ក្មេងជំទង់ ពួកគេទទួលរងនូវសម្ពាធតាមរយៈការសិក្សា និងការទំនាក់ទំនង ដូចជាសម្ពាធនៃការត្រៀមប្រឡង និងការប្រាស្រ័យទាក់ទង ឬការរក្សាមិត្តភាពជាដើម។ ត្បិតវ័យនេះ ជាវ័យកំពុងអភិវឌ្ឍន៍ខ្លួន ប៉ុន្តែមិនមែនមានន័យថា ស្ថិតក្នុងដំណាក់កាលនេះ ក្មេងជំទង់ ឬកុមារអាចទ្រទ្រង់សម្ពាធផ្លូវចិត្តបាននោះទេ។ តាមរយៈគេហទំព័រ CBC បានបង្ហាញអំពីអ្វីដែលអាណាព្យាបាល​អាចគាំទ្រសុខភាពផ្លូវចិត្តរបស់ក្មេងវ័យជំទង់ ឬកុមារ ដើម្បីជួយបន្ថយសម្ពាធផ្លូវចិត្តរបស់ពួកគេ។

ស្វែងយល់អំពីការវិវដ្ដរបស់វ័យ ៖ តាមរយៈបទពិសោធន៍ និងស្ថានភាពនៃការរស់នៅរបស់ក្មេងម្នាក់ៗគឺមានភាពខុសៗគ្នា ដូច្នេះការសន្និដ្ឋានរកដំណោះស្រាយជារួម ហាក់មានភាពស្មុគស្មាញបន្តិច តែយ៉ាងណាបើក្រឡេកទៅមើលចំណុចជារួមវិញ គឺការតាមដាន និងសង្កេតអំពីស្ថានភាពអារម្មណ៍របស់កូនៗថា តើពួកគេចាប់ផ្តើមដល់វ័យមួយដែលស្ថានភាពអារម្មណ៍ប្រែប្រួលកម្រិតណា? អំពីការទាមទារអារម្មណ៍ឯកជនភាព ការបារម្ភអំពីភាពចុះចូលក្នុងសង្គម​ ការក្លាយជាមនុស្សដែលមានភាពឯករាជ្យ និងការចាប់ផ្តើមឆ្លើយតប ឬទទួលខុសត្រូវទៅរាល់សកម្មភាពដែលខ្លួនប្រព្រឹត្តិទាំងអស់។ ហើយបទពិសោធន៍ជាច្រើន​ដែលក្មេងក្នុងវ័យទំទង់បានប្រទះ គឺ ភាពតានតឹង និងអារម្មណ៍ធ្លាក់ចុះ។

របៀបនៃការជួយ ៖ ក្រោយការកត់សម្គាល់អំពីភាពប្រែប្រួលហើយ អ្វីដែលអាណាព្យាបាលគួរធ្វើបន្ទាប់ គឺ​រំងាប់ការផ្តល់ពេល និងបរិយាកាសសមរម្យមួយក្នុងការសិក្សាអំពីអារម្មណ៍ប្រែប្រួល ក៏ដូចជាការជួយស្វែងរកដំណោះស្រាយជាមួយកូនៗជាដើម។ ជៀសវាងការផ្តល់សម្ភារៈដែលមិនឆ្លើយតបនឹងស្ថានភាព ឬការប្រើប្រាស់ទង្វើដែលមិននាំនូវផលវិជ្ជមានដូចជា សម្ដីអវិជ្ជមាន ការស្ដីបន្ទោស ហើយអ្វីដែលអាណាព្យាបាលគួរអនុវត្តន៍ គឺ​ការស្វែងរកវិធីសាស្រ្តរំងាប់ចិត្ត ការជួយពួកគេឱ្យមានភាពស្ងប់តាមរយៈវិធីសាស្រ្តណាមួយ ដែលមានដូចជា ការនាំទៅធ្វើលំហាត់ប្រាណ ការបង្រៀនអំពីរបៀបដកដង្ហើមឱ្យធូរចិត្ត ការនាំទៅជិះកង់ ឬក៏ការបបួលពួកគេទៅបរិយាកាសណាមួយ ដែលឆ្លើយតបនឹងលទ្ធភាពផ្ទាល់ខ្លួន ធ្វើយ៉ាងជួយរំងាប់ចិត្តពួកគេឱ្យបន្ថយសម្ពាធផ្លូវចិត្ត ជំនួសឱ្យការបន្ទោសលើអាកប្បកិរិយា ដែលមិនល្អ។ ជាឧទាហរណ៍ ដើម្បីជួយឱ្យកូនៗកាត់បន្ថយការបារម្ភ គួរនាំពួកគេឱ្យសរសេររាល់ក្ដីបារម្ភទាំងអស់ចេញមកក្រៅ ឬក៏ចំណាយពេលពិភាក្សាដោយយកចិត្តទុកដាក់។

ជួយកុមារក្សាភាពធន់ផ្នែកផ្លូវចិត្ត ៖​ មានកុមារ និងមនុស្សវ័យជំទង់ ពួកគាត់មានអាការតានតឹងផង និងភាពសស្លន់សស្លោផង ដែលនេះជាបញ្ហាដ៏លំបាកមួយចំពោះឪពុកម្តាយ។ ក្នុងស្ថានភាពបែបនេះ ក្មេងៗនិងមនុស្សវ័យជំទង់ ងាយនឹងបាត់បង់ទំនុកចិត្ត និងខ្លាចការវាយតម្លៃពីមជ្ឈដ្ឋានខាងក្រៅនៅពេលធ្វើអ្វីមួយ។ ស្ថិតក្នុងកាលៈទេសៈនេះ អាណាព្យាបាលគួរជួយក្មេងៗ ឱ្យមានផ្លូវចិត្តធន់ដើម្បីកាត់បន្ថយការវាយប្រហារពីកត្តាខាងក្រៅ។ ក្នុងការបង្កើនភាពធន់ដល់ក្មេងទៀតសោត គឺការចំណាយពេលជជែកជាមួយនឹងពួកគេ គួរហៅមកនិយាយគ្នា ហើយទុកពេលវេលាពេញលេញដើម្បីឱ្យក្មេងៗបកស្រាយ ប៉ុន្តែបើពួកគេមិនចង់និយាយជាមួយ សូមកុំបង្ខំ ប៉ុន្តែសាកសួរ ឬក៏សង្កេតថា តើនរណាគេដែលក្មេងៗចង់និយាយជាមួយ?

គួរកត់ចំណាំដែរថា កុមារ ឬមនុស្សវ័យជំទង់ ត្រូវការពេលវេលាក្នុងការបង្ហាញអារម្មណ៍របស់ពួកគេ! សូមកុំរួសរាន់ខ្លាំងពេកក្នុងការដោះស្រាយអ្វីមួយដែលកើតមានចំពោះក្មេងៗ អ្វីដែលគួរផ្តោតគឺ ការឆ្លុះបញ្ចាំង នឹងក្លាយជាអ្នកស្តាប់ដ៏សកម្មម្នាក់។ យ៉ាងណាក៏ដោយ កុំខ្មាស់អៀនក្នុងការស្វែងរកជំនួយបន្ថែមអំពីអ្នកជំនាញ ព្រោះអាណាព្យាបាលមានឥទ្ធិពលយ៉ាងខ្លាំងជំរុញដល់ការលូតលាស់ និងការថែទាំសុខភាពផ្លូវកាយនិងផ្លូវចិត្តរបស់ក្មេងៗ។ ផ្ទះជាកន្លែងដែលក្មេង ឬមនុស្សវ័យជំទង់ ចំណាយពេលជាច្រើនដើម្បីរស់នៅ ដែលជាហេតុបបង្ហាញឱ្យឃើញថា អាណាព្យាបាលមានតួនាទីសំខាន់ក្នុងការជួយស្វែងរកដំណោះស្រាយទៅកាន់ក្មេងៗ៕