អ្វីដែលជួយកុមារពង្រឹងមុខងារយល់ដឹង ឬថាមពលខួរក្បាល នាំឱ្យពួកគេមានលទ្ធផលសិក្សាល្អ និងឈានទៅរកភាពជោគជ័យក្នុងជីវិត គឺជាប្រធានបទមួយ ដែលមានការចាប់អារម្មណ៍ពីអាណាព្យាបាលជាច្រើន។

ការសិក្សានាពេលថ្មីៗនេះ បានបង្ហាញថា ការអភិវឌ្ឍខួរក្បាលរបស់កុមារ អាចសម្រេចបានភាពពេញលេញទៅបាន អាស្រ័យលើកត្តា ៣យ៉ាង ដែលក្នុងនោះមានដូចជា ការធ្វើសកម្មភាពរាងកាយ ឬលំហាត់ប្រាណ ការគេងលក់ស្កប់ស្កល់ និងកំណត់ម៉ោងនៅជាមួយអេក្រង់ត្រឹមត្រូវ។

លទ្ធផលនៃការសិក្សានេះ បានបោះពុម្ពផ្សាយនៅក្នុង Lancet Child & Adolescent Health ដោយបានពិនិត្យលើទិន្នន័យកុមារជាង ៤,៥០០នាក់ ដែលមានអាយុចន្លោះពី ៨ ទៅ ១១ឆ្នាំ ដែលចូលរួមក្នុងការស្រាវជ្រាវអំពីការបណ្ដុះបណ្ដាលអនាគតក្មេងជំទង់ និងមុខងារយល់ដឹងខួរក្បាល (ABCD)។ កុមារទាំងនេះ ត្រូវបានស្នើសុំឱ្យធ្វើតេស្តស្ដង់ដារ ចំនួន ៦ ដែលវាស់ស្ទង់ជំនាញភាសា ការចងចាំ សមត្ថភាពធ្វើផែនការ និងល្បឿនក្នុងការបំពេញកិច្ចការ។

ជាលទ្ធផល សកម្មភាពទាំង ៣នេះ មានឥទ្ធិពលខ្លាំងលើការអភិវឌ្ឍខួរក្បាល និងភាពជោគជ័យនាពេលអនាគតរបស់កុមារ។

ការសិក្សានេះ មិនមែនជារឿងថ្មីនោះទេ ប៉ុន្តែវាជាលើកទីមួយហើយ ដែលការសិក្សាបានស្រាវជ្រាវពីឥទ្ធិពលរួមនៃសកម្មភាពកុមារ ទៅលើមុខងារខួរក្បាល លទ្ធផលសិក្សា និងសកម្មភាពទូទៅក្នុងសាលារៀន នៅពេលដែលពួកគេគ្រប់អាយុចូលរៀន។

សម្រាប់កុមារ គ្រប់អាយុចូលរៀន បើយោងតាមការណែនាំអំពីការគេងតាមអាយុរបស់ American Academy of Sleep Medicine (AASM) បានណែនាំថា ពួកគេ ត្រូវការពេលយ៉ាងតិច ៩ ទៅ ១២ម៉ោង ដើម្បីមានសុខភាពល្អ។ អត្ថប្រយោជន៍ ដែលកុមារ និងក្មេងជំទង់ ទទួលបានពីការគេងគ្រប់គ្រាន់រួមមាន ការផ្ដោតអារម្មណ៍បានល្អ អាកប្បកិរិយាវិជ្ជមាន ការរៀនសូត្រឆាប់ចាំ ការគ្រប់គ្រងអារម្មណ៍បានល្អ គុណភាពជីវិតខ្ពស់ និងសុខភាពផ្លូវកាយ ផ្លូវចិត្តរឹងមាំ។

ដោយឡែក សម្រាប់ការធ្វើសកម្មភាពរាងកាយ ក្រៅតែពីការកាត់បន្ថយភាពធាត់ ការធ្វើសកម្មភាពរាងកាយ ក៏ជួយឱ្យកុមារមានលទ្ធផលសិក្សាល្អផងដែរ។ លំហាត់ប្រាណជួយបង្កើនលំហូរអុកស៊ីហ្សែនក្នុងខួរក្បាលដែលជះឥទ្ធិលដល់មុខងារយល់ដឹងរបស់ខួរក្បាល រួមទាំងពង្រឹងការផ្ដោតអារម្មណ៍ និងការយកចិត្តទុកដាក់បានល្អប្រសើរជាងមុន។

ចំពោះបច្ចេកវិទ្យា និងអេក្រង់ ផ្ដល់អត្ថប្រយោជន៍ជាច្រើនដល់កុមារ ដូចជាការសិក្សាតាមរយៈកម្មវិធីទូរស័ព្ទ វីដេអូអប់រំ និងការលេងហ្គេម ប៉ុន្តែពួកគេអាចទទួលបានអត្ថប្រយោជន៍ទាំងនេះ លុះត្រាតែពួកគេប្រើបច្ចេកវិទ្យាដោយភាពឆ្លាតវៃ។ ផ្ទុយទៅវិញ ការប្រើបច្ចេកវិទ្យាច្រើនពេក មិនល្អទេ សម្រាប់មនុស្ស និងជាពិសេសគឺកុមារ។ ព្រោះនៅពេលដែលក្មេងៗពឹងផ្អែកខ្លាំងពេកលើអេក្រង់ ពួកគេអាចប្រឈមនឹងការចុះខ្សោយសុខភាព ការអភិវឌ្ឍខួរក្បាល និងរាងកាយយឺត ព្រមទាំងលទ្ធផលការសិក្សាមិនល្អ៕