ការថែទាំ ការផ្ដល់ក្ដីស្រឡាញ់ និងឱ្យតម្លៃខ្លួនឯង គឺជាកាតព្វកិច្ចរបស់យើងខ្លួនឯង ។ កាលណាសុខភាពផ្លូវកាយ និងផ្លូវចិត្តល្អ និងរឹងមាំ ជីវិតរបស់យើងក៏អាចល្អប្រសើរដែរ។ បើតាមលោក ប៊ុន លឹមហ៊ួរ អ្នកចិត្តសាស្រ្ត និងជាសមាជិកអ្នកចិត្តសាស្រ្ត អាមេរិក (APA Member,2024) បានចែករំលែកនូវ គន្លឹះ ៦ ដែលយើងអាចអនុវត្តបាន ដើម្បីមានសុខភាពល្អ រឹងមាំ និងជៀសផុតពីជំងឺបាក់ទឹកចិត្ត។

ទី១ សម្រាកឱ្យបានគ្រប់គ្រាន់ និងទៀងម៉ោង ដល់ម៉ោងសម្រាកចាំបាច់ត្រូវសម្រាក។ លោកបន្តថា កាលណាយើងគេងគេងគ្រប់គ្រាន់ យើងនឹងមានអារម្មណ៍ល្អ ធ្វើការបានល្អ ហើយផលិតភាពការងារក៏ល្អប្រសើរ។

ទី២ ការទទួលទានផ្លែឈើ ឬបន្លែ ឱ្យបានច្រើនជាងសាច់, យ៉ាងណាក៏ដោយ ពាក់ព័ន្ធនឹងរបបអាហារអ្នកអាចពិគ្រោះជាមួយគ្រូពេទ្យជំនាញបន្ថែមទៀត ដើម្បីទទួលបានរបបអាហារ ដែលអាចជួយទ្រទ្រង់រាងកាយរបស់យើងបានសមស្រប។

ទី៣ លំហាត់ប្រាណ, ចំណុចនេះលោកលើកឡើងថា ចំពោះការធ្វើសកម្មភាព អាចជាការដើរក៏បាន ទៅក្លិបហាត់ប្រាណក៏បាន ធ្វើចលនាក៏បាន សម្មាធិ ឬហាត់យូហ្គាក៏បាន។ លោកបន្ដថា បើតាមការស្រាវជ្រាវជាច្រើនបង្ហាញថា ការធ្វើលំហាត់ប្រាណ ជួយឱ្យមនុស្សមានជំងឺធ្លាក់ទឹកចិត្តមានអារម្មណ៍ប្រសើរឡើង ហើយបើតាមអនុសាសន៍របស់អង្គការសុខភាពពិភពលោក ក៏បានលើកទឹកចិត្តឱ្យយើងដើរយ៉ាងតិចឱ្យបានកន្លះម៉ោងផងដែរ ក្នុងមួយថ្ងៃ។

ទី៤ ទទួលទានសារធាតុញៀន​ ឬគ្រឿងស្រវឹង ក្នុងកម្រិតទាប ឬក៏មិនទទួលទានតែម្ដងគឺរឹងតែល្អ។ “ប៉ុន្តែខ្ញុំជឿថា មានអ្នកមួយចំនួន មិនអាចមិនទទួលទាន តែម្ដងនោះទេ ប៉ុន្តែជាការលើកទឹកចិត្ត សូមទទួលទានគ្រឿងស្រវឹង ឬជក់បារីក្នុងកម្រិតទាបមែនទែន”។

ទី៥ ការសរសេរពាក្យពេចន៍ល្អៗ, ការសិក្សាក្នុងឆ្នាំ ២០១១ ក្នុងគេហទំព័រ Emotion រកឃើញថា សិស្សានុសិស្ស នឹងកាន់តែមានអារម្មណ៍ល្អ នៅពេលដែលពួកគេសរសេរអំពីចំណុចល្អៗ អារម្មណ៍ល្អ សេចក្ដីប្រាថ្នា ឬឧត្តមគតិល្អៗរយៈពេល ១៥នាទី រៀងរាល់មួយសប្ដាហ៍។ ចំណុចនេះ យើងទាំងអស់គ្នាក៏អាចអនុវត្តបានដូចគ្នាដែរ ជាពិសេស គឺក្មេងជំទង់ និងយុវវ័យ ដែលកំពុងសិក្សានៅថ្នាក់វិទ្យាល័យ និងមហាវិទ្យាល័យ។

ទី៦ ចិត្តសប្បុរស ឬសេចក្ដីល្អ អ្នកជំនាញខាងលើមានប្រសាសន៍ថា ការបង្ហាញចិត្តសប្បុរស មនោសញ្ជេតនា និងសទ្ធាទៅកាន់អ្នកណាម្នាក់ ធ្វើឱ្យសុខុមាលភាពរបស់មនុស្សម្នាក់កាន់តែប្រសើរឡើង។ ជាក់ស្ដែង នៅឆ្នាំ ២០១០ ក្នុងនិទានុបវត្ត នៃចិត្តវិទ្យាសង្គម រកឃើញថា ការបង្ហាញទង្វើ ឬទឹកចិត្តសប្បុរសទៅកាន់អ្នកដទៃ ទោះតិចតួចក្ដី ធ្វើឱ្យប្រសើរឡើងនូវការពេញចិត្តក្នុងជីវិតរបស់យើង មានសុភមង្គល និងសប្បាយចិត្ត៕