​និស្សិត​ខ្មែរ​មួយ​ក្រុម​បាន​អភិវឌ្ឍ​ប្រព័ន្ធ​បញ្ញា​សិប្បនិម្មិត​ ​(​AI​) ​ឈ្មោះ​ ​Math​ ​Vision​ ​ដែល​អាច​ដោះស្រាយ​លំហាត់​គណិតវិទ្យា​ ​និង​ពន្យល់​វិធី​ធ្វើជា​ភាសា​ខ្មែរ​ ​ដោយ​មាន​គោលបំណង​ជួយ​សិស្ស​កម្ពុជា​ឱ្យ​កាន់តែ​ងាយស្រួល​ក្នុង​ការ​សិក្សា​មុខវិជ្ជា​គណិតវិទ្យា​ ​និង​លើកកម្ពស់​ការ​រៀន​ផ្នែក​ ​STEM​។​

​និស្សិត​ ​ហង់ ​សុណ្ណា​រិទ្ធិ ​ស្ថាបនិក ​និង​ជា​អ្នក​អភិវឌ្ឍន៍​គម្រោង​ ​Math​ ​Vision​ ​ដែល​បច្ចុប្បន្ន​កំពុង​សិក្សា​នៅ​ប្រទេស​ឥណ្ឌា ​បាន​ប្រាប់​ ​AMS​ ​ថា​ ​ការ​បង្កើត​ ​AI​ ​នេះ​ ​កើត​ចេញពី​ការ​មើលឃើញ​ថា​ ​ឧបករណ៍​ ​AI​ ​សម្រាប់​ដោះស្រាយ​គណិតវិទ្យា​ភាគ​ច្រើន​ ​គាំទ្រ​តែ​ភាសា​អង់គ្លេស ​ឬ​ភាសា​បរទេស​ផ្សេង​ទៀត​ ​ដែល​ធ្វើឱ្យ​សិស្ស​កម្ពុជា​ជួបប្រទះ​ឧបសគ្គ​ផ្នែក​ភាសា​។​

ខ្ញុំ​បាន​បង្កើត​ ​Math​ ​Vision​ ​ឡើង​ក្នុង​គោលបំណង​លើកកម្ពស់​វិស័យ​ ​STEM​ ​និង​ផ្តល់​សមភាព​ក្នុង​ការ​ទទួលបាន​បច្ចេកវិទ្យា​អប់រំ​ទំនើប​ៗ ​សម្រាប់​សិស្ស​កម្ពុជា​គ្រប់​រូប ​ដោយ​មិន​គិត​ថ្លៃ​ ​និង​អាច​ប្រើប្រាស់​ជា​ភាសា​ជាតិ​របស់​ខ្លួន​

​លោក​បាន​ពន្យល់​ថា​ ​អ្នកប្រើប្រាស់​គ្រាន់តែ​ថត​រូប​ ​ឬ​វាយ​បញ្ចូល​លំហាត់​គណិតវិទ្យា​ ​ប្រព័ន្ធ​ ​OCR​ ​និង​ ​Multimodal​ ​AI​ ​នឹង​វិភាគ​រូបភាព​ ​អក្សរ​ និង​និមិត្ត​សញ្ញា​គណិតវិទ្យា​ ​មុន​បម្លែង​ទៅជា​ដំណោះស្រាយ​ជា​ជំហាន​ៗ​។​

​លោក​បាន​បន្ត​ថា​ ​ក្រុមការងារ​បាន​ប្រមូល​ទិន្នន័យ​លំហាត់​គណិតវិទ្យា​ចាប់ពី​កម្រិត​បឋមសិក្សា​ ​រហូតដល់​កម្រិត​សាកលវិទ្យាល័យ​ ព្រមទាំង​បកប្រែ​វា​ក្យ​សព្ទ​បច្ចេកទេស​គណិតវិទ្យា​ជា​ភាសា​ខ្មែរ​ ​ដើម្បី​បណ្តុះបណ្តាល​ ​AI​ ​ឱ្យ​យល់​ពី​ទម្រង់​លំហាត់​ និង​អត្ថន័យ​ភាសា​ខ្មែរ​បាន​កាន់តែ​ច្បាស់​។​

​បច្ចុប្បន្ន​ ​Math​ ​Vision​ ​អាច​ដោះស្រាយ​លំហាត់​ចាប់ពី​កម្រិត​បឋមសិក្សា​ មធ្យមសិក្សា​ ​រហូតដល់​កម្រិត​សាកលវិទ្យាល័យ​ ​រួមទាំង​មុខវិជ្ជា​ដូចជា​ ​ពី​ជគណិត​ ធរណី​មាត្រ ​ត្រីកោណ​មាត្រ ​ដេរី​វេ ​និង​អាំងតេក្រាល​។ ​លោក​អះអាង​ថា​ ​ប្រព័ន្ធ​មាន​ភាព​ត្រឹមត្រូវ​ប្រមាណ​ ​៨៥​% ​ដល់​ ​៩៥​% ​ដោយ​បាន​ធ្វើតេស្ត​ប្រៀបធៀប​ជាមួយ​ចម្លើយ​តាម​កម្មវិធី​សិក្សា​នៅ​កម្ពុជា​ ​និង​ផ្ទៀងផ្ទាត់​ដោយ​គ្រូបង្រៀន​ និង​និស្សិត​ផ្នែក​គណិតវិទ្យា​។​

​ទាក់ទង​នឹង​ការ​ព្រួយបារម្ភ​ថា​ ​សិស្ស​អាច​ពឹងផ្អែក​លើ​ ​AI​ ​ជំនួស​ការ​គិត​ដោយ​ខ្លួនឯង​ និស្សិត​ ​ហង់ ​សុណ្ណា​រិទ្ធិ ​បាន​បញ្ជាក់​ថា​ ​Math​ ​Vision​ ​ត្រូវបាន​រចនា​ឡើង​ដើម្បី​ជួយ​ឱ្យ​សិស្ស​យល់​ពី​ដំណើរការ​ដោះស្រាយ​ ​មិន​មែន​គ្រាន់តែ​បង្ហាញ​ចម្លើយ​ចុងក្រោយ​នោះ​ទេ​។ ​ផ្ទុយទៅវិញ​ ​ប្រព័ន្ធ​ផ្តោត​លើ​ការ​ពន្យល់​វិធី​ធ្វើជា​ជំហាន​ៗ​ ​ដើម្បី​ជំរុញ​ឱ្យ​អ្នក​សិក្សា​យល់​ពី​មូលដ្ឋាន​នៃ​ការ​គណនា​។​

​បច្ចុប្បន្ន ​គម្រោង​នេះ​នៅតែ​ត្រូវបាន​អភិវឌ្ឍ​ដោយ​លោក​ ​និង​ក្រុមការងារ​ ​ហើយ​មិន​ទាន់​មាន​កិច្ចសហការ​ជា​ផ្លូវការ​ជាមួយ​ស្ថាប័ន​អប់រំ ​ឬ​ក្រសួង​ណាមួយ​នៅ​ឡើយ​។ ​ទោះជា​យ៉ាងណា​ ​លោក​បាន​បង្ហាញ​បំណង​ចង់​សហការ​ជាមួយ​ក្រសួង​អប់រំ ​យុវជន​ និង​កីឡា ​សាកលវិទ្យាល័យ​ និង​ស្ថាប័ន​ពាក់ព័ន្ធ​ ​ដើម្បី​ពង្រីក​ការ​ប្រើប្រាស់​កម្មវិធី​នេះ​ និង​អភិវឌ្ឍ​វា​ឱ្យ​អាច​បម្រើ​ដល់​ប្រព័ន្ធ​អប់រំ​ជាតិ​នា​ពេល​អនាគត​៕