តាមរយៈ​ឯកសារ​ទស្សនវិស័យ​មុខរបរ និង​ការងារ ដែលចេញផ្សាយ​នៅថ្ងៃនេះ (២៣ មីនា) ក្រសួងការងារ និង​បណ្តុះបណ្តាលវិជ្ជាជីវៈ បាន​បញ្ជាក់ថា ក្នុងឆ្នាំ២០២៦នេះ ទីផ្សារ​ការងារ​នៅប្រទេសកម្ពុជា នឹង​មាន​ការ​វិវត្តយ៉ាងខ្លាំងក្លា ឆ្ពោះទៅ​រក​ការ​ប្រើប្រាស់​ពលកម្ម​ជំនាញ និង​បច្ចេកទេស ដើម្បីជំរុញ​ផលិតភាពជាតិ។

បើតាម​ក្រសួង ក្រុម​កម្មករ​ជំនាញ និង​ការីម៉ាស៊ីន នឹងមានតម្រូវ​ការ​ខ្ពស់ជាងគេ​រហូត​ដល់ជិត៣សែននាក់ ដែលភាគ​ច្រើ​ន​មក​ពីវិស័យ​កាត់ដេរ ស្បែកជើង និង​កាបូប (GFT)។ ដោយឡែកសម្រាប់ក្រុម​អ្នកគ្រប់គ្រង វិស្វករ និង​អ្នក​បច្ចេកទេស ត្រូវ​ការ​កម្លាំង​ពលកម្ម​ប្រមាណជិត ៣ម៉ឺននាក់ តែទាមទារ​ឱ្យ​មានគុណវុឌ្ឍិខ្ពស់ ចាប់ពីកម្រិតបច្ចេកទេសជាន់ខ្ពស់ឡើងទៅ។

ការវិវត្ត​របស់ទីផ្សារ​ការងារកម្ពុជា ពីការប្រើប្រាស់កម្លាំងពលកម្ម​ដែលគ្មានជំនាញ ​និងជំនាញតាមបែបប្រពៃណី មកជាពលកម្មជំនាញ និងបច្ចេកទេស ក៏ព្រោះតែការផ្លាស់ប្តូររចនាសម្ព័ន្ធការងារកំពុងកើតឡើងយ៉ាងឆាប់រហ័សឆ្ពោះទៅ​រក​សេដ្ឋកិច្ច​បៃតង បច្ចេកវិទ្យាឌីជីថល និងទិន្នន័យ។ ទិន្នាការនេះ តម្រូវ​ឱ្យ​មានការ​រៀបចំ​ក្របខណ្ឌគុណវុឌ្ឍិ និងជណ្តើរអាជីព​ឱ្យបានច្បាស់លាស់ ដើម្បីតម្រង់ទិស​យុវជន​ឱ្យ​ចាប់យក​ជំនាញ​ដែលឆ្លើយតបនឹង​តម្រូវការទីផ្សារ​ការងារនាពេលអនាគត។

ជាមួយគ្នានេះ ផ្អែក​ទៅលើ​ការព្យាករ និង​វិភាគ​ទៅលើ​តម្រូវ​ការ​ការងារ ដែលមាន​ក្នុង​អនុវិស័យទាំង១៤ ក្រសួងបានបង្ហាញពី​ជំនាញកម្រិតខ្ពស់​ (គុណវុឌ្ឍិ ៖ បរិញ្ញាបត្រ ឬបរិញ្ញាបត្រជានខ្ពស់) ដែល​កំពុង​មានតម្រូវ​ការខ្ពស់ ព្រមទាំងផ្តល់នូវស្ថិរភាពការងារក្នុងយុគសម័យសេដ្ឋកិច្ច​ឌីជីថល ដូចជា ជំនាញសេដ្ឋកិច្ច, វិស្វកម្មរថយន្ត នាវា និងយន្តហោះ, ការរចនា និង​ការ​គ្រប់គ្រង​មូលដ្ឋានទិន្នន័យ និង​បណ្តាញ, បច្ចេកវិទ្យាការពារបរិស្ថាន, ការបណ្តុះបណ្តាល​គ្រូបង្រៀន​ដែលមាន​ឯកទេស​មុខវិជ្ជា, ការអភិវឌ្ឍ និង​ការ​វិភាគ​កម្មវិធីកុំព្យូទ័រ, វេជ្ជសាស្រ្ត, អេឡិចត្រូនិច និង​ស្វ័យប្រវត្តិកម្ម, ការធានាគុណភាព, ហិរញ្ញវត្ថុ ធនាគារ និង​ធានារ៉ាប់រង, វិទ្យាសាស្រ្តទិន្នន័យ និង​កម្មវិធី Gen AI, ការស្រាវជ្រាវទីផ្សារ, មេកានិច និងមុខរបរលោហៈ, អគ្គិសនី និងថាមពល, សុខភាព និងសុវត្ថិភាពការងារ, ការ​គ្រប់គ្រង និងរដ្ឋបាល។

ស្របគ្នានេះ ជំនាញកម្រិតទាប (គុណវុឌ្ឍិ ៖ មធ្យមសិក្សា ឬវិញ្ញាបនបត្រវិជ្ជាជីវៈ ឬសញ្ញាបត្របច្ចេកទេស) ដែលមានតម្រូវការ​ខ្ពស់ ក៏​ក្រសួងបានបង្ហាញដែរ ដូចជា ការងារលេខាធិការដ្ឋាន និង​ការងារការិយាល័យ, សណ្ឋាគារ ភោជនីយដ្ឋាន និងអាហារដ្ឋាន, ទីផ្សារ និង​ការផ្សព្វផ្សាយ​ពាណិជ្ជកម្ម, ផលិតកម្មដំណាំ និងសត្វចិញ្ចឹម, វាយនភ័ណ្ឌ (សម្លៀកបំពាក់ ស្បែកជើង និងស្បែក), ការផលិត និងការកែច្នៃ, បណ្ណារក្សវិទ្យា ព័ត៌មាន និងការសិក្សាបណ្ណសារដ្ឋាន, ការ​បណ្តុះបណ្តាលសេវាអតិថិជនការធ្វើដំណើរ ទេសចរណ៍ និងការ​កម្សាន្ត ជាដើម។

ជំនាញដែលរៀបរាប់ខាងលើនេះ ​ត្រូវគេប្រើ​ប្រាស់​នៅក្នុងអនុវិស័យដូចជា វាយនភណ្ឌកាត់ដេរ ផលិតស្បែកជើង, ផលិតអាហារ និងភេសជ្ជៈ, សំណង់, ដឹកជញ្ចូន និងស្តុកទំនិញ, ស្នាក់នៅ និង​ភោជនីយដ្ឋាន, អប់រំ, ហិរញ្ញវត្ថុ និងធានារ៉ាប់រង, សេវាសុខាភិបាល, ផលិតកៅស៊ូ និង​ប្លាស្ទិក, ផលិតគ្រឿងអេឡិចត្រូនិក និង​ឧបករណ៍អគ្គិសនី, បច្ចេកវិទ្យា គមនាគមន៍ និង​ព័ត៌មានវិទ្យា, ផលិតផលឈើ ក្រដាស និង​បោះពុម្ព, កម្មន្តសាលផលិត និង​ដំឡើងយានយន្ត ព្រមទាំង កម្មន្តសាលផ្សេងៗ។

យោង​តាមទិន្នន័យរបស់ក្រសួងការងារដដែល នៅក្នុងឆ្នាំ២០២៥ សហគ្រាស ក្រុមហ៊ុន រោងចក្រ ដែល​បានបើក​ដំណើរការ​នៅកម្ពុជា​មានសរុបចំនួន ៤៦ ៦៤៩ កើនឡើង ១៨៥១សហគ្រាស បើធៀបនឹងឆ្នាំ២០២៤ ក្នុងនោះវិស័យកាត់ដេរ កើនឡើង ៣០១សហគ្រាស និងក្រៅពីវិស័យកាត់ដេរ កើន ១៥៥០សហគ្រាស ដែលភាគច្រើន​ក្នុងវិស័យផលិត ណិងដំឡើងយានយន្ត៕