បណ្ណាល័យប្រពៃក្នុងក្ដីស្រមៃសហគមន៍ខ្ញុំ គឺជាឈ្មោះគម្រោងមួយ ក្នុងគម្រោងដទៃទៀត របស់ក្រុមយុវជនស្ម័គ្រចិត្តដើម្បីសហគមន៍ (VMC)។ គម្រោងនេះ មានគោលដៅ បង្កើនចំណេះដឹងដល់កុមារ ឬក៏យុវជន ហើយក៏ជាការស្វែងយល់អំពី ការអាន ការស្តាប់ ដើម្បីជួយដល់អ្នកដែលអានសៀវភៅទាំងឡាយ មានសមត្ថភាពស្គាល់អំពីសាច់រឿងសៀវភៅ គោលបំណងសៀវភៅ ឬលក្ខណរបស់សៀវភៅ រួមទាំងការលើកកម្ពស់វិស័យអប់រំ ។ នេះជាការបញ្ជាក់របស់ យុវតី ម៉េត លីហ្សា ប្រធានក្រុមបណ្ណាល័យប្រពៃក្នុងក្ដីស្រមៃសហគមន៍ខ្ញុំ នៅក្នុងទិវាអន្តរជាតិសម្រាប់យុវជន ឆ្នាំ២០២៤ និងបច្ចុប្បន្នកំពុងសិក្សាថ្នាក់ទី១១ នៅវិទ្យាល័យ ហ៊ុន សែនល្វាស ខេត្តកណ្តាល។

យុវតីរូបនេះ បន្តឱ្យដឹងថា កំឡុងពេលសិក្សានៅវិទ្យាល័យ ខ្លួនបានវិនិយោគពេលខ្លះៗដែលនៅសេសសល់ពីការសិក្សា ចូលរួមការងារស្ម័គ្រចិត្តនេះ ។ ក្នុងនោះការបែងចែកពេលស្ម័គ្រចិត្ត ដែលធ្វើយ៉ាងណាឱ្យមានតុល្យភាព រវាងការសិក្សា និងការងារ ហាក់មានភាពរីកចម្រើន និងមានប្រសិទ្ធភាព បើប្រៀបធៀបទៅនឹងពេលដែលមិនទាន់ចូលធ្វើជាយុវជនស្ម័គ្រចិត្ត។

កាលមិនទាន់ប្រឡូកក្នុងកិច្ចការស្ម័គ្រចិត្ត ខ្ញុំមានពេលដើរលេងច្រើន និងប្រើប្រាស់ទូរស័ព្ទលើសលប់។ តែក្រោយពេលចូលក្នុងកម្មវិធីស្ម័គ្រចិត្តនេះ ខ្ញុំអាចគិតគូរគម្រោងជាច្រើន គិតអំពីកិច្ចការសំខាន់ៗ ដែលជួយឱ្យទៅមុខរលូនពាក់ព័ន្ធពីការងារ និងមានសប្បុរសជនជួយគាំទ្រ ចំពោះកិច្ចការពួកយើង។

ម៉េត លីហ្សា ប្រធានក្រុមបណ្ណាល័យប្រពៃក្នុងក្ដីស្រមៃសហគមន៍ខ្ញុំ

លីហ្សា បន្តថា ការប្រើប្រាស់ពេលទៅលើការសិក្សា ក៏ដូចជាការងារស្ម័គ្រចិត្ត ម្តងម្កាល អ្នកផ្ទះក៏បានសួរដែរថា ម្តេចមានបន្ទុកការងារច្រើនម្លេះ? រវល់រហូតឆ្លៀតពេលមិនបានសម្រាកសោះ! តែយ៉ាងណា លីហ្សា មិនបានបោះបង់នូវអ្វីដែលនាងកំពុងធ្វើនោះទេ លីហ្សាបានពន្យល់ប្រាប់ពីគោលជំហរ រួមទាំងការប្តេជ្ញាបន្តសកម្មភាព ក៏ដូចជាកាន់តែមានមោទនភាពចំពោះអ្វីដែលបានប្រតិបត្តិកន្លងមក។

តំណាងឱ្យក្រុមទាំងមូល លីហ្សា បានបន្ថែម ក្រុមយើងសង្កេតឃើញថា បច្ចុប្បន្ន កុមារ និងយុវជនមួយចំនួនបានយកពេលវេលាដែលខ្លួនមាន ទៅប្រព្រឹត្តសកម្មភាពដែលមិនឆ្លើយតបនឹងការអភិវឌ្ឍសមត្ថភាព ក៏ដូចជាមិនពង្រឹងវិថីនៃការសិក្សា។ ដូច្នេះ គម្រោងបណ្ណាល័យប្រពៃក្នុងក្ដីស្រមៃសហគមន៍ខ្ញុំ គឺជាចំណែកជំរុញឱ្យយុវជនងាកមកចាប់អារម្មណ៍នឹងការអាន ក៏ដូចជាពង្រឹងឱ្យសហគមន៍ និងវិស័យអប់រំកាន់តែប្រសើឡើង។ «បទពិសោធន៍ នៃការអានសៀវភៅ និងចូលរួមក្នុងការងារស្ម័គ្រចិត្តនេះ ខ្ញុំផ្លាស់ប្តូរច្រើនគួរសមដែរ! ដូចជា ទទួលបានបទពិសោធន៍ថ្មីៗ ក្លាហានជាងមុន កាត់បន្ថយសកម្មភាពដែលមិនមានប្រយោជន៍ ហ៊ានឆ្លើយសំណួរគ្រូ លទ្ធផលការសិក្សាក៏ប្រសើរ និងមានការបែងចែកពេលវេលាបានល្អ និងប្រសិទ្ធភាពជាងមុន»៕