នៅសល់រយៈពេលប៉ុន្មានសប្ដាហ៍ប៉ុណ្ណោះ ព្រឹត្តិការណ៍នៃការ​ប្រឡង​សញ្ញាបត្រមធ្យមសិក្សា​ទុតិយភូមិ ឬ​បាក់ឌុបនឹង​មក​ដល់ ដែល​តម្រូវ​ឱ្យ​សិស្សានុសិស្សថ្នាក់ទី១២ ត្រូវ​ត្រៀមខ្លួនសម្រាប់​ការ​ប្រឡងដ៏​មាន​សារៈសំខាន់មួយ​នេះ។ កញ្ញា ចាន់ ឌីវឌ្ឍនា ជានិស្សិតឆ្នាំទី១ ជំនាន់ទី៨ ជំនាញគ្រប់គ្រងពាណិជ្ជកម្មអន្តរជាតិ នៅវិទ្យាស្ថានស៊ីអ៊ីអូ និងអតីត​សិស្សនិទ្ទេស C ឆ្នាំ២០២២ បានចែក​រំលែ​ក​​បទពិសោធន៍ថា រយៈពេលមួយសប្ដាហ៍មុនប្រឡងបាក់ឌុប បេក្ខជនត្រូវថែរក្សាសុខភាពឱ្យល្អ និងត្រៀមចំណេះដឹងសម្រាប់ការប្រឡង ។​

កញ្ញា ចាន់ ឌីវឌ្ឍនា ជានិស្សិតឆ្នាំទី១ ជំនាន់ទី៨ ជំនាញគ្រប់គ្រងពាណិជ្ជកម្មអន្តរជាតិ នៅវិទ្យាស្ថានស៊ីអ៊ីអូ និងអតីត​សិស្សនិទ្ទេស C ឆ្នាំ២០២២ បាននិយាយថា​ សម្រាប់គន្លឹះត្រៀមខ្លួន១សប្ដាហ៍មុនប្រឡងបាក់ឌុប រួមមាន ៖

ទី១. ថែរក្សាសុខភាព ៖ កុំញ៉ាំអីផ្តេសផ្តាស ពិសេសអាហារដែលធ្វើឱ្យយើងធ្វើទុក្ខក្រពះ ដូចជា មី បុកល្ហុង ម្ជូរ ជាដើម។ ទន្ទឹមគ្នានេះ គេងឱ្យបានគ្រប់គ្រាន់ផងដែរ ដើម្បីឱ្យរាងកាយមានថាមពលគ្រប់គ្រាន់។ ម៉្យាងវិញទៀត​ ប្រសិនបើឈឺកំឡុងពេលប្រឡង ក៏យើងមិនអាចធ្វើលំហាត់បានល្អដូចគ្នា ដូច្នេះសូមថែសុខភាពឱ្យបានល្អ។

ទី២. កុំព្យាយាមទន្ទេញឱ្យចាំ តែត្រូវយល់ពីមេរៀនវិញ ៖ ជិតដល់ថ្ងៃប្រឡងហើយ មិនអាចសម្រុកទន្ទេញឱ្យចាំបានទេ គួរតែយល់ពីមេរៀន និងកត់ចំណាំចំណុចសំខាន់ៗ រៀនឱ្យយល់ច្បាស់វិញ។

ទី៣. កត់សង្ខេបមេរៀន (ខ្លីហើយខ្លឹម) ៖​ សង្ខេបនូវរាល់រូបមន្ត និងមេរៀនដែលសំខាន់ទុក ដើម្បីបង្កើនការចងចាំ និងងាយស្រួលរំលឹកឡើងវិញត្រង់ចំណុចដែលមិនចាំ ឬមិនច្បាស់។

ទី៤. រៀបចំសម្ភារៈឱ្យរួចរាល់ ៖ ការរៀបសម្ភារៈឱ្យរួចរាល់មុនប្រឡងបាក់ឌុបមួយសប្ដាហ៍អាចធ្វើឱ្យយើងមានអារម្មណ៍ថា ខ្លួនឯងរួចរាល់ និងមិនខ្វាយខ្វល់រឿងរៀបចំអ្វីទៀត គឺអាចមើលមេរៀនដោយស្ងប់ចិត្តបាន។ ចំពោះសម្ភារៈដែលត្រូវមានគឺ កាតសម្គាល់ខ្លួន នាឡិកា សម្លៀកបំពាក់ ហើយក៏ត្រូវមានបន្ទាត់ ខ្មៅដៃ ដែកឈៀន រ៉ាប់ប៉ាទ័រ ហើយប៊ិចពណ៌ខៀវសម្រាប់សរសេរមានយ៉ាងហោចណាស់ក៏មាន៥ដើមដែរ។

ទី៥. ស្គាល់មណ្ឌលប្រឡង ៖ ត្រូវស្គាល់ទីតាំងឱ្យបានច្បាស់ ទាំងលេខបន្ទប់ និងលេខតុ ក៏ចាំបាច់ត្រូវចាំដូចគ្នា។ លើសពីនេះ ឧស្សាហ៍តាមដានហ្វេសប៊ុកផេកក្រសួង យុវជន និងកីឡា ឱ្យបានញឹកញាប់ ដើម្បីទទួលបានព័ត៌មានសំខាន់ៗអំពីដំណើរការនៃការប្រឡងបាក់ឌុប។

ចំពោះបទពិសោធន៍ប្រឡងបាក់ឌុប កញ្ញា ចាន់ ឌីវឌ្ឍនា និយាយថា ដើម្បីអាចប្រឡងបាក់ឌុបជាប់ ឬទទួលបាននិទ្ទេសល្អ អ្វីដែលសិស្សានុសិស្សជាបេក្ខជនប្រឡងត្រូវធ្វើ រួមមាន ទី១. ត្រូវកំណត់គោលដៅពិន្ទុថាក្នុងមួយមុខវិជ្ជា ដើម្បីទទួលបាននិទ្ទេសដែលខ្លួនចង់បាន ត្រូវតែបានពិន្ទុប៉ុន្មាន? ហើយត្រូវខំប្រឹងធ្វើវាឱ្យបានល្អ ទី២. ត្រូវដឹងអំពីការដាក់ពិន្ទុនៅចំណុចនៃមុខវិជ្ជានីមួយៗ ហើយធ្វើវាឱ្យបានល្អជាងគេ ទី៣. ត្រូវដឹងពីគោលការណ៍នៃការប្រឡងឱ្យបានច្បាស់ ចៀសវាងការសាងនូវកំហុសក្នុងការប្រឡង ដែលធ្វើឱ្យយើងអស់ពិន្ទុដោយមិនដឹងខ្លួន ទី៤. តាំងចិត្តថាយើងអាចធ្វើបាន អាចយកនិទ្ទេសល្អជូនគ្រួសារឱ្យបាន ទី៥. សុំកម្លាំងចិត្តពីអ្នកជុំវិញខ្លួន ទី៦. ស្តាប់តិចនិចល្អៗពីសិស្សច្បងដែលធ្លាប់ឆ្លងកាត់បទពិសោធន៍ប្រឡងបាក់ឌុប ទី៧. ត្រូវមកមណ្ឌលប្រឡងឱ្យបានមុនម៉ោង ដើម្បីមានពេលបន្ធូរអារម្មណ៍កុំឱ្យភ័យពេលប្រឡង ហើយជៀសវាងការមកប្រឡងយឺត។

ដើម្បីកុំឱ្យភ័យពេលប្រឡងបាក់ឌុប កញ្ញា ចាន់ ឌីវឌ្ឍនា បានចែករំលែកបទពិសោធន៍ថា សិស្សានុសិស្សត្រូវដឹងថាសមត្ថភាពខ្លួនឯងនៅកម្រិតណា? យកបានត្រឹមនិទ្ទេសអ្វី? ហើយប្រឹងធ្វើឱ្យអស់ពីសមត្ថភាព ទោះលទ្ធផលបែបណាក៏យើងទទួលយក។ ទន្ទឹមគ្នានេះ ​ត្រូវពង្រឹងសមត្ថភាពខ្លួនឯងឱ្យកាន់តែច្បាស់គ្រប់មុខវិជ្ជា ខ្សោយមុខវិជ្ជាណា ពង្រឹងមុខវិជ្ជានោះ ដោយយកវិញ្ញាសាចាស់ៗមកធ្វើឡើងវិញ ដើម្បីបង្កើនទំនុកចិត្តពេលប្រឡង។ ម៉្យាងវិញទៀត ញ៉ាំទឹកបន្តិចមុនពេលប្រឡង សម្រួលអារម្មណ៍ ញញឹមដាក់ខ្លួនឯង ហើយប្រាប់ខ្លួនឯងថាខ្ញុំអាចធ្វើបាន។

កញ្ញា ចាន់ ឌីវឌ្ឍនា ក៏បានលើកទឹកចិត្តដល់ប្អូនៗដែលនឹងត្រូវប្រឡងបាក់ឌុបនាពេលខាងមុខនេះ ត្រូវព្យាយាមប្រឹងប្រែងប្រឡងឱ្យអស់ពីសមត្ថភាព ត្រូវថែសុខភាពខ្លួនឯងឱ្យបានល្អ ញ៉ាំអាហារល្អ និងសម្រាកឱ្យបានគ្រប់គ្រាន់។ ជាពិសេស ទោះលទ្ធផលទៅជាយ៉ាងណាក៏ដោយ សូមកុំបាក់ទឹកចិត្ត ព្រោះយើងបានធ្វើវាអស់ពីសមត្ថភាព។ លទ្ធផលបាក់ឌុប គឺគ្រាន់តែជាចំណុចចាប់ផ្ដើមថ្មីមួយសម្រាប់យើង ហើយលទ្ធផលបាក់ឌុបក៏មិនមែនជាទីបញ្ចប់នៃការសិក្សានោះដែរ៕