ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការនៅម្នាក់ឯង មិនមែនជាកត្តាហានិភ័យធំបំផុត ដែលនាំឱ្យមនុស្សខ្សោយសមត្ថភាពចងចាំនោះទេ ប៉ុន្តែការទទួលអារម្មណ៍ឯកា នឹងធ្វើឱ្យអ្នកជួបបញ្ហានេះ។ នេះបើតាមការសិក្សាថ្មី ដែលចុះផ្សាយលើ ScienceDirect។
អ្នកស្រាវជ្រាវនៅសាកលវិទ្យាល័យ Waterloo បានសិក្សាលើក្រុមមនុស្សពេញវ័យ ៤ ក្រុមអស់រយៈពេល ៦ឆ្នាំ ដើម្បីតាមដាន មើលថា តើភាពឯកា និងការផ្ដាច់ខ្លួនពីសង្គម អាចមានឥទ្ធិពលដល់ការចុះខ្សោយសមត្ថភាពចងចាំដោយរបៀបណា។ ក្រុមមនុស្សដែលបានចូលរួមនោះមានដូចជា អ្នកដែលផ្ដាច់ខ្លួនពីសង្គម និងមានអារម្មណ៍ឯកា, អ្នកផ្ដាច់ខ្លួនពីសង្គម, អ្នកមានអារម្មណ៍ឯកា និងអ្នកដែលមិនមានបញ្ហាទាំងនេះ។
អ្នកឆ្លើយសំណួរដែលបានផ្ដាច់ខ្លួនពីសង្គម និងមានអារម្មណ៍ឯកា គឺប្រឈមនឹងការចុះខ្សោយសមត្ថភាពចងចាំខ្ពស់ជាងក្រុមដទៃទៀត។ ខណៈក្រុមមនុស្សដែលមានអារម្មណ៍ឯកា ស្ថិតក្នុងហានិភ័យលំដាប់ទី២ ដែលត្រូវប្រឈមនឹងភាពចុះខ្សោយការចងចាំ។
ទន្ទឹមនឹងនេះ ការសិក្សារកឃើញថា ការភ្ជាប់ទំនាក់ទំនងសង្គម អាចជួយឱ្យខួរក្បាលមនុស្សពេញវ័យមានសុខភាពល្អ និងមានអារម្មណ៍រីករាយ នៅពេលដែលអាយុកាន់តែច្រើន។ ម្យ៉ាងទៀត ការរក្សាស្មារតីអ្នកឱ្យសកម្ម ពេលដែលអ្នកនៅម្នាក់ ក៏មានសារៈសំខាន់ផងដែរ។
អ្នកវិទ្យាសាស្ត្រសរសៃប្រសាទ បានពន្យល់ថា មធ្យោបាយមួយ ដែលអាចជួយពង្រឹងសមត្ថភាពខួរក្បាលរបស់យើង និងធ្វើឱ្យស្មារតីមានភាពសកម្ម គឺការរៀនជំនាញ និងសាកល្បងធ្វើរឿងថ្មីៗ។ សកម្មភាពដូចជា ការធ្វើដំណើរកម្សាន្ត ឬធ្វើដំណើរទៅទីកន្លែងផ្សេងៗ ការរៀនភាសាថ្មី ការអានសៀវភៅ និងហាត់ប្រាណ សុទ្ធតែអាចជួយពង្រឹងសុខភាពខួរក្បាលរបស់មនុស្សពេញវ័យ និងវ័យចំណាស់ឱ្យប្រសើរឡើង៕
