ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា និងទីភ្នាក់ងារសហប្រតិបត្តិការអន្តរជាតិជប៉ុន (JICA) កំពុងជំរុញការអប់រំគ្រូបង្រៀននៅកម្ពុជាតាមរយៈការច្នៃប្រឌិតឌីជីថល ដោយបង្ហាញពីរបៀបដែលបច្ចេកវិទ្យាកំពុងបើកឱកាសថ្មីគួរឱ្យរំភើបសម្រាប់ការបង្រៀន និងរៀននៅទូទាំងប្រទេស។
ក្នុងពិព័រណ៍ស្ទែមប្រចាំឆ្នាំលើកទី៣ នៅវិទ្យាស្ថានគរុកោសល្យបាត់ដំបង ក្រោមប្រធានបទ “សហថាមពល នៃការប្រើប្រាស់បច្ចេកវិទ្យាអប់រំ និងបញ្ញាសិប្បនិម្មិតក្នុងការបង្កើតគ្រូបង្រៀនឌីជីថលនៅកម្ពុជា” ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ ដោយថ្លែងអំណរគុណយ៉ាងជ្រាលជ្រៅដល់ រដ្ឋាភិបាលជប៉ុន តាមរយៈ JICA ដែលបានបន្តគាំទ្រដល់ការបណ្ដុះបណ្ដាលគ្រូនៅកម្ពុជា និងជំរុញឱ្យពិព័រណ៍ស្ទែម ជួយបណ្តុះគំនិតច្នៃប្រឌិតនវានុវត្តន៍ដល់គរុនិស្សិត។
បើតាមឯកឧត្តមរដ្ឋមន្ត្រី ក្រសួងអប់រំបាននិងកំពុងយកចិត្តទុកដាក់យ៉ាងខ្លាំងលើការជំរុញ គាំទ្រ និងបង្កបរិយាកាសនៃការអប់រំ និងអភិវឌ្ឍសមត្ថភាពស្ទែមរបស់សិស្ស និងគ្រូបង្រៀនកម្ពុជាឱ្យកាន់តែទូលំទូលាយ ឆ្លើយតបនឹងតម្រូវការរបស់ប្រទេស និងនិន្នាការពិភពលោក។
ឯកឧត្តមបណ្ឌិតសភាចារ្យ ហង់ជួន ណារ៉ុន បន្ថែមថា ការអភិវឌ្ឍសមត្ថភាពស្ទែមរបស់សិស្ស និងគ្រូបង្រៀនកម្ពុជា ធ្វើឡើងតាមរយៈការអនុវត្តកញ្ចប់អំណាន និងគណិតវិទ្យាថ្នាក់ដំបូង ការប្រើប្រាស់បច្ចេកវិទ្យាអប់រំ (EdTech) ផ្សេងៗ ដូចជា កម្មវិធីថ្នាលបឋមសិក្សា PLP ថ្នាលសាលាឌីជីថល (Sala Digital) ថ្នាលទូរសិក្សា (Durarseksa)។ លើសពីនេះ ការបញ្ជ្រាបការប្រើប្រាស់បច្ចេកវិទ្យាបញ្ញាសិប្បនិម្មិត (AI) ដើម្បីលើកកម្ពស់គុណភាព និងប្រសិទ្ធភាពនៃការបង្រៀន និងការរៀន តាមសាលារៀន និងគ្រឹះស្ថានបណ្តុះបណ្តាលគ្រូ ឆ្ពោះទៅការលើកកម្ពស់គុណភាពអប់រំនៅកម្ពុជា។
លោក SANUI Kazumasa ប្រធានតំណាងការិយាល័យ JICA ប្រចាំកម្ពុជា បានបញ្ជាក់អំពីភាពជាដៃគូដ៏រឹងមាំរបស់ JICA ជាមួយក្រសួងអប់រំ យុវជន និងកីឡា ក្នុងការជំរុញការអប់រំគ្រូបង្រៀនតាមរយៈការច្នៃប្រឌិតឌីជីថល។ លោកបានលើកឡើងពីគំនិតផ្តួចផ្តើមសំខាន់ៗដូចជា វិទ្យាស្ថានគរុកោសល្យនៅភ្នំពេញ និងបាត់ដំបង ព្រមទាំងមជ្ឈមណ្ឌលឧត្តមភាពក្នុងខេត្តកំពង់ចាមដែលនឹងប្រែក្លាយនាពេលខាងមុខនេះ។
លោក SANUI Kazumasa បន្ថែមថា JICA គាំទ្រចំពោះកិច្ចខិតខំប្រឹងប្រែងដែលជំរុញការច្នៃប្រឌិតក្នុងវិស័យអប់រំ និងលើកកម្ពស់ការផ្លាស់ប្តូរឌីជីថលរបស់កម្ពុជា។ លោកជឿជាក់ថា ការវិនិយោគលើបច្ចេកវិទ្យាបែបនេះមានសារៈសំខាន់សម្រាប់ការអភិវឌ្ឍប្រកបដោយចីរភាពរបស់ប្រទេសកម្ពុជា និងបំណងប្រាថ្នារបស់ខ្លួនក្នុងការក្លាយជាសង្គមដែលផ្អែកលើចំណេះដឹង។
គួរជំរាបជូនដា ពិព័រណ៍ស្ទែមប្រចាំឆ្នាំលើកទី៣ បានប្រមូលផ្តុំលោកគ្រូអ្នកគ្រូ សិស្សានុសិស្ស អ្នកសម្រេចចិត្តខាងគោលនយោបាយ និងដៃគូអភិវឌ្ឍន៍ ដើម្បីស្វែងយល់ពីឥទ្ធិពលផ្លាស់ប្តូរនៃការប្រើប្រាស់បច្ចេកវិទ្យាអប់រំ និងបញ្ញាសិប្បនិម្មិតលើប្រព័ន្ធអប់រំរបស់ប្រទេសកម្ពុជា ជាពិសេសក្នុងការរៀបចំគ្រូបង្រៀនជំនាន់ថ្មីដែលផ្តល់អំណាចតាមឌីជីថល។ តាមរយៈការតាំងពិពណ៌ និងការពិភាក្សាយ៉ាងសកម្ម ព្រឹត្តិការណ៍នេះបានបង្ហាញពីរបៀបដែលបច្ចេកវិទ្យាកំពុងបើកឱកាសថ្មីគួរឱ្យរំភើបសម្រាប់ការបង្រៀន និងរៀននៅទូទាំងប្រទេស៕
