ធ្លាប់មានបទពិសោធន៍ជាប់គាំងនឹងការងារ ដោយសារតែវាមានទំហំលើសពីសមត្ថភាព ឬពេលវេលាដែលខ្លួនមាន ឬទេ? ការសម្រេចកិច្ចការជាក្រុម ត្រូវការទាំងជំនាញសម្របសម្រួល និងជំនាញបច្ចេកទេស តួយ៉ាងកិច្ចការជាក្រុមត្រូវការមនុស្សដែលមានជំនាញបែងចែកភារកិច្ចទៅតាមជំនាញ និងតួនាទី ឬក៏ទៅតាមស្ថានភាពជាក់ស្តែងនៃការងារនីមួយៗ។ ការបែងចែក មិនត្រឹមតែជួយសម្រាលបន្ទុកគ្នា ក្នុងនាមជាសមាជិកក្រុមប៉ុណ្ណោះទេ ប៉ុន្តែបានជំរុញទៅដល់ការប្រមូលស្មារតីក្រុម រក្សាបច្ចុប្បន្នភាពនៃការងារ និងសាមគ្គីភាពទៅក្នុងរយៈពេលវែង។

តាមរយៈគេហទំព័រ Minuteddock បានបង្ហាញគន្លឹះ៧ចំណុចដែលទទួលបានពីការផ្ទេរកិច្ចការ ផ្តល់ទំនួលខុសត្រូវទៅកាន់អ្នកដទៃ ដូចជា យល់ពីប្រភេទកិច្ចការដែលត្រូវផ្ទេរ និងការជ្រើសរើសមនុស្ស ដែលសាកសមជាដើម។

១.ការយល់ពីប្រភេទការងារដែលត្រូវផ្ទេរ ៖ ការផ្ទេរចំនួនការងារ និងទំនួលខុសត្រូវទៅកាន់គ្នា គឺជាភាពសាមគ្គី និងការអភិវឌ្ឍរួមគ្នា។ ចំណុចនេះដែរ មានភាពសំខាន់ចំពោះអ្នកដឹកនាំ ឬសម្រាប់ក្រុមមួយដែលត្រូវការប្រសិទ្ធភាពការងារខ្ពស់ និងលឿន។ បន្ថែមពីនោះត្រូវដឹងអំពីការចែករំលែកការងារគ្នា ផ្តល់ឱកាសឱ្យខ្លួនឯង ផ្តោតលើការងារដែលចាំបាច់ បញ្ជូនការងារទាន់ពេលវេលា និងជំរុញឱ្យមានការអភិវឌ្ឍន៍សមត្ថភាពការងារក្រុម។ ហើយការចែកកិច្ចការគ្នា មិនមែនជាការដាក់បន្ទុកទេ ប៉ុន្តែជាការរួមសាមគ្គីដើម្បីសម្រេចលទ្ធផលល្អទាំងអស់គ្នា។

២.ស្គាល់ប្រភេទការងារដែលត្រូវចែក ឬផ្ទេរ ៖ ជាក់ស្តែង មិនមែនការងារទាំងអស់សុទ្ធតែត្រូវបែងចែកនោះទេ ក្នុងនាមជាតំណាងក្រុម ឬអ្នកបែងចែកការងារ គួរស្វែងយល់ពីទំហំទំនួលខុសត្រូវមួយៗ រួមទាំងសមត្ថភាព និងលទ្ធភាពក្នុងក្រុមរបស់ខ្លួន ដើម្បីយកមកវិភាគឱ្យឃើញថា តើប្រភេទការងារណាដែលសមនឹងសមាជិកក្រុមនីមួយៗ? បន្ថែមពីនោះ កត់ត្រារៀបរាប់លម្អិតទៅតាមផ្នែក និងតួនាទីនីមួយៗជាមុនសិន ទើបបែងចែកការងារគ្នាតាមក្រោយ។

៣.ការជ្រើសរើសមនុស្សឱ្យទទួលខុសត្រូវ ៖ ផ្ទេរការងារទៅកាន់នរណាម្នាក់ គឺត្រូវដឹងពីតួនាទី សមត្ថភាព លទ្ធភាព តាមរយៈការយល់ពីចំណុចខ្លាំង និងចំណុចខ្សោយដែលពួកគេមានរួមទាំងជំនាញរបស់សមាជិកក្រុមជាមុន ទើបអាចធ្វើសេចក្ដីសម្រេចចិត្តតាមក្រោយ រួចធ្វើការផ្គូផ្គងទៅតាមតម្រូវការ នៃទំហំគោលដៅការងារ ធ្វើយ៉ាងណាឱ្យស្រប ជាមួយលទ្ធភាពដែលទៅរួចរបស់សមាជិកក្រុមម្នាក់ៗ ជ្រើសរើសមាជិកណាដែលយើងមានទំនុកចិត្តក្នុងការផ្តល់សិទ្ធ ហើយពិភាក្សាអំពីការរំពឹងទុក និងការចង់បានរៀងៗខ្លួនឱ្យច្បាស់ៗ ដើម្បីប្រាកដអំពីអ្វីទៅជាគោលដៅសមិទ្ធផលរួម។

៤​.ផ្ទេរទាំងរបៀបធ្វើ និងយុទ្ធសាស្រ្ត ៖ ដើម្បីផ្ទេរកិច្ចការមួយប្រកបដោយប្រសិទ្ធភាពទៅបាន គួរបង្ហាញអ្វីទៅដែលជាបញ្ហាប្រឈម និងដំណោះស្រាយប្រសិនបើមាន រួមទាំងកាលបរិច្ឆេទ រួមទាំងលទ្ធផលរំពឹងទុកក្រោយការបញ្ចប់ការងារទាំងនោះ។ ជំនួសឱ្យការតាមដាន នូវចំណុចតូចៗប្រចាំថ្ងៃ គឺត្រូវផ្តល់នូវការណែនាំមួយអំពីដំណើរការងារ ផ្តល់យោបល់ដើម្បីស្ថាបនា ឬការគាំទ្រតាមដែលអាចធ្វើបាន និងទុកពេលឱ្យអភិវឌ្ឍតាមរយៈបទពិសោធន៍ការងារ។ យ៉ាងណាត្រូវផ្តល់សិទ្ធ សេរីភាពពេញលេញ ក្នុងការធ្វើកិច្ចការ ឬភាពម្ចាស់ការ និងបង្ហាញពីទំហំការងារនៅក្នុងដែនកំណត់មួយដែលគេអាចធ្វើសេចក្ដីសម្រេចចិត្តបាន។

៥.ការដោះស្រាយបញ្ហាប្រឈមពាក់ព័ន្ធនឹងការផ្ទេរកិច្ចការ ៖ ទោះបី គុណសម្បត្តិ នៃការផ្ទេរការងារទៅកាន់នរណាម្នាក់ មានច្រើនចំណុច ប៉ុន្តែបញ្ហាប្រឈម និងក្ដីព្រួយបារម្ភ ក៏នៅតែកើតមានដោយចៀសពុំរួច ជាពិសេសចំពោះការគ្រប់គ្រងការងារ និងទំនុកចិត្តដែលខំដាក់ទុន។ តែយ៉ាងណាបញ្ហាប្រឈមមួយនេះ នឹងអាចដោះស្រាយ ឬក៏បន្ថយសម្ពាធបានតាមរយៈការធ្វើផែនការសកម្មភាពដ៏ត្រឹមត្រូវមួយ និងការពិភាក្សាគ្នា។ ត្រូវបង្ហាញឱ្យជាក់លាក់ ពីកម្រិតដែលពួកគេអាចធ្វើសេចក្ដីសម្រេចចិត្តបាន ដើម្បីប្រាកដថា អ្នកគ្រប់គ្នានៅក្នុងក្រុមយល់ពីតួនាទី។ ប្រសិនបើមានភាពថ្លោះធ្លោយ ក្រោយធ្វើផែនការ គួរគិតថា កំហុសជាឱកាស ក្នុងការរៀនសូត្រ និងពន្លឿនសមត្ថភាព ការស្គាល់ពីកំហុសអាចជួយឱ្យមានការសម្រេចចិត្តបានល្អក្នុងកិច្ចសហការណ៍ក្រុម។

៦.បែងចែកការងារដោយមានភាពជាដឹកនាំ ៖ ការផ្ទេរការងារទៅកាន់សមាជិកក្រុម មិនមែនគ្រាន់តែដើម្បីសម្រាលបន្ទុកក្រុមនោះទេ ប៉ុន្តែវាមានភាពសំខាន់ក្នុងការប្រើប្រាស់ជំនាញភាពជាអ្នកដឹកនាំនៅពេលបែងចែក​។ ការបែងចែកកិច្ចការដែលមានប្រសិទ្ធភាព គឺដើម្បីបង្កើនសក្តានុពលក្រុម អនុញ្ញាតឱ្យពួកគេមានឱកាសរៀនសូត្រ ដុសខាត់ជំនាញ និងពង្រឹងអាជីពវិជ្ជាជីវៈ។ ម្យ៉ាងវិញទៀត តាមរយៈការបែងចែកទំនួលខុសត្រូវ គឺបំផុសឱ្យមានកិច្ចសហការណ៍ និងបង្កើតបាននូវការចូលរួមពីគ្រប់ភាគី ដែលពាក់ព័ន្ធនៅក្នុងក្រុម។ បើនិយាយអំពីទស្សនៈក្នុងរយៈពេលវែងវិញ ការបែងចែកការងារបានជំរុញនូវផលិតភាព ហើយសមាជិកក្រុមទាំងអស់ទទួលបានការសាទរ និងផ្តល់តម្លៃ បង្កើនកម្លាំងចិត្ត និងមានការបំផុសស្មារតីក្នុងការប្តេជ្ញាចិត្តបញ្ចប់ផែនការទាំងអស់គ្នា។

៧.អនុវត្តន៍ (ផែនការសកម្មភាព) ៖ គិតមកត្រឹមចំណុចនេះ យើងបានយល់ពីឥទ្ធិពលនៃការបែងចែកការងារគ្នាធ្វើហើយ ជាកិច្ចបន្ទាប់ គឺជាពេលវេលាក្នុងការអនុវត្តម្តង។ តើអនុវត្តន៍យ៉ាងដូចម្តេច? ជាដំបូង ឆ្លុះបញ្ចាំងអំពីការងារបច្ចុប្បន្ន ដែលមានច្រើន និងកំណត់ថា តើការងារណាដែលអាចចែករំលែកទៅកាន់អ្នកដទៃបាន និងចាប់ផ្តើមអនុវត្តន៍រាល់យុទ្ធសាស្រ្ត និងគន្លឹះ ក្នុងការជជែក និងផែនការសកម្មភាពតូចៗដោយមានពេលវេលាជាក់លាក់ និងផ្តល់ទំនុកចិត្តទៅកាន់សមាជិកក្រុម។ កត្តាដែលត្រូវធ្វើក្នុងនាមជាអ្នកតំណាងក្រុមពេលបែងចែកការងារ គឺតាមដានភាពលូតលាស់របស់ក្រុម ផ្តល់​ជំនួយ ឬការគាំទ្រ​ និងភាពបត់បែនក្នុងការកែតម្រូវផែនការប្រសិនបើចាំបាច់។ ការបែកចែកការងារ ធ្វើឡើងដើម្បីជាមធ្យោបាយមួយក្នុងការបង្កើនប្រសិទ្ធភាព និងផលិតភាពប៉ុណ្ណោះ និងជាការបន្ថយបន្ទុកខ្លួនឯង ក៏ដូចជាសមាជិកក្រុមទាំងអស់ រួមទាំងសិក្សារៀនសូត្រពីគ្នាដើម្បីភាពរីកចម្រើនជារួម៕