ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រោយទទួលបានលទ្ធផលនិទ្ទេស A លំដាប់ពិន្ទុ ១០០ក្នុងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុបឆ្នាំ២០២៦) ឪពុករបស់យុវជន សេន កេតរ៍ស័កធនិន បានបង្ហើបពីការខិតខំសិក្សារបស់កូនប្រុសថា រូបគេជាសិស្សពូកែតាំងពីតូច និងបានរៀនត្រៀមមុខវិជ្ជាថ្នាក់ទី១២ តាំងពីចូលរៀនថ្នាក់ទី១០។
យុវជន សេន កេតរ៍ស័កធនិន ជាសិស្សនិទ្ទេស A លំដាប់ពិន្ទុ ១០០.០០០ មកពីសាលារៀនអារីហ្សូន សាខាខេត្តសៀមរាប។
លោក សែន សារី ឪពុករបស់យុវជនរូបនេះ បានប្រាប់ AMS ថា លោកមានអារម្មណ៍រំភើប និងសប្បាយរីករាយជាខ្លាំង នៅពេលឃើញកូនទទួលបានលទ្ធផលប្រឡងដ៏ល្អប្រសើរ បន្ទាប់ពីកូនបានខិតខំរៀនសូត្រអស់រយៈពេលជាច្រើនឆ្នាំ។
លោកបានឱ្យដឹងថា ធនិន ជាសិស្សពូកែតាំងពីនៅតូចមកម្ល៉េះ ហើយបានសង្វាតរៀនត្រៀមមុខវិជ្ជាថ្នាក់ទី១២ តាំងពីចូលថ្នាក់ទី១០។ ការត្រៀមខ្លួននេះធ្វើឡើងតាមរយៈការសិក្សានៅសាលារៀនអារីហ្សូន ការស្វ័យសិក្សា និងរៀនបន្ថែមជាមួយគ្រូ។
ការខិតខំរៀនតាំងពីថ្នាក់ទី១០នេះ ត្រូវបានឪពុកចាត់ទុកថា ជាផ្នែកមួយនៃការរៀបចំខ្លួនរបស់កូនសម្រាប់ការប្រឡងថ្នាក់ទី១២ និងជួយឱ្យរូបគេទទួលបានលទ្ធផលខ្ពស់នៅពេលប្រឡង។
ដោយឡែក យុវជន សេន កេតរ៍ស័កធនិន បានឱ្យដឹងថា រូបគេមានគម្រោងបន្តការសិក្សាលើជំនាញវិស្វកម្មអេឡិចត្រូនិក នៅរាជធានីភ្នំពេញ ឬស្វែងរកឱកាសអាហារូបករណ៍ទៅសិក្សាជំនាញនេះនៅក្រៅប្រទេស។
យុវជនរូបនេះបញ្ជាក់ថា មូលហេតុដែលជ្រើសរើសជំនាញវិស្វកម្មអេឡិចត្រូនិក គឺដោយសាររូបគេស្រលាញ់ជំនាញនេះ និងយល់ឃើញថា ជំនាញនេះនឹងមានទីផ្សារការងារល្អនាពេលអនាគត។
សម្រាប់ការជ្រើសរើសជំនាញសិក្សាបន្ត លោក សែន សារី បានបញ្ជាក់ថា លោកគាំទ្រកូនក្នុងការជ្រើសរើសជំនាញតាមចំណង់ចំណូលចិត្ត និងបំណងរបស់កូន ដើម្បីជួយឱ្យកូនមានអនាគតល្អប្រសើរ។
សូមជម្រាបថា បេក្ខជនដែលទទួលបាននិទ្ទេស A ក្នុងការប្រឡងបាក់ឌុបឆ្នាំនេះ មានចំនួន ២,០២២នាក់។ បេក្ខជនទទួលបាននិទ្ទេស A ក៏កំពុងត្រៀមទទួលរង្វាន់លើកទឹកចិត្តពីសំណាក់រាជរដ្ឋាភិបាល អាជ្ញាធរដែនដី និងសប្បុរសជនជាបន្តបន្ទាប់ ក្រោយខិតខំប្រឡងទទួលបានលទ្ធផលល្អប្រសើរ៕
