ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសរសេរកំណត់ហេតុ ជាសកម្មភាពមួយដែលបញ្ជាក់បានពីការយកចិត្តទុកដាក់ជាមួយខ្លួនឯង ក្រៅពីនោះវាក៏ជាទម្លាប់មួយ ដែលជួយកាត់បន្ថយស្រ្តេសក្នុងបរិបទដ៏មមាញឹកនេះដែរ។ បច្ចុប្បន្ន មានមនុស្សជាច្រើនទទួលបាននូវបទពិសោធន៍ស្ត្រេស តាមរយៈរឿងរ៉ាវដែលមានប្រភពខុសៗគ្នា។
អ្វីទៅជាការកាត់ស្រ្តេសតាមរយៈកំណត់ហេតុ?
ពាក្យថាសរសេរកំណត់ហេតុ គេអាចយកទៅអនុវត្តន៍តាមរយៈច្រើនរូបភាព ដោយមានដាក់គោលដៅខុសៗគ្នា ហើយអត្ថប្រយោជន៍វិញ ក៏មានភាពខុសគ្នាទៅតាមការប្រើប្រាស់បច្ចេកទេស នៃការសរសេររបស់ខ្លួនដែរ! យ៉ាងណាមិញ ការសរសេរដើម្បីបន្ថយភាពតានតឹង ឬក៏បន្ធូរអារម្មណ៍ ជាប្រភេទសំណេរមួយដែលរក្សាភាពវិជ្ជមានសម្រាប់ខ្លួនឯង ព្រោះមិនត្រូវការចែករំលែកជាសាធារណៈ ឬបណ្តាញសង្គម។ ការកាត់ស្រ្តេសតាមរយៈកំណត់ហេតុ ភាគច្រើនរៀបរាប់អំពីអារម្មណ៍ដែលខ្លួនកំពុងមាន បទពិសោធន៍ដែលបានកើតឡើងកន្លងមក ក៏ដូចជាកត្តាដែលនាំឱ្យពួកគេមានអារម្មណ៍មិនល្អជាដើម, ការសរសេរបែបនេះជាការរំសាយអារម្មណ៍បានដោយមិនបារម្មណ៍អំពីការវាយតម្លៃពីមជ្ឈដ្ឋានខាងក្រៅ ការជំរុញទឹកចិត្តក្នុងការតស៊ូទៅមុខ និងឱកាសយ៉ាងពេញលេញក្នុងការឆ្លុះបញ្ចាំងអំពីបញ្ហាអ្វីមួយ។
ភាពច្របូកច្របល់ ភាពតានតឹង បង្កើនបានទៅជាផលមិនល្អចំពោះសុខភាពផ្លូវចិត្ត ដែលត្រូវការសកម្មភាព ក៏ដូចជាការជ្រើសរើសវិធីសាស្រ្តដែលមានភាពងាយស្រួលមួយ ក្នុងការបន្ធូរអារម្មណ៍មិនល្អដែលកើតមានកន្លងមក។ តាមរយៈគេហទំព័រ Erincondren បានប្រាប់អំពីអត្ថប្រយោជន៍ពីការជ្រើសយកការសរសេរកំណត់ហេតុ ដើម្បីបន្ថយស្រ្តេស ៖
១. ភាពសំខាន់ដែលគួរកាត់ស្រ្តេសតាមរយៈកំណត់ត្រា ៖ ការគ្រប់គ្រងស្ត្រេស ដើរតួនាទីយ៉ាងសំខាន់ក្នុងការថែរក្សាសុខុមាលភាព និងសុខភាពផ្លូវចិត្ត។ នៅពេលដែលឆ្លងកាត់ដំណាក់កាលធុញថប់ ឬស្ត្រេសភ្លាមៗ កម្លាំងនៃរាងកាយទាំងមូល ត្រូវការទប់ទល់ប្រឈមមុខនឹងសម្ពាធរហូតធ្វើឱ្យសុខភាពធ្លាក់ចុះ ក្នុងករណីខ្លះ ត្រូវការជំនួយពីអ្នកជំនាញក្នុងការទាញស្ថានភាពឱ្យល្អប្រសើរឡើងវិញ។ ស្ត្រេសមានផលប៉ះពាល់ទាំងសុខភាពផ្លូវកាយ និងផ្លូវចិត្ត ដែលជាមូលហេតុត្រូវការសកម្មភាពវិជ្ជមានមួយជួយកាត់បន្ថយស្ថានភាពអវិជ្ជមានទាំងនេះចេញ។ ការបង្កើតទម្លាប់ប្រចាំថ្ងៃ ក្នុងការកាត់បន្ថយស្រ្តេស បានដើរតួនាទីចម្បងមួយ ក្នុងការបន្ធូរអារម្មណ៍តានតឹង និងការតាមដានសុខភាពផ្លូវចិត្ត និងការបង្ការអាការស្រ្តេសកុំឱ្យធ្លាក់ក្នុងស្ថានភាពធ្ងន់ធ្ងរពេក។
២. បង្កើតកន្លែងដែលមានសុវត្ថិភាពជូនខ្លួនឯង ៖ ការចែករំលែករឿងរ៉ាវជាមួយអ្នកដទៃ ឬមនុស្សស្និទ្ធស្នាល គឺជាវិធីក្នុងការបន្ធូរអារម្មណ៍បានមួយផ្នែកពិតមែន យ៉ាងណាមិញ អ្នកដែលអាចចែករំលែកជាមួយបាន មិនប្រាកដថាពួកគាត់មានពេលគ្រប់គ្រាន់ដើម្បីស្តាប់ ហើយពេលខ្លះទៀតលោកអ្នកក៏បារម្ភអំពីការវាយតម្លៃពីខាងក្រៅ ដែលធ្វើឱ្យការរំសាយអារម្មណ៍ទាំងនោះ មិនអស់សេចក្ដី មិនអាចបញ្ចេញរាល់អ្វីដែលកំពុងតែមន្ទិលនៅក្នុងចិត្ត។ ដូច្នេះហើយ បានជាការសរសេរ ជាវិធីមួយជួយរំសាយកង្វល់ ព្រោះការបារម្មណ៍ពីមជ្ឈដ្ឋានខាងក្រៅ។ ការសរសេរក្នុងកំណត់ហេតុផ្ទាល់ កាន់តែផ្តល់នូវទំនុកចិត្តខ្ពស់ចំពោះខ្លួនឯងក្នុងការបញ្ចេញគំនិតដែលវិលវល់ និងការមិនពេញចិត្តចំពោះហេតុការណ៍ណាមួយ ក៏ដូចជាការរកឃើញដំណោះស្រាយព្រមជាមួយគ្នាផងដែរ។
៣. ការស្វែងរកចំណោទបញ្ហា ៖ ដើម្បីដោះស្រាយបញ្ហាមួយទៅបាន ចាំបាច់ណាស់ក្នុងការស្វែងរកឱ្យឃើញថា អ្វីទៅជាដើមចមដែលកើតទៅជាបញ្ហាទាំងនេះ? ហើយការសរសេរកំណត់ហេតុនេះទៀតសោត មិនត្រឹមតែបន្ថយអាការតានតឹងប៉ុណ្ណោះទេ ប៉ុន្តែរួមចំណែកដល់ការកំណត់អ្វីទៅជាឬសគល់នៃបញ្ហានីមួយៗទៀតផង នៅពេលដែលកត់ត្រារាល់បទពិសោធន៍ផ្ទាល់ខ្លួនជាប្រចាំ ហើយត្រឡប់ទៅមើលក្រោយបន្តិច នោះនឹករកឃើញថា តើកត្តាអ្វីខ្លះដែលបណ្តាលឱ្យស្រ្តេសបែបនេះ? មិនថាប្រភេទបញ្ហា ប្រភេទមនុស្ស ប្រភេទទស្សនៈ ប្រភេទផ្នត់គំនិត ឬក៏ប្រភេទបរិយាកាសនោះទេ សុទ្ធសឹងតែការរួមចំណែកដល់ការស្វែងរកបញ្ហាមកដោះស្រាយដោយមានប្រសិទ្ធភាព ក៏ដូចជាការបន្សាំខ្លួនទៅនឹងទម្លាប់វិជ្ជមានជាប្រចាំ៕
