ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
វិទ្យាស្ថានពហុបច្ចេកទេសខេត្តកំពង់ស្ពឺបានប្រកាសផ្ដល់ជូនអាហារូបករណ៍ ១០០% សម្រាប់ការបណ្ដុះបណ្ដាលជំនាញវិជ្ជាជីវៈកម្រិត១ ចំនួន៧៧៥កន្លែង ដល់ក្រុមយុវជនមកពីគ្រួសារក្រីក្រ និងគ្រួសារងាយរងហានិភ័យ ព្រមទាំងមានប្រាក់ឧបត្ថម្ភប្រចាំខែថែមទៀតផង។
មុខជំនាញដែលត្រូវផ្តល់ជូនសម្រាប់ការបណ្តុះបណ្តាលរួមមាន ៖ (១).ជំនាញការងារកំបោរ ចំនួន២០០នាក់, (២).ជំនាញដំឡើងបណ្ដាញបំពង់ទឹក ចំនួន២៥នាក់, (៣).ជំនាញបណ្ដាញអគ្គិសនីក្នុងអគារ ចំនួន១៩០នាក់, (៤).ជំនាញដំឡើងពុម្ភ ចំនួន២៥នាក់, (៥).ជំនាញផ្សារអគ្គិសនី ចំនួន៣៥នាក់, (៦).ជំនាញថែទាំនិងជួសជុលម៉ាស៊ីនត្រជាក់រថយន្ត ចំនួន៣០នាក់, (៧).ជំនាញថែទាំនិងជួសជុលអគ្គិសនីរថយន្ត ចំនួន២៥នាក់, (៨).ជំនាញថែទាំនិងជួសជុលរថយន្តចំនួន ចំនួន៣៥នាក់, (៩).ជំនាញរចនាក្រាហ្វិកដោយកុំព្យូទ័រ ចំនួន២៥នាក់, (១០).សេវាកម្មកុំព្យូទ័រ ចំនួន២៥នាក់, (១១).សេវាកម្មរដ្ឋបាល ចំនួន២៥នាក់, (១២).ជំនាញដំឡើងនិងអនុវត្តបច្ចេកវិទ្យាឌីជីថល ចំនួន២៥នាក់, (១៣).ជំនាញផ្ដល់សេវាកម្មបរិក្ខារត្រជាក់ក្នុងគេហដ្ឋាន ចំនួន៦០នាក់ និង (១៤).ជំនាញធុរកិច្ចភេសជ្ជៈ ចំនួន៥០នាក់។
បើតាមលោក កែម ជាក់នី នាយកវិទ្យាស្ថានពហុបច្ចេកទេសខេត្តកំពង់ស្ពឺ ការជ្រើសរើសសិក្ខាកាមសម្រាប់វគ្គសិក្សាថ្មី គឺចាប់ថ្ងៃទី១ ខែមិថុនា ឆ្នាំ២០២៥ តទៅ។ ការចូលសិក្សានឹងចាប់ផ្ដើមនៅថ្ងៃទី១ នៃខែនីមួយៗ រហូតដល់ខែតុលា ឆ្នាំ២០២៥។
សម្រាប់យុវជនគោលដៅទាំងពីរក្រុមខាងលើដែលចាប់អារម្មណ៍ក្នុងការដាក់ពាក្យ សូមទាក់ទងមកកាន់វិទ្យាស្ថានពហុបច្ចេកទេសខេត្តកំពង់ស្ពឺ ដែលមានទីតាំងនៅភូមិទំពូង ឃុំកាហែង ស្រុកសំរោង ខេត្តកំពង់ស្ពឺ ឬទំនាក់ទំនងតាមរយៈទូរស័ព្ទលេខ ០១២ ៩៩៥ ៩៥២។
គួរបញ្ជាក់ថា ក្រៅពីក្រុមយុវជនគោលដៅមកពីគ្រួសារក្រីក្រ និងគ្រួសារងាយរងហានិភ័យ វគ្គបណ្ដុះបណ្ដាលពិសេសនេះក៏បើកចំហសម្រាប់យុវជន និងប្រជាពលរដ្ឋទូទៅ រួមទាំងកម្មករ-កម្មការិនីផងដែរ ដែលអាចដាក់ពាក្យចូលសិក្សាជំនាញបច្ចេកទេសវិជ្ជាជីវៈនេះបានដោយឥតបង់ថ្លៃដូចគ្នា គ្រាន់តែមិនទទួលបានប្រាក់ឧបត្ថម្ភប្រចាំខែពីរាជរដ្ឋាភិបាល៕
