ដោយ​មើលឃើញ​ថា អ្នកមានបញ្ហា​ផ្លូវចិត្ត​នៅ​កម្ពុជា​ភាគច្រើន​​មិន​អាច​ស្វែង​រក​អ្នក​ប្រឹក្សា ក៏​ដូចជា​អ្នកជំនាញ​ផ្នែកផ្លូវចិត្តបាន យុវតី​ដែលជា​និស្សិត​នៃសាកលវិទ្យាល័យ​មួយ​ក្នុង​រាជធានីភ្នំពេញ ចំនួន៤រូប បាន​រួមគ្នា​ដោះស្រាយបញ្ហា​​នេះ តាមរយៈ​ការ​បង្កើត​កម្មវិធីទូរស័ព្ទដៃ ដែលមានឈ្មោះថា Hermit App។ កម្មវិធីទូរស័ព្ទដៃមួយ​នេះ គេ​រំពឹងថា នឹងចូលរួមដោះស្រាយបញ្ហាគម្លាតរវាងអ្នកជំងឺផ្លូវចិត្ត និងអ្នកជំនាញ និងលើកកម្ពស់ការយកចិត្តទុកដាក់ចំពោះសុខភាពផ្លូវចិត្តឱ្យបានទូលំទូលាយក្នុងសង្គមកម្ពុជា។

យុវតី ព្រៀម ស្រីនិច និស្សិតឆ្នាំទី១ ជំនាញវិទ្យាសាស្ត្រទិន្នន័យ និងបញ្ញាសិប្បនិម្មិត លើកឡើងថា កម្មវិធីទូរស័ព្ទនេះ មានលក្ខណៈពិសេសចំនួន ៣ចំណុចសំខាន់ៗរួមមាន ៖ ទី១ អ្នកប្រើអាចធ្វើតេស្ត ដើម្បីសិក្សាពីស្ថានភាពផ្លូវចិត្តខ្លួនឯង, ទី២ ប្រសិនបើលទ្ធផលតេស្ត បង្ហាញអ្នកប្រើមានបញ្ហាផ្លូវចិត្តកម្រិតស្រាល កម្មវិធី នឹងណែនាំនូវវិធីសាស្ត្រ ដើម្បីព្យាបាលខ្លួនឯង និងទី៣ ករណីលទ្ធផលតេស្ត្របង្ហាញថា អ្នកប្រើ មានបញ្ហាធ្ងន់ធ្ងរ កម្មវិធីនេះ នឹងភ្ជាប់ទៅអ្នកជំនាញផ្លូវចិត្ត ។ បើតាម​ ស្រីនិច កម្មវិធីទូរស័ព្ទនេះ ផ្ដោតលើការព្យាបាលជំងឺចំនួន ២ គឺ ជំងឺថប់បារម្ភ និងជំងឺបាក់ទឹកចិត្ត។

យុវតី វ័យ ២០ឆ្នាំរូបនេះ បន្តថា មូលហេតុដែលក្រុមរបស់ខ្លួនផ្ដោតតែលើការព្យាបាលជំងឺថប់បារម្ភ និងបាក់ទឹកចិត្ត ព្រោះជំងឺទាំងពីរនេះ កំពុងកើតលើប្រជាជនកម្ពុជាច្រើនជាងជំងឺផ្សេងទៀត។

ត្បិតថា ជំងឺផ្លូវចិត្តមានច្រើន ប៉ុន្តែអ្នកមានជំងឺថប់បារម្ភ និងការបាក់ទឹកចិត្ត មានភាគរយខ្ពស់ ក្នុងសង្គមកម្ពុជា។ តាមដែលយើងស្រាវជ្រាវ បានរកឃើញថា ប្រជាជនកម្ពុជាប្រហែលជា ៧លានកំពុងមានបញ្ហាផ្លូវចិត្តអ្វីមួយ ហើយក្នុងចំណោមនោះ មានកន្លះលាននាក់ កំពុងមានបញ្ហាថប់បារម្ភ និងបាក់ទឹកចិត្ត…

យុវតី វ៉ុន ប៊ុនកុសម: ជាសមាជិកក្រុមមួយរូបទៀត និងជានិស្សិតឆ្នាំទី១ កំពុង​សិក្សាជំនាញសន្តិសុខសាយប័រ បញ្ជាក់ប្រាប់ AMS Education ថា មូលហេតុដែលក្រុមរបស់ខ្លួន បង្កើតកម្មវិធីទូរស័ព្ទនេះឡើង គឺមានគោលគំនិត ៣សំខាន់ ទី១ ជួយអ្នកខ្មាសអៀនស្វែងរកសេវាផ្លូវចិត្ត ដោយផ្ទាល់អាចស្វែងរកអ្នកជំនាញផ្លូវចិត្តនៅលើអេប, ទី២ លើកកម្ពស់ការយកចិត្តទុកដាក់បន្ថែមទៀតលើបញ្ហាផ្លូវចិត្ត និងទី៣ ផ្សព្វផ្សាយអំពីសារៈសំខាន់នៃសុខភាពផ្លូវចិត្ត ខណៈបច្ចុប្បន្ន អ្នកធ្លាប់ឆ្លងកាត់របបប៉ុលពត ក៏មានបញ្ហាការប៉ះទង្គិចផ្លូវចិត្ត (PTSD) ច្រើនក្រាស់ក្រែងដែរ។

យ៉ាងណាក៏ដោយ បើតាម​ការ​បញ្ជាក់របស់ យុវតី អ៉ិន លាវសុវីន ដែលជាសមាជិកក្រុម និងជានិស្សិតឆ្នាំទី១ ជំនាញ វិទ្យាសាស្ត្រទិន្នន័យ និងបញ្ញាសិប្បនិម្មិតថា កម្មវិធីទូរស័ព្ទ Hermit App កំពុងដំណើររៀបចំ និងសាកល្បង ហើយអាចដំណើរការជាផ្លូវការនៅពាក់កណ្ដាលឆ្នាំ២០២៥នេះ។ ហើយ​នៅដំណាក់កាលដំបូង អ្នកប្រើប្រាស់គោលដៅ គឺសិស្សវិទ្យាល័យ និស្សិត និងអ្នកទើបតែបញ្ចប់ការសិក្សាសាកលវិទ្យាល័យ ហើយឈានចូលជីវិតការងារជាលើកដំបូង។

សុវីន បន្តថា មុននឹងពង្រីកវិសាលភាពឱ្យបានទូលាយ ក្រុមរបស់ខ្លួន កំណត់គោលដៅត្រឹមយុវជនអាយុចន្លោះពី១៨ ទៅ២៥ឆ្នាំ និងអ្នករស់នៅទីក្រុង ដែលមាន ឧបករណ៍ សម្ភារៈ និងអ៊ីនធឺណិតប្រើគ្រប់គ្រាន់សិន។ ទើបពង្រីកទៅដំណាក់កាលបន្ទាប់ទៀត។

គួរ​ជម្រាបជូនថា គម្រោង កម្មវិធីទូរស័ព្ទព្យាបាលផ្លូវចិត្ត Hermit នេះ ក៏បានចូលរួម​ក្នុង​ការ​ប្រកួតប្រជែង​គំនិត​សហគ្រិនភាព Innovative Teach Challenge ឆ្នាំ២០២៤ ដោយ​ទទួលបានជ័យលាភីក្នុងចំណោមក្រុមទាំង១០ ដែលមានគំនិតអាជីវកម្មល្អបំផុត៕