ចាប់ពីឆ្នាំ​២០២៤តទៅ វិភាគទាន​ដែលមាតាបិតាសិស្សធ្លាប់​បង់សម្រាប់​កិច្ច​ដំណើរការ​សាលារៀនជំនាន់ថ្មី នឹងលែងជាកាតព្វកិច្ចទៀតហើយ ដោយរដ្ឋនឹងជាអ្នកបំពេញនូវតម្រូវការសម្រាប់​កិច្ច​ដំណើរការសាលារៀនជំនាន់ថ្មីទាំងអស់ តែជាមួយ​គ្នា ​សាលារៀនក៏នៅតែអាចបន្តទទួលវិភាគទានពីសប្បុរសជន ក៏​ដូចជាមាតាបិតា អ្នកអាណាព្យាបាលសិស្ស​តាមគោលការណ៍ស្ម័គ្រចិត្ត។ នេះបើតាម​សេចក្តីប្រកាស​ព័ត៌មានរបស់ក្រសួងអប់រំ យុវជន និងកីឡា ស្តីពីក្របខណ្ឌអភិវឌ្ឍន៍សាលារៀនជំនាន់ថ្មី។

ចាប់តាំងពីឆ្នាំ២០១៦ នៃការសាកល្បងដំណើរការកម្មវិធីសាលារៀនជំនាន់ថ្មី មកដល់ឆ្នាំ២០២៣​ រាជរដ្ឋាភិបាលបានវិនិយោគលើកម្មវិធីនេះ សរុបថវិកាចំនួន ១២.៤លានដុល្លារ រួមផ្សំជាមួយថវិការបស់មូលនិធិសប្បុរសជន និង​ការ​ចូលរួមថវិកាបដិភាគពីមាតាបិតា អ្នកអាណាព្យាបាលសិស្សផងដែរ ។ ក្នុងនោះចំពោះសិស្សមកពីគ្រួសារក្រីក្រ និង​មានប័ណ្ណក្រីក្រ ត្រូវបានចូលរៀនដោយមិនតម្រូវ​ឱ្យបង់វិភាគទាននោះទេ។

គិតត្រឹមឆ្នាំ២០២៣ សាលារៀនជំនាន់ថ្មី​មានចំនួន ១៣កន្លែង (សាលាបឋមសិក្សា​៤កន្លែង និងសាលាមធ្យមសិក្សា៩កន្លែង) មានទីតាំងនៅរាជធានីភ្នំពេញ, ខេត្តកណ្តាល, កំពង់ចាម, កំពង់ស្ពឺ, ស្វាយរៀង និង​ខេត្តព្រៃវែង។ ចំនួនសិស្សបានកើនឡើងពី ៤៣៤នាក់ នៅឆ្នាំ២០១៦ ដល់ ៩៨៥៨នាក់ នៅឆ្នាំ២០២៣។

បើតាមក្រសួងអប់រំ ដើម្បីបន្ត​អភិវឌ្ឍធនធានមនុស្សប្រកបដោយគុណភាពខ្ពស់ ខ្លួននឹងបន្តប្រែក្លាយសាលារៀនជំនាន់ថ្មី ពីកន្លែង​អាទិភាពសម្រាប់តែសិស្សឆ្នើម​ដែលមានលទ្ធភាពផ្នែកថវិកា ទៅជា​មជ្ឈមណ្ឌល​ឧត្តមភាព (Centre of Excellence) ដែលបើកចំហសម្រាប់សិស្សឆ្នើមទាំងអស់ប្រកបដោយសមធម៌ ។ ក្នុងនោះ ក្រសួងនឹងពង្រឹងគម្រោងសាលារៀនជំនាន់ថ្មី តាមគោលការណ៍ភូមិសាស្រ្ត ដោយត្រូវ​បង្កើត​ឱ្យ​បានមួយសាលារៀនយ៉ាងហោចសម្រាប់ទីរួមខេត្ត​នីមួយៗ និង​ពង្រីក​ឱ្យ​បានទូទាំង ២៥ខេត្ត រាជធានី តាមអភិក្រមរក្សាទុកសាលារៀនដែលបាន​និង​កំពុង​អនុវត្ត​រួចហើយ។

សូមបញ្ជាក់ថា សាលារៀនជំនាន់ថ្មី ជាគំរូនៃសាលារៀនដែលមានអភិបាលកិច្ចល្អកម្រិតខ្ពស់ និង​បណ្តុះបណ្តាល​គ្រូប្រកបដោយបទដ្ឋានវិជ្ជាជីវៈខ្ពស់។ សាលារៀនជំនាន់ថ្មីផ្តោតលើការបណ្តុះបណ្តាលខាងផ្នែកបច្ចេកវិទ្យា និង​វិទ្យាសាស្រ្ត (STEM) ដែលឆ្លើយតបទៅនឹងចក្ខុវិស័យ ក្នុងការបង្កើតសង្គម និងសេដ្ឋកិច្ចឌីជីថល ដោយប្រើប្រាស់បច្ចេកវិទ្យាក្នុងការរៀន និង​បង្រៀន និង​សម្រាប់ត្រៀមសិស្ស​ដើម្បីរៀនខាងផ្នែកវិស្វករ គ្រឿងយន្ត អេឡិចត្រូនិច សំណង់ ឧស្សាហកម្មចំណីអាហារ វេជ្ជសាស្រ្ត បច្ចកវិទ្យាព័ត៌មាន ការសរសេរកម្មវិធីកុំព្យូទ័រ វិទ្យាសាស្រ្តទិន្នន័យ អ្នករចនា (Designer) សោតទស្សន៍ (Media) សម្រាប់ការធ្វើពិពិធកម្មសេដ្ឋកិច្ច។

សាលារៀនជំនាន់ថ្មីអនុវត្តកម្មវិធីសិក្សា​បានពេញមួយថ្ងៃ ដោយប្រើប្រាស់វិធីសាស្រ្តបង្រៀនទំនើបតាមបែបរិះរក ដោះស្រាយបញ្ហា និងតាមបែបគម្រោង ដែលបណ្តុះទាំងវិជ្ជាសម្បទា និង​បំណិនសតវត្សរ៍ទី២១ ជាពិសេសបំណិនសហការ ត្រិះរិះពិចារណា ទំនាក់ទំនង និង​លើក​កម្ពស់ស្វ័យសិក្សា ការ​ស្រាវជ្រាវរបស់សិស្ស និង​ការរៀបចំពិព័រណ៌ស្នាដៃសិស្ស រួមទាំងការអប់រំសីលធម៌ និងចរិយាធម៌។

សិស្ស​ដែលអាចចូលរៀននៅសាលារៀនជំនាន់ថ្មី ត្រូវឆ្លង​កាត់ការធ្វើតេស្តមុនចូលរៀន និងត្រូវបង្ហាត់បង្រៀនដោយគ្រូបង្រៀន​ដែលមានគុណភាព និង​វិធីសាស្រ្តបង្រៀនថ្មី, សាលាក៏បានផ្តល់ប្រាក់ឧបត្ថម្ភបន្ថែមដល់គ្រូបង្រៀនដើម្បីបង្រៀនពេញមួយថ្ងៃ និង​បំពេញ​ការងារប្រកបដោយវិជ្ជាជីវៈ និង​មិន​បង្រៀនគួរយកលុយពីសិស្ស។ សាលារៀនជំនាន់ថ្មី ក៏​បានបំពាក់​សម្ភារៈ និង​បរិក្ខាររៀន និងបង្រៀនទំនើប និង​រៀបចំបណ្ណាល័យជំនាន់ថ្មី អាហារដ្ឋាន បន្ទប់ពិសោធន៍ ដែលអាច​ឱ្យ​គ្រូបង្រៀន និង​សិស្សប្រើប្រាស់បច្ចេកវិទ្យា កម្មវិធីបច្ចេកវិទ្យា និង​ភាសាបរទេស៕