យោងតាមការសិក្សាថ្មីៗនេះ បានរកឃើញពីផលប៉ះពាល់ នៃការប្រើអេក្រង់ច្រើនលើកម្រិត របស់កុមារ នៅវ័យក្មេងខ្លាំងពេក និងជំរុញកុមារ ចូលរួមក្នុងការងារសង្គម និងសកម្មភាពរាងកាយបន្ថែមទៀត។

អ្នកវិទ្យាសាស្ត្រ ដែលបានដឹកនាំការសិក្សារយៈពេល ១០ឆ្នាំ ដែលបានចេញផ្សាយ កាលពីសប្ដាហ៍កន្លងទៅនៅប្រទេសសិង្ហបុរី បាននិយាយថា អន្តរាគមន៍ដំបូង និងការផ្លាស់ប្ដូររបៀបរស់នៅវិជ្ជមាន អាចស្ដារខួរក្បាល ដែលកំពុងអភិវឌ្ឍរបស់កុមារ។

ការសម្លឹងមើលអេក្រង់ច្រើន នៅចន្លោះពេលកុមារទើបតែកើត រហូតដល់អាយុ ២ឆ្នាំ ត្រូវបានគេរកឃើញថា ធ្វើឱ្យកុមារ ប្រឈមនឹងបញ្ហាសម្រេចចិត្តយឺត និងការថប់បារម្ភ នៅពេលពួកគេដឹងក្ដី, នេះបើយោងតាមការព្រមានរបស់អ្នកស្រាវជ្រាវ មកពីសាកលវិទ្យាល័យជាតិសិង្ហបុរី (NUS) មន្ទីរពេទ្យស្ត្រី និងកុមារ និងទីភ្នាក់ងារវិទ្យាសាស្ត្រ បច្ចេកវិទ្យា និងការស្រាវជ្រាវ ។

អ្នកស្រាវជ្រាវបានតាមដានកុមារប្រហែល ១៧០នាក់ ដែលកើតនៅក្នុងឆ្នាំ២០០៩ ក្នុងរយៈពេលជាង ១០ឆ្នាំ ដោយសិក្សា ចាប់តាំងពីពេលពួកគេកើត។

ការសិក្សានេះ គឺជាផ្នែកមួយនៃការសិក្សាក្រុមកំណើត Growing Up in Singapore Towards Healthy Outcomes (GUSTO) ដែលស្វែងយល់ពីរបៀប ដែលស្ថានភាពអំឡុងពេលមានផ្ទៃពោះ និងកុមារភាពដំបូងប៉ះពាល់ដល់សុខភាព ការលូតលាស់ និងការអភិវឌ្ឍរបស់ម្ដាយ និងទារក។

ការស្កេនខួរក្បាល បានធ្វើឡើងនៅដំណាក់កាលផ្សេងៗគ្នា នៃការអភិវឌ្ឍរបស់កុមារ ដើម្បីសិក្សាពីផលប៉ះពាល់រយៈពេលវែង នៃការនៅជាមួយអេក្រង់ក្នុងវ័យក្មេងខ្លាំងពេក។

ការសិក្សាបានរកឃើញថា សម្រាប់កុមារ ដែលមានអាយុរហូតដល់ ២ឆ្នាំ រាល់ម៉ោងបន្ថែមនៃពេលវេលានៅជាមួយអេក្រង់ នឹងធ្វើឱ្យល្បឿននៃការសម្រេចចិត្តរបស់គេ យឺតជាងមុន ២៥ ភាគរយ នៅពេលពួកគេមានអាយុ ៨ឆ្នាំ។ នៅពេលឈានដល់វ័យជំទង់ ពួកគេចាប់ផ្ដើមប្រឈមនឹងរោគសញ្ញាថប់បារម្ភ។ ផលប៉ះពាល់នេះ ត្រូវបានគេសង្កេតឃើញនៅគ្រប់ផ្នែកទាំងអស់ នៃជីវភាពរស់នៅប្រជាជន។

សាស្ត្រាចារ្យរង Tan Ai Peng អ្នកស្រាវជ្រាវឈានមុខគេនៃការសិក្សា និងជាអ្នកវិទ្យាសាស្ត្រផ្នែកគ្លីនិកនៅ NUS បាននិយាយថា ទោះបីជាការសិក្សា បានរកឃើញពីផលវិបាក ដែលកើតឡើង បណ្ដាលមកពីអេក្រង់ក៏ដោយ, អ្នកជំនាញរូបនេះ សង្កត់ធ្ងន់ថា វាមិនទាន់ហួសពេលនោះទេ សម្រាប់អាណាព្យាបាល ក្នុងការចាត់វិធានការជួយកូនៗរបស់ខ្លួន។

លោកស្រីបន្ថែមថា វិធានការនោះ អាចធ្វើឡើង តាមរយៈសកម្មភាពសមញ្ញៗ ដូចជា អន្តរកម្មសង្គម និងការធ្វើសកម្មភាពរាងកាយ ដូចជា ការអានសៀវភៅជាមួយអាណាព្យាបាល ឬមិត្តភក្ដិ ការលេងល្បែងកម្សាន្ត ការដើរលេងក្រៅផ្ទះ និងសកម្មភាពផ្សេងៗទៀត ដែលសុទ្ធសឹងតែអាចជួយពង្រឹងខួរក្បាល និងរាងកាយ៕