ភ្នំពេញ – កម្មវីធីអាហារូបករណ៍ The ADB-Japan Scholarship Program (JSP) បានប្រកាស​ផ្ដល់អាហារូបករណ៍ថ្នាក់បរិញ្ញាបត្រជាន់ខ្ពស់សម្រាប់សិក្សានៅសាកលវិទ្យាល័យ Tokyo នៃប្រទេសជប៉ុនឆ្នាំសិក្សា២០២៣។ អាហារូបករណ៍ផ្ដល់ជូនការសិក្សាសម្រាប់និស្សិតបរទេសគ្រប់សញ្ជាតិដែលមានក្នុងប្រទេសសមាជិក ADB ក្នុងនោះ​រួមមានទាំងកម្ពុជាផងដែរ ។

ជំនាញថ្នាក់បរិញ្ញាបត្រជាន់ខ្ពស់ដែលអាហារូបករណ៍ផ្ដល់ជូនសិក្សារួមមាន ផ្នែកវិទ្យាសាស្ត្រ ការធ្វើផែនការទីក្រុង ការរចនាទីក្រុង វិទ្យាសាស្ត្រនិងបច្ចេកវិទ្យា វិទ្យាសាស្ត្របរិស្ថាន ផ្នែកសុខភាពសាធារណៈ ផ្នែកវិស្វកម្ម ការសិក្សាអភិវឌ្ឍន៍ ផ្នែកគ្រប់គ្រងពាណិជ្ជកម្ម គោលនយោបាយសាធារណៈ ផ្នែកគ្រប់គ្រងបរិស្ថាន ផ្នែកសេដ្ឋកិច្ច ផ្នែកភូមិសាស្ត្រ សិល្បៈក្នុងទំនាក់ទំនងអន្តរជាតិ ផ្នែកច្បាប់ និងជំនាញជាច្រើនទៀត ។

លក្ខខណ្ឌដែលបេក្ខជនអាចស្នើពាក្យអាហារូបករណ៍បានត្រូវមាន សញ្ញាបត្រថ្នាក់បរិញ្ញាបត្រ ជាប្រជាពលរដ្ឋដែលនៅក្នុងប្រទេសសមាជិក ADB មានបទពិសោធន៍ការងារពេញម៉ោងរយៈពេល២ឆ្នាំ ស្ទាត់ជំនាញភាសាអង់គ្លេស មានអាយុក្រោម៣៥ឆ្នាំ និងមានសុខភាពល្អ ។ លើសពីនេះបេក្ខជនដែលមានសញ្ជាតិ២មិនមានសិទ្ធក្នុងការទទួលបានអាហារូបករណ៍ មិនមែនជាបុគ្គលិកនៃស្ថាប័ន ADB-JSP និងត្រូវត្រឡប់ទៅកាន់ប្រទេសកំណើតវិញក្រោយបញ្ចប់ការសិក្សា ។

ឯកសារចាំបាច់ដែលបេក្ខជនដាក់ស្នើសុំពាក្យរួមមាន ប្រវត្តិរូបសង្ខេបផ្ទាល់ខ្លួន ប្រតិចារិកសញ្ញាប័ត្រ កំណត់ត្រាវិញ្ញាបនបត្រសិក្សា បំពេញទម្រង់ពាក្យសុំ ច្បាប់ចម្លងលិខិតឆ្លងដែនដែលមានសុពលភាព និង លិខិតយោងចំនួន២ ។

បេក្ខជនដែលជាប់អាហារូបករណ៍នឹងទទួលបានការគាំទ្រពីភាគីអាហារូបករណ៍ដូចជា ការសិក្សាដោយឥតបង់ថ្លៃនិងការចំណាយថ្លៃពាក្យផ្សេងៗ កន្លែងស្នាក់នៅ ថ្លៃសំបុត្រយន្តហោះធ្វើដំណើរ ថ្លៃធានារ៉ាប់រងសុខភាព និងថ្នាំព្យាបាលផ្សេងៗ លើសពីនេះអ្នកស្រាវជ្រាវអាចទទួលបានការចំណាយលើនិក្ខេបបទតាមការស្នើសុំ ។ គួរបញ្ជាក់ដែរថា ការគាំទ្រពីអាហារូបករណ៍នឹងមានតម្លៃខុសគ្នាទៅតាមជំនាញដែលបេក្ខជនរៀន ។

សម្រាប់ព័ត៌មានលម្អិត និងកាលបរិច្ចេទផុតកំណត់សូមចូលទៅកាន់ https://tinyurl.com/3aymf8nh ៕