ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា កាលពីពេលថ្មីៗនេះ បានដាក់ឱ្យប្រើប្រាស់ជាផ្លូវការនូវថ្នាលអប់រំ សាលាឌីជីថល https://sala.moeys.gov.kh សម្រាប់គាំទ្រដល់ការបង្រៀន-រៀន ស្របទៅតាមបរិបទថ្មី នៃការអប់រំបែបឌីជីថល និងគោលនយោបាយរដ្ឋាភិបាលឌីជីថលកម្ពុជា ២០២៣-២០៣៥ ប្រកបដោយបរិយាប័ន្ន គុណភាព និងស័ក្តិសិទ្ធិភាព។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ថ្នាលអប់រំ សាលាឌីជីថល បានបង្កើតឡើងក្នុងគោលបំណងលើកកម្ពស់ ជំរុញការចែករំលែក និងប្រើប្រាស់មាតិកាអប់រំឌីជីថលឱ្យកាន់តែសម្បូរបែបសម្រាប់បម្រើដល់ការបង្រៀន និងរៀន តាមរយៈការប្រើប្រាស់បច្ចេកវិទ្យាដែលផ្ដល់ភាពងាយស្រួលដល់គ្រឹះស្ថានសិក្សា គ្រូបង្រៀន និងសាធារណជនទូទៅក្នុងការបង្កើតសាលារៀននិម្មិត និងបង្កើតវគ្គសិក្សានានា នៅលើថ្នាលសាលាឌីជីថល សម្រាប់សិស្សានុសិស្សចូលធ្វើស្វ័យសិក្សាដោយសេរីមិនគិតថ្លៃ គ្រប់ពេលវេលា និងទីកន្លែង។
លោកជំទាវ ឃួន វិច្ឆិកា បន្ថែមថា ក្រសួងអប់រំ រៀបចំថ្នាលអប់រំ សាលាឌីជីថលនេះ ដើម្បីគាំទ្រ និងលើកកម្ពស់ការចែករំលែកឯកសារ និងលើកកម្ពស់ការរៀន និងបង្រៀនគ្រប់កម្រិតថ្នាក់ និងគ្រប់មុខវិជ្ជា ។ ទន្ទឹមគ្នានេះ ក៏ផ្ដល់ភាពងាយស្រួលដល់អ្នកប្រើប្រាស់ក្នុងការស្វែងរកឯកសារឌីជីថល តាមកម្រិតថ្នាក់ចាប់ពីមត្តេយ្យសិក្សារហូតដល់កម្រិតឧត្តមសិក្សា ដោយអាចធ្វើការស្វែងរកតាមរយៈពាក្យគន្លឹះ ប្រភេទក្រុមមុខវិជ្ជា ប្រភេទវគ្គសិក្សា និងកម្រិតថ្នាក់ជាដើម។
បើតាម អ្នកនាំពាក្យក្រសួងអប់រំ ថ្នាលអប់រំ សាលាឌីជីថល បានដាក់សាកល្បងឱ្យប្រើប្រាស់តាំងពីចុងឆ្នាំ២០២៣ កន្លងមក ហើយមកដល់ពេលបច្ចុប្បន្ននេះ មានអ្នកចូលប្រើប្រាស់ប្រមាណជិត ៩ម៉ឺននាក់ មានសៀវភៅចំនួន១៨៣៦ក្បាល និងមាន១១៨មេរៀន។
បើតាមសេចក្តីណែនាំរបស់ក្រសួងអប់រំ សម្រាប់ថ្នាលអប់រំ សាលាឌីជីថល, សាកលវិទ្យាធិការ នាយក គ្រឹះស្ថានសិក្សាសាធារណៈ និងឯកជន អាចចូលទៅបង្កើតសាលារៀននិម្មិត វគ្គសិក្សា និងបង្ហោះស្នាដៃសិក្សាស្រាវជ្រាវរបស់សិស្ស និស្សិត និងសាស្រ្តាចារ្យ នៅក្នុងនោះបាន ដើម្បីឱ្យធនធានឌីជីថលជាភាសាជាតិមានសម្បូរបែបលើបណ្តាញអ៊ីនធឺណេត សម្រាប់ជាប្រយោជន៍ដល់ការសិក្សា ការស្រាវជ្រាវ និងស្វ័យសិក្សារបស់សិស្ស និស្សិត និងអ្នកស្រឡាញ់ការសិក្សាពេញមួយជីវិត៕
