ការមានទំនុកចិត្តនៅក្នុងទំនាក់ទំនងមានន័យថា អ្នកទទួលបានអារម្មណ៍សុវត្ថិភាព និងភាពស្មោះត្រង់ពីភាគីម្ខាងទៀត ឬវាជាការជឿជាក់ទៅកាន់នរណាម្នាក់ ដោយសារតែអ្នកប្រាកដក្នុងចិត្តថា ពួកគេមិនធ្វើឱ្យអ្នកឈឺចាប់ ឬក៏មិនបំពានទៅកាន់អ្នក ។ ទំនុកចិត្ត គឺជាមូលដ្ឋានគ្រឹះនៃទំនាក់ទំនង ពីព្រោះវាផ្តល់ឱកាសឱ្យអ្នកបើកចិត្តនិយាយគ្នាដោយគ្នានការបារម្ភ អំពីការវាយប្រហារគ្នា ។ យោងតាមគេហទំព័រ Verywellmind បានបង្ហាញពីភាពសំខាន់នៃការជឿជាក់ ផលប៉ះពាល់នៃការខ្វះទំនុកចិត្ត ក៏ដូចជារបៀបរក្សា និងការកសាងទំនុកចិត្ត ដែលមានរៀបរាប់លម្អិតនៅខាងក្រោម។

ការជឿជាក់ចំពោះគ្នាផ្តល់ផលវិជ្ជមានអ្វីខ្លះ?

ទំនុកចិត្ត នៅក្នុងទំនាក់ទំនងជាផ្នែកសំខាន់ ដើម្បីជំរុញឱ្យមនុស្សមានភាពរីករាយ និងមានកត្តាសំខាន់ៗជាច្រើនទៀតដូចជា ៖

ជំរុញភាពវិជ្ជមាន ៖ ទំនុកចិត្តសំខាន់នៅក្នុងទំនាក់ទំនងដោយហេតុថា វាអាចធ្វើឱ្យអ្នកមានចិត្តបើកទូលាយពេលនិយាយចេញមកក្រៅ ប្រសិនបើអ្នកទុកចិត្តទៅលើដៃគូ មិត្ត ឬនរណាម្នាក់ នោះការអត់ឱនកាន់តែទូលាយជាងមុន មិនថានៅពេលអ្នកមានសេចក្ដីក្នក់ចិត្ត ឬការបង្កកំហុសដោយភាគីម្ខាងទៀត នេះក៏ដោយសារតែអ្នកជឿជាក់ទៅលើពួកគេ ដែលកត្តានេះហើយនាំមកនូវអារម្មណ៍វិជ្ជមានទៅកាន់ខ្លួនឯង។

កាត់បន្ថយជម្លោះ ៖ ការទុកចិត្តធ្វើឱ្យអ្នកកាត់បន្ថយភាពប្រទង់ប្រទាញបានមួយកម្រិតទៀត។ ដូច្នេះនៅពេលអ្នកមានទំនុកចិត្តទៅកាន់នរណាម្នាក់ អ្នកនឹងកាត់បន្ថយនូវការផ្តោតតែទៅលើបញ្ហា ជំនួសមកវិញនូវការព្យាយាមស្វែងរកដំណោះស្រាយ។

បង្កើនភាពស្និតស្នាល ៖ ទំនុកចិត្តមួយឱ្យរឹងមាំ ប្រៀបដូចជាការកសាងមូលដ្ឋានគ្រឹះនៃការទាក់ទងឱ្យរឹងមាំដូច្នោះដែរ ហើយនៅពេលអ្នកទុកចិត្តលើនរណាម្នាក់ ប្រៀបដូចជាការបង្កើនភាពស្និតស្នាល និងអារម្មណ៍សុវត្ថិភាពមួយទៅកាន់គ្នា ថែមទាំងអាចពឹងផ្អែកបាននៅពេលខាងមុខ។

ផលប៉ះពាល់នៃការមិនទុកចិត្តគ្នាមានអ្វីខ្លះ?

ជាដំបូងត្រូវដឹងថា ទំនុកចិត្តគ្មានការបង្ខំឡើយ ហើយមានតែពេលវេលាទេ ទើបអាចឱ្យអ្នកស្ទាបស្ទង់បានពីការជឿជាក់រវាងគ្នានិងគ្នាបាន។ ជារឿយៗទំនុកចិត្តត្រូវបានបាត់បង់ នៅពេលដែលភាគីណាម្នាក់ មិនបានគោរតាមសន្យា ឬមិនមានសេចក្ដីប្ដេជ្ញាចិត្តឱ្យមុតមាំណាមួយ ជាពិសេសនៅពេលធ្វើមិនគប្បីម្តងហើយម្តងទៀត។ ការមិនជឿទុកចិត្ត បង្កផលប៉ះពាល់ជាច្រើនដូចជា៖

បាត់បង់ភាពស្និតស្នាល ៖ នៅពេលអ្នកទទួលបានការបោកបញ្ឆោតពីនរណាម្នាក់ នោះអ្នកនឹងព្យាយាមរក្សាគម្លាតពីពួកគេបន្តិចម្តងៗ ទាំងជួបផ្ទាល់ និងប្រយោល ដែលកត្តានេះជះឥទ្ធិពលយ៉ាងខ្លាំងក្នុងការរារាំងអ្នកឱ្យកាត់បន្ថយភាពស្និតស្នាល។

អារម្មណ៍អវិជ្ជមាន ៖ នៅពេលដែលអ្នករកឃើញថា នរណាម្នាក់ ឬមិត្ត ឬដៃគូរបស់អ្នកបានប្រព្រឹត្តិខុសឆ្គងមកលើអ្នក នោះគំនុំគុំគួនអាចនឹងកើនឡើង ដែលមិនត្រឹមតែជំរុញឱ្យកាត់ផ្តាច់ទំនាក់ទំនងប៉ុណ្ណោះទេ ក្នុងករណីខ្លះបណ្តាលឱ្យអ្នកក្លាយជាមនុស្សពោរពេញដោយកំហឹង ប្រសិនបើមិនអាចរក្សាដែនកំណត់បាន។

មិនមានអារម្មណ៍សុវត្ថិភាព ៖ ស្ថិតក្នុងស្ថានការណ៍នេះ មនុស្សកាន់តែមានអារម្មណ៍សង្ស័យទៅៗ ថែមទាំងមានអាការៈចង់តែគ្រប់គ្រងភាគីម្ខាងទៀត។ ហើយការសង្ស័យ នាំឱ្យការចង់ដឹងចង់ឮកើតមានខុសប្រក្រតី ឬបង្កើតបានជាការតាមដាន ឬសាកចិត្តគ្នាយ៉ាងស្វិតស្វា។ ឧទាហរណ៍ ការផ្ញើសារញឹកញាប់ពេកជាដើម ដែលចំណុចនេះហើយកាន់តែធ្វើឱ្យភាគីម្ខាងទៀតកាន់តែឃ្លាតឆ្ងាយ។

បង្កើតអារមុ្មណ៍ទុក្ខព្រួយ ៖ ការមិនទុកចិត្តទៅកាន់នរណាម្នាក់ ជាពិសេសមនុស្សស្និតនឹងអ្នក គឺបណ្តាលឱ្យមានបញ្ហាផ្លូវចិត្ត និងផ្លូវកាយ រួមបញ្ចូលទាំងការជំរុញឱ្យមានរបួសផ្លូវចិត្ត និងអារម្មណ៍ខុសប្រក្រតីនានា។

អារម្មណ៍ឯកោ ៖ នៅពេលអ្នកមិនអាចទុកចិត្តមនុស្សដែលអ្នកស្និតបំផុតនៅក្នុងជីវិតរបស់អ្នក នោះអារម្មណ៍ឯកោ និងការផ្តាច់ខ្លួននៅដាច់ដោយឡែកកាន់តែកើតមាន។

ធ្វើដូចម្តេចទើបអាចជឿជាក់លើទំនាក់ទំនង?

វាមានកត្តាច្រើនណាស់ដែលអាចជំរុញឱ្យអ្នកមានការជឿជាក់លើទំនាក់ទំនង និងការពង្រឹងទំនុកចិត្ត ហើយកត្តាដែលសំខាន់គឺ «ភាពស្មោះត្រង់» រក្សាភាពស្មោះត្រង់ក្នុងន័យនេះ គឺគោលដៅមិនបង្កើតប្រភេទមនុស្សដែលនាំហានិភ័យដល់អ្នកដទៃបន្ថែមប៉ុណ្ណោះ។ គ្រប់គ្នាតែងបង្កើតកំហុស ដូច្នេះត្រូវធ្វើចិត្តខ្លួនឯងឱ្យចេះទទួលយក ប៉ុន្តែត្រូវប្រុងប្រយ័ត្នឱ្យបានខ្ពស់ជាងមុន។ មួយវិញទៀតគួរបើកឱកាសឱ្យមានកិច្ចពិភាក្សា ព្រោះក្នុងករណីមួយចំនួន អាចនឹងមានការយល់ច្រឡំ។

តើកសាងទំនុកចិត្តដោយរបៀបណា?

ប្រសិនបើអ្នកឈានដល់ករណីមួយដែលប្រេះឆារួចហើយ គឺនៅតែមានគន្លឹះមួយចំនួនក្នុងការស្ដារឡើងវិញ មិនថាភាពស្និតស្នាល ឬភ្ជាប់ការទាក់ទង ដែលចំណុចទាំងនោះមានដូចជា ៖ ១.បើកឱកាសឱ្យដំណើរការទំនាក់ទំនង, ២.បង្កើតបទពិសោធវិជ្ជមានថ្មីៗល្អៗជាមួយគ្នាបន្ថែម, ៣.និយាយរកគ្នាឱ្យបានច្រើន។ ៤.ស្វែងរកវិធីសាស្រ្តដើម្បីភ្ជាប់ការទាក់ទង, ៥.និយាយនូវអ្វីដែលអ្នកចង់និយាយ និងចេញពីចិត្ត, ៦.ការប្តេជ្ញាចិត្តរក្សាការទាក់ទងឱ្យបានទៀងទាត់ ។ បន្ថែមពីនោះ ត្រូវស្ដាប់គ្នាដោយយកចិត្តទុកដាក់ និងបំផុសសំណួរពេលសន្ទនាដើម្បីយល់ពីភាគីម្ខាងទៀតឱ្យកាន់តែច្បាស់។ ចំណុចសំខាន់មួយទៀតគឺ ទទួលស្គាល់កំហុស និងការទទួលខុសត្រូវ រាល់អ្វីដែលបានធ្វើខុស ដោយការសូមអភ័យទោស ឬការប្តេជ្ញាឱ្យជាក់លាក់មួយសម្រាប់ពេលខាងមុខ។ ជាងនេះទៅទៀត ការអត់ធ្មត់ក៏ជាចំណុចសំខាន់ដែរ វាអាចនឹងចំណាយពេលយូរក្នុងដំណាក់កាលកសាងទំនុកចិត្តពីអ្នកដទៃ។

យ៉ាងណាក៏ដោយ សូមបន្តការអភិវឌ្ឍវាជាប្រចាំដើម្បីរក្សាទំនាក់ទំនងល្អតាមបែបបទឬតាមការរំពឹងរៀងៗខ្លួន៕