ការបណ្ដុះគំនិត និងសមត្ថភាពច្នៃប្រឌិត (Creativity) គឺជាផ្នែកមួយ ដ៏សំខាន់សម្រាប់កុមារ មិនថាពួកគេកើតមកជាមួយនឹងទេពកោសល្យច្នៃប្រឌិត ឬក៏អត់ក៏ដោយ។ សមត្ថភាពនេះ នឹងជួយឱ្យពួកគេយល់ពីរបៀបបង្ហាញភាពខ្លួនឯង និងគាំទ្រសុខភាពផ្លូវអារម្មណ៍ និងផ្លូវចិត្តរបស់គេ។

ការសិក្សាក្នុងសៀវភៅ ដែលមានចំណងជើងថា «Creativity for Everybody» ដែលសរសេរដោយ Kathryn Haydon បានបង្ហាញថា កុមារដែលអាចចូលទៅក្នុងពិភពនៃភាពច្នៃប្រឌិត អាចជួយពួកគេបង្កើនគុណភាពជីវិត តាំងពីពួកគេនៅក្មេង រហូតដល់ពេញវ័យ ហើយក៏អាចជួយឱ្យពួកគេមានអាយុវែងផងដែរ។

WOLSEY HALL OXFORD បានណែនាំថា ដើម្បីចិញ្ចឹមបីបាច់ឱ្យកុមារម្នាក់ក្លាយជាកុមារ ដែលមានជំនាញ និងគំនិតច្នៃប្រឌិតខ្ពស់ អាណាព្យាបាល អាចអនុវត្តវិធីសាស្ត្រ ចំនួន ៥ ។

១. នាំកុមារចេញក្រៅផ្ទះ ៖ ការចំណាយពេលនៅខាងក្រៅច្រើន គឺជាវិធីសាស្ត្រដ៏ល្អមួយ ក្នុងការចិញ្ចឹម និងបណ្ដុះកុមារ ឱ្យមានគំនិតច្នៃប្រឌិតខ្ពស់។ ហេតុនេះ អាណាព្យាបាល គួរមានពេលវេលា នាំកុមារចេញទៅខាងក្រៅឱ្យបានញឹកញាប់ តាមដែលអាចធ្វើទៅបាន។ មិនថាជាការដើរក្នុងភូមិ ការលេងកម្សាន្តនៅសួនច្បារ ឬក៏ឡើងភ្នំនៅថ្ងៃឈប់សម្រាកនោះទេ។ ខណៈពេលចេញក្រៅ អាណាព្យាបាល អាចលើកទឹកចិត្តឱ្យកុមារសង្កេតមើលអ្វីៗនៅជុំវិញខ្លួនគេឱ្យបានច្រើន ព្រោះសកម្មភាពនេះ នឹងជំរុញឱ្យកុមារមានជំនាញចង់ដឹងចង់ឃើញ (Curiosity) និងផ្ដល់ឱ្យពួកគេនូវការយល់ដឹងកាន់តែស៊ីជម្រៅអំពីធម្មជាតិនៅជុំវិញខ្លួន។

២. ឱ្យពួកគេញ៉ាំអាហារឱ្យបានច្រើនប្រភេទ ៖ ការសាកល្បងញ៉ាំអាហាររសជាតិថ្មីៗ គឺជាវិធីសាស្ត្រដ៏ល្អមួយ ដើម្បីធ្វើឱ្យកុមារមានអារម្មណ៍រំភើបអំពីការភ្លក្សរសជាតិផ្សេងៗ ហើយនេះក៏ជាផ្នែកមួយក្នុងការបង្កើនការយល់ដឹងរបស់គេផងដែរ។ ប្រសិនបើអ្នកមានពេលវេលា និងថវិកា អាចធ្វើរឿងនេះបាន អាណាព្យាបាល គួរអនុញ្ញាតឱ្យកុមារញ៉ាំអាហារឱ្យបានច្រើនប្រភេទ ជាពិសេសគឺការញ៉ាំបន្លែ ឬផ្លែឈើ ដែលពួកគេមិនធ្លាប់ញ៉ាំឱ្យបានម្ដងក្នុងមួយសប្ដាហ៍។ វាអាចជាបន្លែប្លែកៗ ដូចជា ផ្លែស្រកានាគ ដំឡូង ផែ្លគីវី ឬក៏ផ្លែឈើផ្សេងៗទៀត។ ចំណុចសំខាន់នៃការភ្លក្សអាហារឱ្យបានច្រើនប្រភេទនេះ ផ្ដល់ឱកាសឱ្យកុមារ ទទួលបានបទពិសោធន៍ និងរៀនសូត្រពីអ្វីថ្មីៗ។

៣. អនុញ្ញាតឱ្យពួកគេមានអារម្មណ៍អផ្សុក ៖ ការសិក្សាបង្ហាញថា អារម្មណ៍អផ្សុក អាចជំរុញភាពច្នៃប្រឌិតសម្រាប់កុមារ ដោយជំរុញឱ្យពួកគេ គិតក្រៅប្រអប់ (Think outside the box)។ នៅពេលដែលពេលវេលា នៅជាមួយអេក្រង់របស់គេដល់កំណត់ ហើយកុមារចាប់ផ្ដើមរអ៊ូអំពីភាពអផ្សុក ឬក៏គ្មានអ្វីធ្វើ អាណាព្យាបាល អាចលើកទឹកចិត្តឱ្យគេរកវិធីកម្សាន្តដោយខ្លួនឯង តាមរយៈការ គូសរូប ផាត់ពណ៌ អានសៀវភៅ សរសេរ លេងល្បែងក្មេងៗ (Toy) ចំណាយពេលនៅខាងក្រៅជាមួយមិត្តភក្តិ និងរៀបរូបផ្គុំជាដើម។

៤. លើកទឹកចិត្តឱ្យពួកគេប្រើការគិត និងស្រមើស្រម៉ៃ ៖ អាណាព្យាបាលអាចសួរកុមារ អំពីសំណួរផ្សេងៗ ដែលជំរុញឱ្យពួកគេហ្វឹកហាត់ការគិត។ សំណួរទាំងនោះអាចសួរអំឡុងពេលញ៉ាំអាហារពេលល្ងាច មុនចូលគេង ឬអំឡុងពេលដើរលេងចុងសប្ដាហ៍ជាដើម។

៥. ឱ្យពួកគេចូលរួម ដោះស្រាយបញ្ហា ៖ ប្រសិនបើមានអ្វីមួយនៅផ្ទះ ត្រូវការផ្លាស់ប្ដូរ ជួសជុល ឬដោះស្រាយ អាណាព្យាបាល អាចសុំឱ្យកុមារចូលរួមជាមួយ ធ្វើការងារទាំងនោះ ដើម្បីបណ្ដុះទម្លាប់គិត និងដោះស្រាយបញ្ហាជាក់ស្ដែង។ ការអនុញ្ញាតឱ្យកុមារ ចូលរួមធ្វើកិច្ចការទាំងនេះ ជាផ្នែកមួយដ៏សំខាន់ ដែលជំរុញឱ្យកុមារ ទទួលអារម្មណ៍ថា ពួកគេជាចំណែកសំខាន់ ក្នុងការងារផ្សេងៗ ដែលធ្វើឱ្យពួកគេមានភាពជឿជាក់ និងមានទម្លាប់គិតប្រកបដោយភាពច្នៃប្រឌិត ក្នុងការដោះស្រាយបញ្ហា៕​