ក្រោយ​ការ​ប្រឡង​សញ្ញាបត្រមធ្យមសិក្សា​ទុតិយភូមិ ឬបាក់ឌុប បានបញ្ចប់ និង​កំពុងរង់ចាំលទ្ធផល សិស្សានុសិស្ស ក៏​ដូចជាអ្នកអាណាព្យាបាល កំពុងតែសម្លឹងមើលថា តើជំនាញណាខ្លះដែលនឹងមានតម្រូវការ​ក្នុងទីផ្សារការងារនៅកម្ពុជា ទាំងបច្ចុប្បន្ន និង​អនាគត ? សម្រាប់សហគ្រិនបានមើលឃើញជំនាញក្នុងវិស័យ​ចំនួន៧ ដែលសិស្សានុសិស្សទើបប្រឡង​បាក់ឌុបរួចគួរ​ពិចារណា ដើម្បីអនាគត​ការងារនៅពេលខាងមុខ។

លោកឧកញ៉ា ប៉ិច បូឡែន ប្រធានសមាគមសហគ្រិនវ័យ​ក្មេង​កម្ពុជា មើលឃើញថា ទាក់ទងនឹងអាជីពការងារ​ទៅថ្ងៃអនាគត គឺមានវិស័យចំនួន៧កំពុងតែខ្វះខាតធនធានមនុស្ស​កម្ពុជា ដូចជា វិស័យទេសចរណ៍ និង​បដិសណ្ឋារកិច្ច, លោកឧកញ៉ា មានប្រសាសន៍ថា វិស័យនេះធនធាន​មនុស្ស​របស់យើង​នៅមានកម្រិតនៅឡើយ បើប្រៀបធៀបនឹងបណ្តាប្រទេស​ដទៃ សម្រាប់ការ​ច្នៃប្រឌិត វិធីសាស្រ្ត​នៅ​ក្នុងការ​ដំណើរការ​សណ្ឋាគារ ភោជនីយដ្ឋាន ទីកន្លែងកម្សាន្តជាដើម ដូច្នេះបើយុវជន​យើង​រៀនឱ្យ​បានខ្ពស់ មានគំនិតច្នៃប្រឌិត អាច​គ្រប់គ្រងរៀបចំ​ព្រឹត្តិការណ៍ធំៗ នោះមិនខ្វះការងារ និង​មុខតំណែងល្អៗនោះទេ។

បន្ទាប់ពីវិស័យទេសចរណ៍ វិស័យ​ហិរញ្ញវត្ថុ និង​អាជីវកម្ម ក៏​ជាវិស័យ​ដែលនឹងមានតម្រូវការ​ទីផ្សារ​ការងារផងដែរ។ បើតាមលោកឧកញ៉ា ប៉ិច បូឡែន ប្រសិនបើ​យុវជន​ជ្រើសរើស​យកជំនាញក្នុងវិស័យ​ហិរញ្ញវត្ថុ សូមរៀន​ឱ្យដឹងពីទីផ្សារ​ភាគហ៊ុន ការ​វិភាគហិរញ្ញវត្ថុ ការ​គ្រប់គ្រងហិរញ្ញវត្ថុ យល់ដឹងពី​សុខភាពហិរញ្ញវត្ថុរបស់ក្រុមហ៊ុន យល់ដឹងពីដំណើរការ​នៃការ​វិនិយោគ​ទីផ្សារ​ភាគហ៊ុន ឬក៏​ការទិញលក់ភាគហ៊ុន ក៏​ដូចជា​បញ្ចូលក្រុមហ៊ុនជា​ដើម ដោយប្រសិនបើនិស្សិតចេះវាច្បាស់នោះ​អនាគត​ពិតជាប្រសើរ។

ពាក់ព័ន្ធនឹងវិស័យ​លក់ និងការធ្វើទីផ្សារវិញ (Sales and Marketing) លោកឧកញ៉ា​នៅតែមើលឃើញថា វានៅតែមានតម្រូវការ គ្រាន់តែនៅក្នុងបរិបទទំនើប និស្សិត​ត្រូវ​ចេះស្វែងយល់ពីបច្ចេកវិទ្យា និងមានគំនិតច្នៃប្រឌិត​ក្នុងការលក់ និង​ធ្វើទីផ្សារ​ក្នុងសម័យ​ឌីជីថល។

វិស័យដឹកជញ្ជូន គឺពិតជាសំខាន់​សម្រាប់​ប្រទេស​ដែលកំពុងអភិវឌ្ឍសេដ្ឋកិច្ច, តាមប្រសាសន៍របស់លោកឧកញ៉ា ប៉ិច បូឡែន គេពិតជាត្រូវការ​មិនអាចខ្វះបាន​អ្នកជំនាញក្នុងការ​ចរាចរទំនិញផលិតផល​ពីប្រទេសមួយ​ទៅប្រទេសមួយ អ្នកជំនាញក្នុងការ​គ្រប់គ្រង​ឃ្លាំងជាដើម។ ដោយឡែក វិស័យ​កសិឧស្សាហកម្ម កសិកម្មបែបទំនើប ពិសេស​ផ្តោត​ទៅលើ​កសិឧស្សាហកម្មកែច្នៃចំណីអាហារ ក៏​ជាអាទិភាពមួយ​ដែលប្រទេស​កម្ពុជា​យើង​កំពុង​ត្រូវការអ្នកជំនាញ ក្នុងការកែច្នៃផលិតផល​កសិកម្ម វេចខ្ចប់ ដើម្បីលក់ និង​នាំចេញ​ទៅ​ក្រៅ​ប្រទេស។

វិស័យអភិវឌ្ឍអចលនវត្ថុ បើទោះបច្ចុប្បន្ន​ហាក់នៅទ្រឹង តែលោកឧកញ៉ាមើលឃើញថា ប្រទេស​កម្ពុជាកំពុងអភិវឌ្ឍកាន់តែច្រើន ដូច្នេះនឹងមានតម្រូវការ​ច្រើន​សម្រាប់អាជីព​ការងារអភិវឌ្ឍអចលនវត្ថុ ដូចជា វិស្វករ ស្ថាបត្យករ អ្នកជំនាញជាងទឹក ភ្លើង គូប្លង់ គ្រប់គ្រងអគារ តបណ្តាញ​ប្រព័ន្ធទឹកភ្លើងជាដើម។

“ប្រទេស​យើងកំពុងអភិវឌ្ឍ និងកាន់តែ​អភិវឌ្ឍទៅមុខទៀត ដូច្នេះការផ្គត់ផ្គង់បណ្តាញសង្វាក់ផលិតកម្ម អាជីវកម្ម មុខរបរពាក់ព័ន្ធជាមួយនឹងសំណង់ ជាមួយការកសាងផ្ទះសម្បែង អគារវានៅតែមានតម្រូវការ…”

វិស័យឌីជីថល និង​បច្ចេកវិទ្យា គឺជាវិស័យ​ដើរតួយ៉ាងសំខាន់នៅក្នុងការ​អភិវឌ្ឍសេដ្ឋកិច្ច​របស់កម្ពុជា ប៉ុន្តែ​បើតាមលោកឧកញ៉ា ប៉ិច បូឡែន បើយុវជន​យើងចាប់យកជំនាញនេះ សូមរៀន​ឱ្យ​បានស៊ីជម្រៅ រៀនពីបណ្តា​ប្រទេស​ក្នុងតំបន់​ឱ្យ​បានច្រើន ដើម្បីដឹងថា បច្ចេកវិទ្យាដើរដល់ណា ដូចជា​បច្ចេកវិទ្យាហិរញ្ញវត្ថុ បច្ចេកវិទ្យា​កសិកម្ម បច្ចេកវិទ្យាអប់រំ ក៏​ដូចជាបច្ចេកវិទ្យាសុខាភិបាលជាដើម។ ហើយវិស័យចុងក្រោយ​ដែលសំខាន់បំផុតនោះ គឺវិស័យសុខាភិបាល លោកឧកញ៉ាលើកទឹកចិត្ត​ឱ្យ​យុវជន​កម្ពុជា ចូលរៀន​ក្នុងវិស័យ​សុខាភិបាល​ឱ្យបានច្រើន ហើយខំរៀន​ទាំងក្នុងស្រុក ទាំងក្រៅស្រុក ហើយបើមានឱកាស មានលទ្ធភាព សូមនាំគ្នាវិនិយោគលើវិស័យសុខាភិបាល​ឱ្យ​ខ្លាំងឡើងបន្ថែមទៀត៕