សង្គមមួយដែលមានការរីកចម្រើនខ្លាំង ជាសង្គមដែលមានធនធានមនុស្សខ្លាំង ពោលគឺជាធនធានមនុស្ស ដែលមានការអប់រំខ្ពស់ មានការគិតស៊ីជម្រៅ គំនិតច្នៃប្រឌិតខ្ពស់ និងមានភាពជាពលរដ្ឋល្អ ។ ដើម្បីទទួលបានធនធានមនុស្សខ្លាំង យុវជនត្រូវពង្រឹង និងបន្តអភិវឌ្ឍសមត្ថភាពរបស់ខ្លួនជាប្រចាំ ហើយយុវជនសម័យ ៤.0 ត្រូវចេះសួរខ្លួនឯងថា តើខ្ញុំអាចជួយអ្វីដល់គ្រួសារ និងសង្គមជាតិ? នេះជាការលើកឡើងរបស់លោក ឆេង សារ៉ាន់ អនុប្រធាននាយកដ្ឋានសហប្រតិបត្តិការកាយរឹទ្ធិ និងជាស្នងការបណ្ដុះបណ្ដាលកាយរឹទ្ធិជាតិកម្ពុជា ក្នុងឱកាសព្រឹត្តិការណ៍បោះជំរំកាយរឹទ្ធិអន្តរជាតិតាមរលកធាតុអាកាសលើកទី៦៦ និងតាមប្រព័ន្ធអ៊ីនធឺណិតលើកទី២៧ (JOTA-JOTI 2023) កាលពីពេលថ្មីៗនេះ។

លោក ឆេង សារ៉ាន់ បានចែករំលែកនូវសកម្មភាពសំខាន់ៗចំនួន ៦ ដែលយុវជនត្រូវអនុវត្ត ដើម្បីក្លាយជាធនធានមនុស្សឆ្នើម និងកោសិកាដ៏សំខាន់សម្រាប់សង្គមជាតិ ៖

១. ការអភិវឌ្ឍខ្លួន ៖ គឺជាជំហានដំបូង មុននឹងឈានទៅចូលរួមជួយអភិវឌ្ឍន៍សង្គមជាតិ, ដូច្នេះ អ្នកត្រូវស្គាល់ខ្លួនឯងឱ្យបានច្បាស់ ពោលគឺ ស្គាល់ពីចំណង់ចំណូលចិត្តខ្លួនឯង ទេពកោសល្យ ចំណុចខ្លាំង – ខ្សោយខ្លួនឯង ហើយចាប់ផ្ដើមកំណត់គោលដៅជីវិតឱ្យបានច្បាស់ ។ នៅពេលស្គាល់ខ្លួនឯងច្បាស់ គឺអ្នកអាចជួយអភិវឌ្ឍសង្គមជាតិទៅតាមគោលដៅជីវិតរបស់អ្នកបានយ៉ាងងាយ ពេលនោះគោលដៅនៅក្នុងជីវិតរបស់អ្នកក៏ទទួលជោគជ័យ ហើយកិច្ចការជួយអភិវឌ្ឍសង្គមក៏អ្នកបានធ្វើ។

២. បង្កើនចំណេះដឹងខ្លួនឯង ៖ ខំរៀនឱ្យបានពូកែដោយស្វែងរកចំណេះដឹងបន្ថែមក្រៅពីសាលារៀន ដូចជា អានសៀវភៅ ស្ដាប់កម្មវិធីវិទ្យុ មើលកម្មវិធីទូរទស្សន៍ រៀនពីបុគ្គលឆ្នើម បុគ្គលជោគជ័យចូលរួមក្នុងវេទិកាសាធារណៈ និងសិក្ខាសាលានានា ដែលទាក់ទិន នឹងការអប់រំការអភិវឌ្ឍខ្លួនឯង និងបញ្ហាសង្គមជាតិនានា។

៣. ភាពជាពលរដ្ឋ ៖ គោរពច្បាប់ ដែលរដ្ឋបានកំណត់មានសីលធម៌ល្អ មានគោលការណ៍ សុចរិតភាព ចូលរួមដោះស្រាយបញ្ហាសង្គមជាតិ មិនប្រព្រឹត្តិអំពើពុករលួយ មិនរំលោភទ្រព្យសម្បត្តិ និងសិទ្ធិអ្នកដទៃ មិនបង្កហិង្សាលើអ្នកដទៃ មិនគាំទ្រសកម្មភាពដែលបំផ្លាញជាតិ និងមិនធ្វើសកម្មភាព ឬទង្វើណាដែលប៉ះពាល់ដល់សង្គម។

៤. បណ្ដុះផ្នត់គំនិតស្រឡាញ់ជាតិ ៖ តាមដានព្រឹត្តិការណ៍សង្គម ស្ថានការណ៍នៃការវិវត្តក្នុងសង្គម ចូលរួមចំណែកដោះស្រាយបញ្ហាសង្គម និងអភិវឌ្ឍតាមរយៈការបរិច្ចាគ កម្លាំងកាយ កម្លាំចិត្ត ប្រាជ្ញា ឬទ្រព្យសម្បត្តិផ្សេងៗទៅតាម អ្វីដែលអ្នកអាចធ្វើទៅបាន ដើម្បីសង្គមជាតិ។

៥. ធ្វើការងារស្ម័គ្រជួយសង្គម ៖ យកពេលទំនេរ ឬឆ្លៀតពេលខ្លះ ដើ​ម្បីធ្វើការងារស្ម័គ្រចិត្តជួយអភវិឌ្ឍសង្គមជាតិ ដូចជា សម្អាតទីធ្លាសាធារណៈ ដាំកូនឈើ ជួយមនុស្សមានវិបត្តិ មនុស្សចាស់ ឬជួយបណ្ដុះបណ្ដាល ចែករំលែកចំណេះដឹង និងបទពិសោធន៍ទៅដល់អ្នកដទៃ ។ល។

៦. បញ្ចេញទស្សនៈផ្ទាល់ខ្លួន ៖ ចូលរួមចំណែកបញ្ចេញទស្សនៈគំនិត និងយោបល់ប្រកបដោយសេចក្ដីថ្លៃថ្នូរ ដោយគុណធម៌ មិនលំអៀង និងក្នុងន័យអប់រំ និងទិតៀន ដើម្បីស្ថាបនាដល់ពលរដ្ឋ យុវជន សិស្សនិស្សិត និងថ្នាក់ដឹកនាំនានា ដើម្បីរៀនសូត្រ ត្រិះរិះ អភិវឌ្ឍខ្លួន និងសង្គមជាតិ៕