ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការបង្កើតឱ្យមានសួនដំណាំក្នុងសាលា គឺជាវិធីដ៏ល្អ ដែលអាចជួយឱ្យក្មេងៗអាចសិក្សាអំពីរបបអាហារ អាហារូបត្ថម្ភ និងការផលិតស្បៀងអាហារ។ អង្គការស្បៀងអាហារ និងកសិកម្មនៃអង្គការសហប្រជាជាតិ (Food and Agriculture Organization of the United Nations) បានលើកទឹកចិត្ត និងគាំទ្រឱ្យប្រទេសទាំងអស់នៅទូទាំងសកលលោកបង្កើតសួនដំណាំក្នុងសាលា ដោយភ្ជាប់ទៅនឹងគោលដៅអប់រំ ដើម្បីជួយសិស្ស បុគ្គលិកសាលា និងក្រុមគ្រួសារ អភិវឌ្ឍបំណិតជីវិត និងបង្កើនការយល់ដឹងអំពីបរិស្ថាន តាមរយៈការដាំដំណាំ និងស្វែងយល់របបអាហារ។
ស្ថាប័ន FAO បានទទួលស្គាល់ថា សាលារៀនគឺជាកន្លែងដ៏ល្អឥតខ្ចោះ ដើម្បីបង្កើនការយល់ដឹងអំពីអាហារូបត្ថម្ភ និងអភិវឌ្ឍបំណិនជីវិតសម្រាប់កុមារ និងយុវជន។ សាលា គឺជាមជ្ឈដ្ឋានមួយ ដែលជះឥទ្ធិពលខ្លាំងបំផុតទៅលើកុមារ ខណៈវ័យនេះ គឺជាពេលវេលាដ៏ល្អបំផុតសម្រាប់ស្វែងយល់អំពីរបបអាហារ និងទម្លាប់ដែលនាំឱ្យមានសុខភាពល្អ ។ លើសពីនេះ តាមរយៈការបង្កើតឱ្យមានការចូលរួមពីសហគមន៍ ជាមួយនឹងសកម្មភាពផ្សេងៗ សាលាក៏មានឥទ្ធិពលមកលើក្រុមគ្រួសារ និងប្រជាជននៅក្នុងសហគមន៍ផងដែរ ។
អត្ថប្រយោជន៍នៃសួនដំណាំក្នុងសាលា ដែល FAO បានលើកឡើងនោះ មានចំនួន ៥ដូចជា៖
១. ការភ្លក់ និងសិក្សាអំពីអាហារសុខភាព
២. ការស្វែងយល់អំពីរបៀបដាំ និងថែទាំបន្លែ និងផ្លែឈើ
៣. ការពង្រឹងសមត្ថភាពបំពេញការងារជាក្រុម
៤. ការលើកកម្ពស់ចំណេះដឹងអំពីអាហារូបត្ថម្ភឱ្យកាន់តែប្រសើរឡើង
៥. ការជំរុញឱ្យក្មេងៗឱ្យតម្លៃទៅលើការងារកសិកម្ម និងការផលិតស្បៀងអាហារ។
គួរជម្រាបជូនថា ការជំរុញឱ្យកុមារ និងយុវជនយល់ដឹងអំពី ការផលិតស្បៀងអាហារ សារៈប្រយោជន៍នៃរបបអាហារ និងអាហារូបត្ថម្ភ តាមរយៈការអប់រំក្នុងសាលា អាចជាការចូលរួមមួយដ៏សំខាន់ក្នុងការលើកកម្ពស់សុខុមាលភាពប្រជាជន។ សកម្មភាពនេះ គឺជាការបណ្ដុះគ្រាប់ពូជនៅក្នុងសាលា ប៉ុន្តែជំរុញឱ្យមានភាពសុខដុមរមនាក្នុងគ្រួសារ និងសង្គមផងដែរ៕
