អាការតានតឹងនៅកន្លែងធ្វើការ គឺជារឿងធម្មតាដែលអ្នកធ្វើការគ្រប់គ្នាតែងជួបប្រទះ ។ ប៉ុន្តែករណីភាពតានតឹង កើតឡើងជាប្រចាំ រហូតដល់ថ្នាក់គ្រប់គ្រងលែងបាន ធ្វើឱ្យអ្នកមានអារម្មណ៍ថាអស់កម្លាំង មានគំនិតអវិជ្ជមាន និងបាត់បង់ចំណង់បំពេញការងារ មានន័យថា អ្នកកំពុងធ្លាក់ក្នុងវិបត្តិគ្មានថាមពលក្នុងខ្លួន (Burn Out)។

អង្គការសុខភាពពិភពលោក (WHO) បានឱ្យនិយមន័យ វិបត្តិគ្មានថាមពលក្នុងខ្លួន (Burn Out) ថា គឺជាបាតុភូតមួយនាំឱ្យគ្មានកម្លាំងកាយ កម្លាំងចិត្ត ដែលបណ្ដាលមកពីភាពតានតឹងរ៉ាំរ៉ៃ ។ ខាងក្រោមនេះ គឺជាអាការៈមួយចំនួននៃវិបត្តិគ្មានថាមពលក្នុងខ្លួន (Burn Out)៖

• មានអារម្មណ៍ថា គ្មានថាមពលក្នុងខ្លួន ឬអស់ទាំងកម្លាំងកាយ និងកម្លាំងចិត្ត
• លែងមានចំណង់ធ្វើការ មានអារម្មណ៍អវិជ្ជមាន និងធុញទ្រាន់ចំពោះការងារដែលខ្លួនធ្វើ
• ធ្លាក់ចុះផលិតភាពការងារ។
  
  

ប្រសិនបើអ្នកសង្ស័យថា ខ្លួនឯងកំពុងមានវិបត្តិគ្មានថាមពលក្នុងខ្លួន (Burn Out) ចូរសួរសំណួរខាងក្រោមនេះទៅខ្លួនឯង៖

១. តើមានមនុស្សជិតស្និទ្ធ សុំឱ្យខ្ញុំបន្ថយពេលធ្វើការខ្លះដែរឬទេ?

២. តើប៉ុន្មានខែចុងក្រោយនេះ ខ្ញុំឧស្សាហ៍ខឹងមិត្តរួមការងារ ឬអតិថិជនដែរឬទេ?

៣. តើខ្ញុំមានអារម្មណ៍ថា ខ្លួនឯងខុស ព្រោះមិនបានចំណាយពេលជាមួយខ្លួនឯង គ្រួសារ និងមិត្តភក្តិដែរឬទេ?

៤. តើខ្ញុំមួយរយៈនេះ ងាយប៉ះទង្គិចផ្លូវចិត្តដែរឬទេ? ដូចជាងាយ ស្រក់ទឹកភ្នែក ឆាប់ខឹង ឧស្សាហ៍មួរម៉ៅ ស្រែកដាក់អ្នកដទៃ និងតានតឹងដោយគ្មានហេតុផលជាដើម។

ប្រសិនបើចម្លើយរបស់អ្នក ស្របនឹងសំណួរខាងលើ មានន័យថា អ្នកត្រូវផ្លាស់ប្ដូរឥរិយាបថជាបន្ទាន់។

តើអ្វីបណ្ដាលឱ្យមានវិបត្តិអស់ថាមពលក្នុងខ្លួន (Burn Out)?

យើងម្នាក់ៗមានសមត្ថភាពខុសៗគ្នា ក្នុងការទប់ទល់នឹងភាពតានតឹងផ្លូវអារម្មណ៍ និងរាងកាយ។ នៅពេលដែលយើងទទួលការងារមានទំហំធំជាងសមត្ថភាពរបស់យើងអាចដោះស្រាយបាន យើងនឹងទទួលអារម្មណ៍មិនស្រួលក្នុងខ្លួនដោយស្វ័យប្រវត្តិ។ លើសពីនេះ យើងអាចនឹងទទួលអារម្មណ៍តានតឹងខ្លាំង នៅពេលព្យាយាមជំរុញខ្លួនឯងឱ្យធ្វើរឿងមួយនោះ។

ជាទូទៅ បុគ្គលដែលមានវិបត្តិអស់ថាមពលក្នុងខ្លួន (Burn Out) តែងមានអារម្មណ៍ហត់នឿយផ្លូវចិត្ត និងព្រងើយកន្ដើយនឹងកិច្ចការចំពោះមុខ។ ពួកគេក្លាយជាមនុស្សគ្មានអារម្មណ៍ដូចមនុស្សយន្តអញ្ចឹង ហើយចាប់ផ្ដើមផ្ដាច់ខ្លួនពីមជ្ឈដ្ឋានជុំវិញ ដោយមិនចង់និយាយស្ដីជាមួយមិត្តរួមការងារ និងអតិថិជនជាដើម។ ពួកគេលែងខ្នះខ្នែងធ្វើការ និងចាប់ផ្ដើមបាត់បង់ចំណង់ចំពោះអាជីពដែលខ្លួនកំពុងធ្វើ។ ជាពិសេស ពួកគេក្លាយជាមនុស្សឆាប់ឆេវឆាវ បាត់បង់ផលិតភាពការងារ និងបាត់បង់ក្ដីស្រមៃផ្ទាល់ខ្លួន។ ម្ល៉ោះហើយ ចំណុចទាំងនេះ គឺជាសញ្ញាមិនល្អនោះទេ សម្រាប់អាជីពការងារបុគ្គល និងវឌ្ឍនភាពអង្គភាព។

គួរបញ្ជាក់ផងដែរថា វិបត្តិអស់ថាមពលក្នុងខ្លួន (Burn Out) មិនមែនជាជំងឺផ្លូវចិត្តទេ ប៉ុន្តែវាធ្ងន់ធ្ងរជាងជំងឺផ្លូវចិត្តទៅទៀត។ វិបត្តិនេះអាចនាំឱ្យមានបញ្ហាបែកបាក់គ្រួសារ ការអស់កម្លាំងកាយចិត្តរ៉ាំរ៉ៃ (Chronic fatigue syndrome) ភាពថប់បារម្ភ ជំងឺបាក់ទឹកចិត្ត វិបត្តិដំណេក និងអាចឈានទៅដល់ការប្រើគ្រឿងស្រវឹង និងគ្រឿងញៀនទៀតផង។

បុគ្គលដែលងាយមានវិបត្តិអស់ថាមពលក្នុងខ្លួន (Burn out)

បុគ្គលដែលមានអាជីព ត្រូវទាក់ទងជាមួយមនុស្ស គឺមានភាគរយខ្ពស់ជាងគេក្នុងការជួបវិបត្តិមួយនេះ។ ដោយអាជីពទាំងនោះរួមមាន គ្រូបង្រៀន មេធាវី ប៉ូលីស គិលានុបដ្ឋាយិកា វេជ្ជបណ្ឌិត មន្ត្រីពន្ធនាគារ អ្នកថែទាំមនុស្សចាស់ បុគ្គលិកផ្នែកលក់ និងមន្ត្រីឥណទានជាដើម។ យ៉ាងណាមិញ មិនថាអ្នកមានអាជីពជាអ្វីនោះទេ ប្រសិនបើអ្នកធ្វើការលើសសមត្ថភាពខ្លួនឯងក្នុងរយៈពេលវែង អ្នកនឹងងាយជួបវិបត្តិអស់ថាមពលក្នុងខ្លួន (Burn Out) ជាមិនខាន៕