ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
វៀតណាមគ្រោងដាក់ចេញបទប្បញ្ញត្តិថ្មី ដើម្បីពង្រឹងការការពារកុមារនៅលើបណ្តាញសង្គម ដោយតម្រូវឱ្យកុមារអាយុក្រោម ១៦ ឆ្នាំ ចុះឈ្មោះគណនីបណ្តាញសង្គមតាមរយៈឪពុកម្តាយ ឬអាណាព្យាបាលស្របច្បាប់ ដែលនឹងទទួលខុសត្រូវក្នុងការត្រួតពិនិត្យខ្លឹមសារដែលកុមារមើល និងគ្រប់គ្រងរយៈពេលប្រើប្រាស់អេក្រង់។
សារព័ត៌មាន Hindustantimes បានរាយការណ៍ថា យោងតាមសេចក្តីព្រាងក្រឹត្យរបស់ក្រសួងវប្បធម៌ កីឡា និងទេសចរណ៍វៀតណាម វេទិកាបណ្តាញសង្គមទាំងអស់នឹងត្រូវអនុវត្តវិធានការផ្ទៀងផ្ទាត់អត្តសញ្ញាណអ្នកប្រើប្រាស់ជាកុមារ និងធានាថា ពួកគេអាចចូលប្រើបានតែខ្លឹមសារដែលសមស្របទៅតាមវ័យប៉ុណ្ណោះ។
សំណើនេះត្រូវបានលើកឡើង ខណៈរដ្ឋាភិបាលជាច្រើននៅជុំវិញពិភពលោកកំពុងរឹតបន្តឹងការគ្រប់គ្រងលើការប្រើប្រាស់បណ្តាញសង្គមរបស់កុមារ ដោយសារក្តីបារម្ភកាន់តែខ្លាំងអំពីខ្លឹមសារដែលអាចបង្កគ្រោះថ្នាក់ និងហានិភ័យសុវត្ថិភាពតាមអ៊ីនធឺណិត។
ជាឧទាហរណ៍ ប្រទេសបារាំងថ្មីៗនេះបានអនុម័តច្បាប់ហាមបង្កើតគណនីបណ្តាញសង្គមថ្មីសម្រាប់កុមារអាយុក្រោម ១៥ ឆ្នាំ ខណៈប្រទេសម៉ាឡេស៊ីក៏បានតម្រូវឱ្យអ្នកប្រើប្រាស់បណ្តាញសង្គមផ្ទៀងផ្ទាត់អាយុរបស់ខ្លួនផងដែរ។
លោក Phan Tam អនុរដ្ឋមន្ត្រីក្រសួងវប្បធម៌ កីឡា និងទេសចរណ៍វៀតណាម មានប្រសាសន៍ថា «គោលដៅសំខាន់មិនមែនជាការហាមឃាត់ ឬរឹតត្បិតកុមារពីការប្រើប្រាស់បណ្តាញសង្គមនោះទេ ប៉ុន្តែគឺដើម្បីធានាថា នៅពេលពួកគេប្រើប្រាស់វេទិកាទាំងនេះ ពួកគេស្ថិតក្នុងបរិយាកាសដែលសមស្របតាមវ័យ និងទទួលបានការការពារពីហានិភ័យផ្សេងៗ»។
សេចក្តីព្រាងក្រឹត្យនេះក៏តម្រូវឱ្យក្រុមហ៊ុនបណ្តាញសង្គមសហការជាមួយអាជ្ញាធរ តាមរយៈការបង្កើតប្រព័ន្ធរាយការណ៍ និងផ្តល់ព័ត៌មាន នៅពេលរកឃើញករណីរំលោភបំពាន ឬកេងប្រវ័ញ្ចលើកុមារ។
លើសពីនេះ វេទិកាបណ្តាញសង្គមនឹងត្រូវអនុវត្តការការពារភាពឯកជនកម្រិតខ្ពស់បំផុតសម្រាប់គណនីកុមារ និងទប់ស្កាត់ការចូលប្រើខ្លឹមសារដែលពាក់ព័ន្ធនឹងអំពើហិង្សា រូបភាពអាសអាភាស ល្បែងស៊ីសង គ្រឿងញៀន ការធ្វើអត្តឃាត និងខ្លឹមសារគ្រោះថ្នាក់ផ្សេងៗ។
ជាមួយគ្នានេះ វៀតណាមក៏កំពុងពិចារណារឹតបន្តឹងការលេងហ្គេមអនឡាញសម្រាប់អនីតិជនផងដែរ។ តាមសេចក្តីព្រាងច្បាប់ កុមារត្រូវមានឪពុកម្តាយ ឬអាណាព្យាបាលជាអ្នកចុះឈ្មោះគណនីហ្គេម ខណៈប្រតិបត្តិករហ្គេមត្រូវកំណត់រយៈពេលលេងមិនឱ្យលើសពី ៦០ នាទីក្នុងមួយថ្ងៃ៕
