យោងតាមការសិក្សារបស់ WE Forum បានបង្ហាញថា ភាពតានតឹងរបស់សិស្ស ឬអ្នកធ្វើការងារតែងតែជួបប្រទះក្រោយទទួលបានលទ្ធផលមិនល្អ ឬមិនបានជោគជ័យ ដែលជាមូលហេតុជះផលអាក្រក់ដល់អារម្មណ៍ពេញមួយថ្ងៃ ឬយូរជាងមួយថ្ងៃ ។ ខាងក្រោមជាវិធីសាស្ត្រចំនួន៤ដើម្បីយកបទពិសោធន៍បរាជ័យទៅអភិវឌ្ឍខ្លួនឯងនៅសាលារៀន ឬកន្លែងការងារបានកាន់តែល្អប្រសើរ ។

១. កត់ត្រាទុក្ខលំបាក ៖ តាមការសិក្សាស្រាវជ្រាវបានបង្ហាញថា ធាតុសំខាន់នៃភាពជោគជ័យមិនមែនជាការតស៊ូរហូតទេ ព្រោះការតស៊ូព្យាយាមម្ដងហើយម្ដងទៀតអាចដំណើរការបានលុះត្រាតែបុគ្គលរៀនពីបរាជ័យរបស់ខ្លួនឯងសិន ។ ការកត់ត្រាពីការបរាជ័យ ការបដិសេដ និងហេតុការណ៍អវិជ្ជមានជាសកម្មភាពសម្របខ្លួនដ៏ល្អសម្រាប់ខ្លួនឯងទៅនឹងព្រឹត្តិការណ៍អវិជ្ជមានដែលបានជួប ។ ដូចនេះ ហេតុការណ៍ ឬព្រឹត្តិការណ៍នានាដែលបានកត់ទុក អ្នកអាចយកមកមើលដើម្បីក្រើនរំឮក ហើយអាចបោះជំហានទៅមុខជាមួយនឹងភាពប្រុងប្រយ័ត្ន និងការត្រៀមយុទ្ធសាស្ត្រថ្មីៗសម្រាប់ខ្លួនឯងនាពេលអនាគត ។

២. តាមដានការវិវត្តបន្តិចម្ដងៗ​ ៖ ការតាមដានសកម្មភាពរបស់ខ្លួនឯងពីមជ្ឈដ្ឋានជុំវិញខ្លួន ការទទួលមតិកែលម្អពីមិត្តភក្តិ និងអ្នកជុំវិញខ្លួនអាចឱ្យអ្នកសង្កេតមើលខ្លួនឯង ។ ក្រៅពីការកត់ត្រា អ្នកត្រូវសង្កេតមើលពីសកម្មភាពចាស់ៗ និងថ្មីៗ ហើយវិភាគមើលពីភាពរីកចម្រើន ឬការប្រែប្រួលរបស់ខ្លួន​ និងរៀនជំនាញថ្មីៗសម្រាប់ការអភិវឌ្ឍចំណេះរយៈពេលវែង ។

៣. គិតគូពីជំនាញហួសសម័យ ៖ ការរីកចម្រើន​នៃបច្ចេកវិទ្យា ឧស្សាហកម្ម និងសកលភាវូបណីយកម្ម គឺពិតជាមានតម្រូវការធនធានដែល​មានចំណេះជំនាញបន្ថែម ដូចនេះអ្នកត្រូវរៀនអ្វីថ្មីៗដើម្បីពង្រឹងចំណេះដឹង ។ ការអប់រំពេញមួយជីវិតជាកត្តាចាំបាច់ក្នុងកម្លាំងការងារដើម្បីធានានូវការប្រសើរឡើងចំណេះដឹង ។

៤. ទទួលយកដំណើរ និងប្រមើលមើលបញ្ហាប្រឈមថ្មីៗ ៖ ជារឿយៗមានការស្ទាក់ស្ទើរក្នុងការព្យាយាមម្ដងទៀត និងព្យាយាមជៀសវាងការធ្វើខុសដោយមិនបន្តធ្វើនឹងប្រឈមសារជាថ្មី ។ ការមិនហ៊ានប្រឈមអ្វីថ្មីៗជាការបិទផ្លូវ ឬសម្លាប់ភាពច្នៃប្រឌិតរបស់ខ្លួន ដោយ​នឹងធ្វើ​ឱ្យ​អ្នក​មិនអាចទៅរកភាពល្អជាងមុន ឬល្អឥតខ្ចោះបានឡើយ ។ ដូចនេះការចងក្រងឯកសារ ធ្វើការគណនាឡើងវិញ តាមដាន និងប្រមើលមើលបញ្ហាប្រឈមរបស់យើង ដើម្បីធានាបាននូវអាជីពជោគជ័យ តាមរយៈការអភិវឌ្ឍជំនាញថ្មីៗ ៕