ ដើម្បីបញ្ជៀសសញ្ញាសុខភាពផ្លូវចិត្តនេះ ការបង្កើតបរិយាកាសរីករាយនៅកន្លែងធ្វើការជារឿងចាំបាច់ដែលត្រូវធ្វើ ។

ការបង្កើតបរិយាកាសរីករាយនៅកន្លែងធ្វើការ មានដូចជា លេងល្បែងថាមពលជាមួយគ្នា, សាកល្បងដាក់ប្រស្នាប្រចាំថ្ងៃរួមគ្នា​,​ លេងល្បែងបង្កើតមិត្តភាព និងភាពឆ្លាតវៃ, និងជជែកសួរសុខទុក្ខពីគ្នាទៅវិញទៅមកជាដើម ។ ទោះបីរីករាយយ៉ាងណាក៏ដោយ កុំភ្លេចគោលដៅផ្ទាល់ខ្លួន និងបេសកកម្មរួមក្នុងក្រុមរបស់អ្នក ។

៤. ចំណាយពេលវេលាជាមួយបុគ្គលមានគំនិតវិជ្ជមាន ៖ ការចំណាយពេលជាមួយក្រុមការងារ ឬបុគ្គលដែលជួយឱ្យខ្លួនមានគំនិតវិជ្ជមាន (Spending time with negative people) នឹងជួយគាំទ្រឱ្យស្ថានភាពផ្លូវចិត្តរបស់យើងកាន់តែរឹងមាំ ។ ត្រង់ចំណុចនេះ មិនមែនគ្រប់ពេលវេលាទាំងអស់សុទ្ធត្រូវការយោបល់នោះទេ ហើយយោបល់ទាំងអស់ក៏មិនអាចជួយឱ្យមនុស្សមានសុខភាពផ្លូវចិត្តល្អប្រសើរបានដែរ ។ ផ្ទុយទៅវិញការរក្សាទំនាក់ទំនងដោយវិជ្ជមាន ដើម្បីដោះស្រាយបញ្ហាស្មុកស្មាញក្នុងចិត្តនឹងជួយឱ្យមនុស្សរកចំណុចល្អៗបានច្រើន បង្កើតជាជម្រើសដំណោះស្រាយបញ្ហា ។

គួរបញ្ជាក់ថា សុខុមាលភាពជីវិត (well-being) សំខាន់សម្រាប់មនុស្សម្នាក់ៗ ។ ការស្រាវជ្រាវបានបង្ហាញថា នៅពេលមនុស្សពេញចិត្តនឹងអ្វីដែលខ្លួនមាន នោះពួកគេនឹងអាចជួយខ្លួនឯង ព្រមទាំងអ្នកដទៃឱ្យមានគុណភាពជីវិតល្អប្រសើរ ។ គុណតម្លៃសុខុមាលភាពជីវិត (well-being) របស់មនុស្សគ្រប់រូបមានប្រាំពីរចំណុច រួមមាន សុខភាពផ្លូវចិត្ត (Mental), ទំនាក់ទំនង (Relationships), បរិស្ថាន (Environmental), វប្បធម៌ (Cultural), ហិរញ្ញវត្ថុ (Financial), សុខភាពរាងកាយ (Physical), និងការងារល្អប្រសើរ (Occupational) ។ កាលបើមនុស្សមានសុខុមាលភាពជីវិតទាំងប្រាំពីរចំណុចនេះ នោះនឹងបង្កើនគុណភាពរស់នៅឱ្យកាន់តែប្រសើរ ។ ពោលគឺលក្ខខណ្ឌនៃការរស់នៅល្អនេះ គឺជាមូលដ្ឋានគ្រឹះនៃសុខុមាលភាពជីវិត៕