ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជំនាញផ្នែកទំនាក់ទំនងលក់ និងទីផ្សារឌីជីថល (Digital Communication, Sales and Marketing) ជាជំនាញដែលគេរំពឹងថា នឹងមានតម្រូវការខ្ពស់នៅពេលអនាគតដ៏ខ្លី ព្រោះតែការធ្វើអាជីវកម្មបច្ចុប្បន្នកំពុងសម្របយ៉ាងឆាប់រហ័សទៅក្នុងពិភពលោកឌីជីថល។
លោក ឆន ឥស្សារ៉ារស្មី អ្នកសម្របសម្រួលកម្មវិធីសិក្សាជំនាញទំនាក់ទំនង លក់ និងទីផ្សារឌីជីថល សម្រាប់និស្សិតថ្នាក់បរិញ្ញាបត្រ នៃបណ្ឌិត្យសភាបច្ចេកវិទ្យាឌីជីថលកម្ពុជា (CADT) បានលើកឡើងថា សេដ្ឋកិច្ចឌីជីថលក្នុងតំបន់អាស៊ាន ត្រូវបានគេព្យាករណ៍ថា នឹងកើនឡើងដល់ ៣៦៣ពាន់លានដុល្លារអាមេរិក នៅឆ្នាំ២០២៥។ លោកបន្តថា ការកើនឡើងនេះ នឹងជំរុញដោយ ពាណិជ្ជកម្មអេឡិចត្រូនិក (E- Commerce) ការផ្សព្វផ្សាយពាណិជ្ជកម្មឌីជីថល និងការទទួលយកបច្ចេកវិទ្យាថ្មីៗ។
លោក ឥស្សារ៉ារស្មី លើកឡើងថា សម្រាប់បរិបទកម្ពុជា ក្រុមហ៊ុននៅក្នុងវិស័យជាច្រើន ដូចជា ការលក់រាយ វិស័យបច្ចេកវិទ្យា និងប្រព័ន្ធផ្សព្វផ្សាយ កំពុងតែជំរុញការវិនិយោគកាន់តែខ្លាំងឡើង ក្នុងទីផ្សារឌីជីថល ដើម្បីបង្កើនអតិថិជន និងការលក់របស់ខ្លួន។ ហេតុនេះ ជំនាញផ្នែកទំនាក់ទំនង លក់ និងទីផ្សារឌីជីថល ជាជំនាញដែលមានសារៈសំខាន់សម្រាប់ធុរកិច្ចបច្ចុប្បន្ន។
បើតាមការបញ្ជាក់របស់លោក ឥស្សារ៉ារស្មី ក្នុងបរិបទប្រទេសកម្ពុជា គំនិតផ្ដួចផ្ដើមអំពីបរិវត្តកម្មឌីជីថល ត្រូវបានអនុវត្តទាំងនៅក្នុងវិស័យសាធារណៈ និងឯកជន។ ការអនុវត្តនេះ ជំរុញឱ្យមានតម្រូវការ អ្នកជំនាញ ដែលអាចជួយកសាងយីហោអាជីវកម្មអនឡាញ ដើម្បីអាចទាក់ទាញអតិថិជន និងជំរុញការលក់។ លោកបន្តថា បច្ចុប្បន្នក្រុមហ៊ុនជាច្រើន កំពុងវិនិយោគលើវេទិកាឌីជីថល ដែលទាមទារឱ្យមានអ្នកជំនាញផ្នែកផ្សព្វផ្សាយឌីជីថល ការបង្កើតមាតិកាឌីជីថល ការគ្រប់គ្រងប្រព័ន្ធផ្សព្វផ្សាយសង្គម និងស្វ័យប្រវត្តិកម្មផ្នែកលក់។
លោក ឥស្សារ៉ារស្មី សង្កត់ធ្ងន់ថា មានវិស័យចម្បង ៥ ដែលកំពុងត្រូវការអ្នកជំនាញផ្នែក ទំនាក់ទំនង លក់ និងទីផ្សារឌីជីថល រួមមាន ៖ ទី១. ពាណិជ្ជកម្មអេឡិចត្រូនិក (E- Commerce) និងលក់រាយ, ទី២. ក្រុមហ៊ុនបច្ចេកវិទ្យា និងធុរកិច្ចថ្មី (Start-up), ទី៣. ប្រព័ន្ធផ្សព្វផ្សាយ និងកម្សាន្ត, ទី៤. ការទំនាក់ទំនងសាធារណៈ និងទីភ្នាក់ងារផ្នែកទំនាក់ទំនងឌីជីថល (Public Relations and Communication Agencies) និងទី៥ ក្រុមហ៊ុនក្នុងវិស័យធនាគារ វិស័យសុខាភិបាល និងទូរគមនាគមន៍។
លោក ឡេង គឹមហួរ និស្សិតជំនាញទំនាក់ទំនង លក់ និងទីផ្សារឌីជីថល លើកឡើងថា លោករៀនជំនាញនេះ ព្រោះយល់ថា ក្នុងបរិបទសង្គមឌីជីថល អ្នកជំនាញឌីជីថលនឹងមានតម្រូវការខ្ពស់ ជាពិសេសក្នុងវិស័យធុរកិច្ច។ ខណៈឧបសគ្គសម្រាប់លោកក្នុងការសិក្សាជំនាញនេះ គឺការសរសេរកូដ ប៉ុន្តែលោកនៅតែអាចសិក្សាបាន។ លោក គឹមហួរ បន្តថា យុវសិស្សដែលកំពុងរៀននៅវិទ្យាល័យ និងទើបតែចប់បាក់ឌុប គួរតែពិចារណារៀនជំនាញឌីជីថល ព្រោះបច្ចុប្បន្នកម្ពុជាកំពុងអភិវឌ្ឍទៅជាសង្គមឌីជីថល។
កញ្ញា ផល ច័ន្ទធីតា និស្សិតជំនាញធុរកិច្ចឌីជីថល បានលើកទឹកចិត្តទៅដល់ សិស្សានុសិស្សកំពុងរៀន និងទើបតែចប់ថ្នាក់វិទ្យាល័យ ហើយមានក្តីស្រឡាញ់វិស័យធុរកិច្ច គួរតែចាប់យកជំនាញទំនាក់ទំនង លក់ និងទីផ្សារឌីជីថល ព្រោះជំនាញនេះមិនត្រឹមតែសិក្សាអំពីធុរកិច្ចប៉ុណ្ណោះទេ ប៉ុន្តែនិស្សិតក៏ត្រូវសិក្សាអំពីបច្ចេកវិទ្យាដែរ ដើម្បីសម្របតាមយុទ្ធសាស្ត្របញ្ចកោណ ដែលមានមុំមួយផ្ដោតលើបច្ចេកវិទ្យា។
បើតាមលោក ឆន ឥស្សារ៉ារស្មី ដើម្បីចូលរៀនជំនាញនេះ សម្រាប់នៅ CADT សិស្សត្រូវឆ្លងកាត់ការប្រឡង ហើយចំពោះលក្ខខណ្ឌប្រឡង សិស្សទាំងអស់ត្រូវឆ្លងកាត់ការធ្វើតេស្តលើវិញ្ញាសា គណិតវិទ្យា តក្កវិទ្យា និងភាសាអង់គ្លេស។ លើសពីនេះ ប្រសិនបើការធ្វើតេស្តទទួលបានលទ្ធផលល្អ សិស្សក៏អាចទទួលបានឱកាសអាហារូបករណ៍ពីសាលាផងដែរ។
គួរជម្រាបជូនថា បើយោងតាមទិន្នន័យពីការជ្រើសរើសបុគ្គលិកនៅសហរដ្ឋអាមេរិក ក៏ដូចជាប្រទេសផ្សេងៗនៅលើពិភពលោក គេរកឃើញថា មានជំនាញឌីជីថលចំនួន៤កំពុងមានតម្រូវការខ្ពស់ ក្នុងនោះជំនាញទីផ្សារឌីជីថលក៏ស្ថិតក្នុងចំណោមជំនាញទាំង៤នោះដែរ ដោយមានអត្រាតម្រូវការកើនឡើងជារៀងរាល់ឆ្នាំក្នុងកំណើនយ៉ាងតិច១០ភាគរយ។ ដោយឡែកសម្រាប់ប្រទេសកម្ពុជាជំនាញនេះ ក៏ត្រូវបានក្រសួងប្រៃសណីយ៍ និងទូរគមនាគមន៍ លើកទឹកចិត្ត ដល់សិស្សានុសិស្សដែលទើបនឹងបញ្ចប់ថ្នាក់ទី១២ ចូលរៀនឱ្យបានច្រើន ដើម្បីទទួលបានជំនាញស្របតាមបរិបទ នៃសង្គម ៤.០ ក្នុងគោលដៅរកការងារបានល្អ និងចំណូលខ្ពស់៕
