ការធ្លាក់ចុះជាគំហុកនូវសុភមង្គមរបស់យុវវ័យក្នុងសកលលោក គឺជារលកបោកបក់ពីសម្ពាធសង្គមការងារ បច្ចេកវិទ្យា សេដ្ឋកិច្ច និងការប្រែប្រួលអាកាសធាតុជាដើម ។ ឆ្លើយតបនឹងប្រឈមទាំងនេះ ការថែទាំសុខភាព ពង្រឹងការអប់រំ និងធ្វើកំណែទម្រង់ប្រព័ន្ធផ្សព្វផ្សាយ ជាចំណែកនាំឱ្យយុវវ័យមានសុខដុមរមនាក្នុងការរស់នៅ។

ក្នុងបរិបទមួយដែលមានសន្ទុះយុវវ័យក្មេងៗ មានវិបត្តិច្រើន និងមិនសម្បូរភាពរីករាយ គឺមានកត្តារួមផ្សំជាច្រើនដូចជា ប្រឈមនឹងបញ្ហាសេដ្ឋកិច្ចព្រោះការចំណាយមានការកើនឡើង ហើយទីផ្សារការងារក៏មានការប្រកួតប្រជែង ។ ទន្ទឹមគ្នានោះ ក៏មានសម្ពាធពីបច្ចេកវិទ្យានិងប្រព័ន្ធផ្សព្វផ្សាយ រួមទាំងអាការៈថប់បារម្ភដោយសារតែបម្រែបម្រួលអាកាសធាតុ និងស្ថានភាពនយោបាយផងដែរ។ ដើម្បីជំរុញសុភមង្គល និងបរិយាកាសឱ្យប្រសើរទៅកាន់យុវវ័យនិងពិភពលោក គេហទំព័រ World Economic Forum បានបង្ហាញ៤ចំណុចដែលជាចំណែកជំរុញ និងទប់ទល់ក្ដីបារម្ភរបស់យុវវ័យ។

១. ផ្តល់អាទិភាពគាំទ្រជាសកលចំពោះសុខភាពផ្លូវចិត្ត ៖ ផ្តល់ការគាំទ្រតាមរយៈការវិនិយោគចំពោះសុខភាពផ្លូវចិត្តទៅកាន់យុវវ័យទាំងនៅក្នុងសាលារៀន សហគមន៍ រួមទាំងពិភពលោកទាំងមូល។ ការបង្កើតឱ្យមានកម្មវិធីពង្រឹងការអប់រំចិត្ត ជាកត្តាជួយកាត់បន្ថយភាពតានតឹង និងស្រ្តេសចំពោះយុវវ័យ។ បន្ថែមពីនោះ ការផ្តល់ជំនួយប្រឹក្សានិងបង្វឹកបង្ហាត់សុខភាពផ្លូវចិត្តតាមអនឡាញ មិនត្រឹមតែផ្តល់នូវបរិយាកាសដែលពោរពេញដោយសុខដុមរមនាប៉ុណ្ណោះទេ ប៉ុន្តែវាក៏បានកាត់បន្ថយការចំណាយពេល និងផ្តល់ភាពងាយស្រួលទៅកាន់យុវវ័យផងដែរ។

២. ជំរុញឱ្យបង្កើតទំនាក់ទំនងតាមរយៈវប្បធម៌ ៖ ការបង្កើតឱ្យមានកម្មវិធីផ្លាស់ប្តូរតាមរយៈវប្បធម៌ ជាលក្ខណៈអន្តរជាតិ វាមិនត្រឹមតែជាឱកាសរៀនសូត្រប៉ុណ្ណោះទេ ប៉ុន្តែវាបានជំរុញឱ្យប្រជាជនកាន់តែចង់យល់ដឹងអំពីគ្នាបន្ថែម និងបង្កើត ឬរក្សាមិត្តភាពដ៏រឹងមាំបានមួយកម្រិតទៀត។ ការលើកទឹកចិត្តឱ្យមនុស្សមានទំនាក់ទំនងគ្នា គេអាចធ្វើឱ្យកើតមានតាមរយៈសកម្មភាពឯទៀតដូចជា បង្កើតបណ្តាញសង្គមតាមរយៈអនឡាញដែលជជែកនិងគិតអំពីផលប្រយោជន៍រួមឬប្រយោជន៍សកល ឬក៏កម្មវិធីដែលជជែកអំពីបរិស្ថាន ធ្វើយ៉ាងណាឱ្យយុវវ័យម្នាក់ៗផ្សារភ្ជាប់នឹងសង្គម ក៏ដូចជារកឃើញអំពីគុណតម្លៃនៃការរស់នៅបន្ត។

៣. កំណែទម្រង់ប្រព័ន្ធផ្សព្វផ្សាយ ៖ ការយកចិត្តទុកដាក់ រឹតបន្តឹងព័ត៌មានដែលនាំឱ្យបំពុលសង្គម ដូចជាព័ត៌មានប្រតិដ្ឋ និងព័ត៌មានដើម្បីតែផលប្រយោជន៍បុគ្គលប៉ុន្តែធ្វើឱ្យប៉ះពាល់ធ្ងន់ធ្ងរទៅកាន់សង្គម ការដោះបញ្ហានេះបានជាចំណែកសំខាន់ក្នុងការកសាងប្រព័ន្ធផ្សព្វផ្សាយឱ្យទៅជាកន្លែងដែលមានបរិយាកាសល្អ។ ទន្ទឹមគ្នានោះ ការបង្រៀន និងចែកចាយអំពី មូលដ្ឋានគ្រឹះនៃការប្រើប្រាស់មុខងារអេឡិចត្រូនិច និងកម្មវិធីប្រព័ន្ធផ្សព្វផ្សាយ ដូចជាការកំណត់ម៉ោងក្នុងការប្រើប្រាស់អេក្រង់ដោយគិតទៅតាមអាយុកាលរបស់អ្នកប្រើប្រាស់ ក៏ចូលរួមចំណែកក្នុងចំណុចកំណែទម្រង់ប្រព័ន្ធផ្សព្វផ្សាយឱ្យមានភាពល្អប្រសើរបន្ថែម។

៤. ផ្តល់ការអប់រំដែលល្អ ៖ ការសិក្សាតម្រូវឱ្យបង្កើនវិសាលភាពនៃការបំពាក់នូវបរិក្ខារល្អៗ អាចអនុវត្តន៍ជំនាញដែលយុវវ័យរៀនបាន ពីព្រោះថាថ្ងៃនេះពួកគេជាសិស្សពិតមែន ប៉ុន្តែពេលខាងមុខពួកគេធនធានជាតិ ផលិតសមិទ្ធិដល់សង្គម។ បន្ថែមពីនោះ បង្កើតឱ្យមានសិក្ខាសាលានិយាយអំពីមូលដ្ឋានគ្រឹះនៃការប្រើប្រាស់ហិរញ្ញវត្ថុ គឺជាការពង្រឹងសិទ្ធអំណាដល់យុវវ័យក្នុងការសម្រេចចិត្តចាយវាយទ្រព្យធន និងការប្រើប្រាស់ហិរញ្ញវត្ថុចំគោលដៅ និងមានប្រសិទ្ធភាព​។ ទន្ទឹមគ្នានោះផ្តល់ប្រព័ន្ធអប់រំដែលជំរុញនូវការប្រើអនឡាញដែលមានសុវត្ថិភាព ផាសុកភាព រួមទាំងការប្រើប្រាស់ប្រព័ន្ធផ្សព្វផ្សាយប្រកបដោយទំនួលខុសត្រូវ៕