ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មានការងារ ឬមុខរបរលើសពីមួយមិនមែនជារឿងដែលចម្លែកសម្រាប់បុគ្គលដែលខិតខំព្យាយាមក្នុងការស្វែងរកប្រាក់ចំណូលបន្ថែមសម្រាប់ជីវភាព។ មិនខុសគ្នានេះ សាត ស្រីម៉ៅ បានប្រកបរបរជាអ្នកលក់ដូរគ្រឿងលម្អសម្រាប់ស្ត្រីនៅពេលល្ងាច ក្រោយពេលបំពេញការងារជាបុគ្គលិកក្រុមហ៊ុនក្នុងរយៈពេលមួយថ្ងៃ។
កញ្ញា សាត ស្រីម៉ៅ ជាបុគ្គលិកក្រុមហ៊ុនឯកជនមួយកន្លែងដែលធ្វើការចាប់ពីពេលព្រឹក ដល់ពេលល្ងាច និងជាម្ចាស់អាជីវកម្មតូចមួយដែលចាប់បើកលក់នៅពេលក្រោយបំពេញភារកិច្ចជាបុគ្គលិកក្រុមហ៊ុន។ អាជីវកម្មរបស់ ស្រីម៉ៅ ជាការលក់គ្រឿងលម្អតូចៗមនុស្សស្រីដែលមានដូចជា ខ្សែរដៃអង្កាំ ខ្សែក បន្តោងខ្សែក ដង្កៀបកៀបសក់ បូសក់ និងសម្ភារៈលម្អមួយចំនួនទៀត។ ការលក់សម្ភារៈតូចៗនេះ ស្រីម៉ៅ បានលក់នៅកន្លែងផ្សេងៗគ្នាទៅតាមពេលវេលា ដូចជាលក់នៅសួនច្បារមាត់ទន្លេនៅម្ដុំមុខព្រះបរមរាជវាំង ឬតាមសួនផ្សេងៗចាប់តាំងពីពេលល្ងាចរហូតដល់យប់ជ្រៅជាដើម។
កញ្ញា សាត ស្រីម៉ៅ បន្ថែមថា បច្ចុប្បន្ននេះក្នុងដំណាក់កាលរដូវភ្ជុំបិណ្ឌ កញ្ញាបានផ្លាស់ប្ដូរទៅលក់នៅភ្នំជីសូរ ដែលទទួលបានការគាំទ្រច្រើនគួរសម ដោយកញ្ញាអាចរកចំណូលបានបន្ថែមច្រើនជាងមុន។ ម្ចាស់អាជីវកម្មខ្នាតតូចរូបនេះបន្តថា ការឆ្លៀតលក់ដូរក្រោយធ្វើការពេញមួយថ្ងៃនេះមានភាពហត់ដែរ ព្រោះពេលខ្លះត្រូវនៅដល់យប់ជ្រៅ ហើយឥវ៉ាន់មានទម្ងន់ធ្ងន់ ប៉ុន្តែកញ្ញា មិនបោះបង់ ឬបញ្ឈប់ទេព្រោះជាអ្វីដែលខ្លួនចូលចិត្ត អាចរកប្រាក់ចំណូលបន្ថែម និងជួយសម្រួលជីវភាពឱ្យប្រសើរជាងមុន ជាពិសេសក្នុងឱកាសនៃពិធីបុណ្យភ្ជុំបិណ្ឌ។
កញ្ញា សាត ស្រីម៉ៅ បន្តដោយក្ដីរីករាយថា ត្បិតការធ្វើតាមក្ដីស្រមៃ និងក្ដីស្រលាញ់នេះអាចហត់បន្តិចប៉ុន្តែអាចជំនួសមកវិញនូវភាពសប្បាយចិត្តដែរ ព្រោះអាចធ្វើនូវអ្វីដែលខ្លួនស្រលាញ់ និងចូលចិត្ត។
ជារួមកញ្ញា ស្រីម៉ៅ សូមលើកទឹកចិត្តដល់អ្នកដែលមានក្ដីស្រមៃចង់បង្កើត ឬបន្ថែមអាជីវកម្មខ្លួនឯង សូមអត់ធ្មត់ និងតស៊ូជាមួយនឹងការងារគោលឱ្យបានល្អ សឹមអនុវត្តន៍ការងារបន្ថែមតាមក្រោយដោយយកចិត្តទុកដាក់ ធ្វើបែបនេះទើបមិនធ្វើឱ្យផលិតភាពការងារធ្លាក់ចុះ៕
